Read Thangal Naga LUKA 2 Bible Online

LUKA 2 - Thangal Naga bible

LUKA 2

¹Tualeh huahun laiin hichi ahi a, Kaisar Augastas in leitung pumpi minkhum ding thu apia a,

²(Tualeh hihpen Siria gam a Kurinias gam uktu ahihlai a minkhumna masapen ahi).

³Tuachi`n mijousiah minkhum dingin amauh khuapi chiat uah apaita ua.

⁴Tuachi`n Joseph zong Galili gam a Nazareth khua a kipan in Judea gam a David pianna khuapi Bethlehem ah apaitou a (David innkuan pihte leh akhak asuan a mi ahihjiak in),

⁵Mari, azi kham gaisan laitak tawh minkhum dingin apaita a,

⁶huasan a aom laitak un a nauneih ahung hunta hi.

⁷Tuachi`n ata masa in pasal a neikhiata a, puannem in atuam a, zintunna inn amauh a ding mun a omlouh jiakin gan ankuang sungah asial hi.

⁸Tualeh huagam ah belampute a belamte uh ching a jan a gam a giak aom ua.

⁹Ngaiin, Toupa vantungmi khat akiang uah ahung kilak a, Toupa thupina in akim uh asalhvak a, tuatak in alau mahmah ua,

¹⁰hinanleh vantungmi in akiang uah, “Laukei unla! ngaiun, michih a dingin tangthupha kipak huai mahmah nou kungpuak hi.

¹¹Tuni-in noua dingin David khuapi ah hundampa apiangta, amah Krist Toupa ahi!

¹²Tualeh hih nou a dingin chiamtehna ahi ding; naungek puannem a tuam gan an piakna kuang a lum namu ding uhi,” achi a.

¹³Thakhat in vantungmi kiangah van mipite ahung kikhawm ua, Pasian aphat ua:

¹⁴“Tunung pen ah Pasian thupi henla, leitung a akipahpih mahmah mihingte kiangah lemna leng hen!” achi uhi.

¹⁵Vantungmite`n amauh van a apaisan tak un, “Tuin Bethlehem khua pha in ipai ding ua, Toupa`n a hunghilh hungtung pen iva en ding uh,” a kichi ua.

¹⁶Tuachi`n apai mengmeng ua, Mari leh Joseph tawh, gan an piakna kuangsung a naungek lum avamu ua,

¹⁷Avamuh tak un a naungek tanchin vantungmi-in agente agen thangta uhi.

¹⁸Tualeh ajakha jousiahin hih belampute thugen lamdang asachiat uhi.

¹⁹Hinanleh Mari-in hithute jousiah a lungtang ah a vom jing a, a ngaihtuah jingta hi.

²⁰Tuachi`n belampute`n, a kihilh bang ngeia sil bangkim azak ua amuh jiak un Pasian pahtawi leh phat kawm in a kilehkikta uhi.

²¹Tualeh a teptanna ding nigiat ahung chin in, amin dingin sul a aom masang a vantungmi in a phuaksa Jesu aphuakta uhi.

²²Mosi dan dungjui a aki siansuahni uh a hungtun in, Jerusalem khua ah amah avatonpih ua, Toupa mai a alat ding in.

²³Toupa danthu a agelh dungjuiin, “Ta pasal sul hong masa peuhmah Toupa a ding a sehtuam ahi,” achi ding uhi.

²⁴Tualeh Toupa danthu a kigen dungjui in; vakhu kopkhat hiam, palva nou nih hiam kithoihna a lan ding in.

²⁵Tualeh ngaiin, Jerusalem ah pasal khat amin Simeon kichi a om a; amah ahihleh midiktat leh Pasian ngaihsaktak ahi a, Israelte khamuanna ding a ngakjing a, atung ah Khasiangthou a om hi.

²⁶Tuachiah Krist Toupa amuh masiah asi kei ding chih Khasiangthou in ana theihsak mawng ahi hi.

²⁷Tuachi`n Kha theihsak in tempul sung ah avalut a; naungek Jesu anu leh apa in da`n ngaina bang a atung a bawlsak dingin ahung zohpih tak un,

²⁸Aman ana angpom a, Pasian aphat a:

²⁹“Thuneitu Toupa, Na kamchiamsa bang in, tu in na sila khamuang takin na paisak ding a;

³⁰Na hundamna ka mit in amuhta`k jiak in,

³¹Hua mijousiah muh a na bawl pen;

³²Jentelte kiang a kilakna vak leh nami Israelte thupina dingin,” achi hi.

³³Tualeh naungek tungtang thu agen anu leh a pan lamdang asa mahmah ua.

³⁴Tuachi`n Simeon in amauh agualjawl a, anu Mari kiangah ngaiin, “Hih naupang Israelte lak a mi tampi pukna ding leh dinkhiatna ding a seh ahi, gensiat a om ding chiamtehna ding ahi.

³⁵Ahi, nangmah ngei lungtang zong namsau in asun pailet ding a, tuachia mi tampite lungtang a ngaihtuahnate akilat theihna dingin,” achi hi.

³⁶Tualeh Asher nam a mi, Phanuel tanu, Anna kichi numei Jawlnei khat a om a; amahnu teksia ahita a, akiten zoh uh kum sagih a pasal kiangah a om a,

³⁷tuachi`n amahnu meithai kum sawmgiat leh li hial ahi a, Pasian tempul paisan louin sun leh jan in anngawl kawm a thum in Pasian abia jel hi.

³⁸Tualeh huachih laitak in amah a hungpai a, Pasian kiangah kipahthu agen a, Jerusalem tatna lam en jousiah kiangah Jesu tanchin agen hi.

³⁹Tuachia Joseph leh Mari-in Toupa da`n dungjui a siljousiah a bawlzoh un Galili gam ah amauh khua mah Nazareth ah a kilehkikta uhi.

⁴⁰Tuachi`n naungek hung khang in khalam ah a hung hatta a, pilna in ahung dimta a, Pasian hehpihna atung ah aom hi.

⁴¹Tualeh kum teng in paikan kut hun in anu leh apa Jerusalem ah a hawhjel ua.

⁴²Tualeh amah kum sawmlehnih ahih in da`n dungjuiin ankuang luina ah a hawhtou ua.

⁴³Tualeh ankuang lui khit a a kilehkik lai un, naupang Jesu`n Jerusalem ah a omsan a, hinanleh anu leh apa in athei kei uhi;

⁴⁴tuachi`n apawllak uah om hinanteh achi ua, nikhat lam a paikhinta ua, a sanggam lak uleh ameltheih lak uh azong ua.

⁴⁵Tuachia amuh louh tak un amah zong kawm kawm in Jerusalem ah aki nungleh kik ta uhi.

⁴⁶Tualeh hichi ahi a, nithum nung in Pasian tempul sung ah siate lak a tou a, athugen uh ngaikhia leh, amauh thu dong a om ava muta ua.

⁴⁷Tualeh athu jataphot in a theihdan leh a dawndan lamdang asa mahmah uhi.

⁴⁸Anu leh apa in amuh tak un lamdang asa mahmah ua, anu in akiang ah, “Tapa bangding a hichi bang a hungbawl na hia? En-in napa leh ken lunghimoh takin kung zong uhi,” achi hi.

⁴⁹Tuatakin aman akiang uah, “Bang ding a hungzong nahi ua? Ka Pa inn a om ding ka hi chih theilou nahi uh hiam?” achi hi.

⁵⁰Hinanleh amau`n akiang ua a thugen atheisiam kei uhi.

⁵¹Tuachi`n amauh ajuisuk a, Nazareth khua a hungtung ua, athu uh mang in aom a, hinanleh anu in hih sil kigen jousiah a lungtang ah avom gige hi.

⁵²Tuachi`n Jesu pilna ah leh taksa ah ahung khanglian deuhdeuh a, Pasian leh mihing deihsak in a hung om deuhdeuh ta hi.