Read Thangal Naga LUKA 19 Bible Online

LUKA 19 - Thangal Naga bible

LUKA 19

¹Tuachi`n Jesu Jeriko khua ah alut a, apaisuak a.

²Tualeh ngaiin, mikhat amin Zakai kichi, siah dong lamkai khat aom a, amah mi hausatak ahi.

³Tualeh aman Jesu mi bang chibang ahiam chih muh asawm a, hinanleh mipi lak ah adin a ngiam jiakin amu thei kei hi.

⁴Tuachi`n ana matai a, a en dingin theipi kungah akah a, aman hua lampi hungjui ding ahihjiak in.

⁵Jesu huamun a hungtun in, adaktou a, amah amu a akiang ah, Zakai, “Kintakin hung kum in, ajiak tuni`n na inn ah hungtung ding ka hi,” achi hi.

⁶Tuatakin kintakin akum a, kipak takin amah a zintunta hi.

⁷Hinanleh amau`n hih amuh tak un, “Mikhialte inn a tung dingin apai tave!” chi`n aphun uhi.

⁸Tuachi`n Zakai ading a, Toupa kiangah, “Toupa, en in! ka dangka kimkhat mi gentheite kiangah ka pia ding a, tualeh mi neihsa khat peuh diklou tak a kalak aom leh alehli in kadin ding,” achi hi.

⁹Jesu`n akiang ah, “Tuni`n hih inn ah hundamna a tungta hi, amah zong Abraham tapa ahihjiak in.

¹⁰Ajiak mangthangte zong ding leh hundam ding a Mihing Tapa hungpai ahi,” achi hi.

¹¹Tualeh hih thute a ngaihkhiat lai un Jerusalem anaih ta`k jiak leh Pasian gam hungtung pai ding a a ngaihsut jiak un gentehna thu khat agen beh hi.

¹²Aman huajiakin agen a, “Mi thupi kuahiam khat kumpi gam khat la a hung kileh kik dingin khual gamla tak ah ahawh a.

¹³Tualeh aman a sila sawmte asam a, ‘Dangka-eng sawm akiang uah apia a, tualeh kung paikik masiah hihtawh summet na bawl un,’ akiang uah achi hi.

¹⁴Hinanleh amite`n amah ahua ua, ‘Hihpa katung ua vaihawm dingin ka deihkei uh chi`n anung ah palai asawl uhi.’

¹⁵“Tualeh hichi ahung hi a, gam avanei a, ahung kilehkik in, a dangka peipung dan uh theihna dingin a sila dangka apiakte a kiang ah asam sak a.

¹⁶Tuachi`n khatnapa a hungpai a, ‘Toupa na dangka-eng sawm in apung hi,’ achi a.

¹⁷Aman a kiangah, ‘Hoih e,’ ‘nang sila hoih! sil tawmnou khat tung a na gin-om jiakin khuasawm tung a vaihawmtu in pang in,’ achi hi.

¹⁸Anihnapa ahung pai a, ‘Toupa, na dangka-eng nga in apung hi,’ achi a.

¹⁹Aman tuachi mahbang in a kiangah, ‘Nang zong khua nga tung a vaihawm in pang in achi hi.’

²⁰Tuachi`n adang ahung pai a, ‘Toupa en-in, na dangka-eng hiah aom hi, kinawtna puan in ka tu`n a hoihtak in ka kem hi.

²¹Ajiak migumtat nahi a kung lau hi, na koihlouh zong nala a, tualeh na tuhlouh zong na-at hi,’ achi a.

²²Aman a kiangah, ‘Nang sila gilou! na kamsuak ngeiin siamlouh kung tangsak ding. migumtat kahih a, ka koihlouhna a zong ka lak a, tualeh ka tuhlouhna a zong ka-at nathei hi.

²³Atuachi ahihleh kungtun chiang a ka dangka apung tawh ka laktheih ding a ka dangka dangka inn a na koihlou na hia?’ achi hi.

²⁴Tuachi`n aman agei a dingte kiangah, ‘A dangka laksak unla, sawm neipa kiangah pia un,’ achi hi.

²⁵Hinanleh amau`n a kiang ah, ‘Toupa, aman dangka sawm anei!’ achi ua;

²⁶‘Ajiak kung hilh ahi,’ ‘kuapeuh aneite piakbeh ahi ding a, tualeh kuapeuh aneiloute aneihsun zong laksak ahi ding hi.

²⁷Hinanleh ka melmate atung ua ka vaihawm ding deihloute hungpui unla, kamai ah that un!’” achi hi.

²⁸Tualeh aman hichibang thu agenkhit in a lamkaih a, Jerusalem lam juanin apaitou ua.

²⁹Tualeh hichi ahi a, Olive kichi mual a Bethphage leh Bethani khuagei a hungtun un a nungjuite lak a minih asawl a

³⁰“Namai ua khua ah vapai unla, na lut chiang un sabiltung nou kuamah tuanngai nailouh navamu ding uh, sut unla, hungkai un.

³¹Tualeh mi kuapeuhin bangding a nasut uh chia a hungdok uleh, Toupa`n apoimoh hi, chi`n akiang uah gen un,” achi hi.

³²Tualeh asawlte avapai ua, akiang ua agen bangbang in avamu uhi.

³³Hinanleh sabiltungnou asut uleh aneiten akiang uah, “Sabiltung nou bangding a nasut uh ahia?” achi ua.

³⁴Amau`n, “Toupa`n adeih a ahi,” achi ua,

³⁵tuachi`n Jesu kiangah ahung kai ua. Tualeh sabiltung nou tungah apuante uh aphah ua, atung ah Jesu atousak uhi.

³⁶Tualeh apailai in lampi ah apuante uh aphah ua.

³⁷Tuachi`n atun ding kuan a Olive mual kumsukna ding takah nungjui mipi jousiahin asil thupi bawlte jousiah amuh jiak un akipak ua aw ngaihtakin Pasian apahtawi ua:

³⁸“Toupa min a hungpai kumpipa ahampha hi, van ah lemthu leng henla, tungnungpen ah thupina om hen!” chi in.

³⁹Tualeh mipi lak a Pharisai khenkhat in, “Siapa, na nungjuite phawk in,” achi ua.

⁴⁰Aman adawng a akiang uah, “Kung hilh ahi, hihte adaih uleh hih suangte akikou pai ding uhi.”

⁴¹Tualeh a tunkuan in khuapi amu a akahkhum a,

⁴²“Aw nangmah ngeiin tu nahun sung be`k in na khamuanna hung thei leteh maw! Hinanleh tuin jaw na muhlouhna dingin akiphualta hi!

⁴³Ajiak hichibang nite natung ah a hungtung ding, na melmate in na kimkot in leikulh akhawh ding ua, na kimkawt in pawt theilouin ahung umkhum ding ua.

⁴⁴Tualeh nang leh natate tualsatna in ahung nei ding ua, na sung ah suang khatbek kithuap in a nusia kei ding uh; ahung kivehlai na theihlouh jiakin chi in!”

⁴⁵Tuachi`n amah Pasian tempul sung ah alut a, siljuakte leh leite a hawlkhia a,

⁴⁶akiang uah, “Ka inn ahihleh thumna inn kichi ding ahi, chih gelh ahi. hinanleh nou gutate kua in nabawl uhi!” achi hi.

⁴⁷Tualeh aman niteng in tempul ah thu ahilh a, hinanleh siampite, laigelhmite leh mipi lamkaiten amah sukmang atum uhi,

⁴⁸hinanleh mipi jousiahin lunglut tak a athu angaihkhiat jing jiak un alawhna ding dan atheikei uhi.