Read Thangal Naga LUKA 18 Bible Online

LUKA 18 - Thangal Naga bible

LUKA 18

¹Tuachi`n Jesu`n mi`n lungkialou a athum gige ding uh ahi chih theihna dingin akiang uah gentehna thu khat agen a.

²“Khuapi khat ah Pasian zong laulou tualeh mihing zong bangmah a simlou vaihawmtu khat a om hi.

³Tualeh hua khuasung ah meithai khat zong om a; amahnu akiang ah a hungpai a, ‘Ka langpa tung ah phuba hung laksak in!’ achi hi.

⁴Tualeh amah tomkhat sung a ut kei a, hinanleh a nung in a lungsim in, ‘Pasian laulouin mihing bangmah in simkei nanleng zong,

⁵hih meithainun ahung sukbuai jiakin aphuba ka laksak ding; ahuachih keileh hung paithithe leh, ahung gimsak kha ding!’ ” achi hi.

⁶Tuachi`n Toupa`n, “Thukhentu diktatlou thugen ngai un.

⁷A tung ah dohjou tadih nanleh, amitelte, sunleh jan a amah samte phuba laksaklou ding ahi hiam?

⁸Kung hilh ahi, aman aphuba alaksak pai ding hi. Hinanleh mihing Tapa a hungpai hun chiangin leitung ah tuabang ginna ahung muna diam?” achi hi.

⁹Tualeh aman mi amah midiktat a kingaihtuah a midangte simmoh kuate hiam kiangah hih gentehna thu agen a,

¹⁰“Mi nih Pasian tempul ah thumna nei dingin apai tou ua: khat Pharisai ahi a, adang khat siah dongtu ahi.

¹¹Pharisaipa ading a, amah guak in thumna anei a, ‘Pasian, midang vau a sum laksakte, dikloute, angkawmte, bang ka hihlouh jiak leh, hih siahdongpa bang ka hihlouh jiakin natung ah ka kipak hi.

¹²Kal khat sungin an nihvei ka ngawl a, kaneih jousiah sawm a khat kapia jel hi,’ achi a.

¹³Tualeh siah dongpa gamla tak ah dingin, van lam zong a enngam kei a, hinanleh, ‘Pasian kei mikhial tung ah zahngaiin!’ chi`n a awm atum a.

¹⁴Kung hilh ahi, khat pen sang in hihpa siamtang in a inn ah a paisukta hi; kuapeuh amah kingaithupi peuhmah a ngiam ding a, tualeh mi amah kingaingiam peuhmah tawisang in aom ding,” achi hi.

¹⁵Tuachi`n akhoih dingin a kiang ah naungekte a hungpaipih ua, hinanleh nungjuite`n amuhtak un anatai ua,

¹⁶hinanleh Jesu`n amauh asam a, “Naupang neute ka kiangah hung paisak unla, kham kei un, Pasian gam hichibang mite a ahih jiak in.

¹⁷Adiktak in kung hilh ahi! Kuapeuh Pasian gam naupang neute bang a kipahpihlou tuh, asung ah alut kei ding,” achi hi.

¹⁸Tualeh vaihawmtu khat in a kiangah, “Siapa hoih aw, tangtawn hinna ka tantheihna dingin bang ahiam ka bawl ding?” chi-in adong a.

¹⁹Jesu`n a kiang ah “Bang ding a hoih hung chi na hiam?” “Mi khat guak chihlouh kuamah ahoih aom kei, hua ahihleh Pasian ahi.

²⁰‘Angkawm ken, tualthat ken, gu ken, theihpihtu diklou in pang ken, nanu leh napa zahtak in chihte,’ ” achi a.

²¹Aman, “Hihte jousiah kaneu a pat kana juih ahita hi,” achi a.

²²Jesu`n hihthute ajak takin a kiangah, “Silkhat nasam nalai hi, naneih jousiah juak inla, mijawngte kiangah pia in, tuachi`n van ah gou na nei ding, tuazohchiang in hungpai inla, hung jui in,” achi hi.

²³Tualeh aman hih ajak in a lungkham mahmah a, mi hausa mahmah ahih jiak in.

²⁴Tualeh Jesu`n a lungkham mahmah chih amuh in, “Mi hausate a dingin Pasian gam lut haksa hina tazen e!

²⁵Mi hausa Pasian gam a alut sangin sangawngsau phinbil vang a alut paisuak abaihjaw hi,” achi hi.

²⁶Tualeh hihthu jatuten, “Tuachi ahihleh kua hundam in a omjou dia?” achi ua.

²⁷Hinanleh aman, “Mihing ding a sil hitheiloute Pasian dingin ahi thei hi,” achi hi.

²⁸Tuachi`n Peter in, “En-in! Kou bangkim nusia in kung jui uhi,” achi hi.

²⁹Jesu`n akiang uah, “Adiktak in kung hilh ahi, Pasian gam jiak a a inn hiam, anu leh apa hiam, a sanggamte hiam, azi hiam, a tate hiam nusia tuh

³⁰tu adamsung ngeiin aleh tampi tualeh hun hungtung ding a tangtawn hinna tawh mulou ding kuamah a om kei,” achi hi.

³¹Tuachi`n aman sawmlehnihte apaipih tuam a akiang uah, “Ngaiun! Jerusalem a paitou ding ihi a, mihing Tapa tungtang thu a Jawlneite laigelh jousiah ahung tangtung ding hi.

³²Amah Jentelte khut ah piak khiat ahi ding a; chiamnuih bawlnan azang ding ua, jumhuai takin abawl ding ua, chil asiatkhum ding uh.

³³Tualeh avua ding ua, athat ding uh; tualeh nithum nin athoukik ding,” achi hi.

³⁴Amau`n hih silte atheisiam kei ua, hih thute alak uah phual in aom a, thu kigente zong athei kei uhi.

³⁵Tuachi`n hichi ahi a, Jeriko khua atun kuan in mittaw kuahiam khat khutdoh in lamgei ah ana tou a.

³⁶Aman mipi pai thawmging aja a, “Bang thu ata?” chi`n adong a.

³⁷Amau`n, “Nazareth Jesu pai ahi,” chi`n ahilh ua.

³⁸Tualeh aman, “Jesu! David Tapa! Ka tung ah zahngaiin!” chi`n akikou a.

³⁹Tuachi`n amasate`n dai dingin atai ua, hinanleh amah, “David Tapa! Ka tung ah zahngaiin!” chi`n aki hahkou sem a.

⁴⁰Tuachi`n Jesu ading a, amah akiang a hung paipih dingin thu apia a; tualeh akiang a hungtun in ana dong a,

⁴¹“Na tung ah bang hung bawlsak leng na ut ei?” achi a. Aman, “Toupa, muhtheih ka ut hi,” achi a.

⁴²Jesu`n a kiangah, “Mutheita in! Na ginna in ahung damsak ahi,” achi hi.

⁴³Tualeh thakhat in ahung mutheita a, Pasian pahtawi kawm in amah ajuita a; tualeh mijousiahin hih amuh tak un Pasian aphatta uhi.