Read Thangal Naga LUKA 20 Bible Online

LUKA 20 - Thangal Naga bible

LUKA 20

¹Tualeh hichi ahi a, Pasian tempul ah thu hilh a, tangthupha agen laiin, nikhat siampite leh laigelhmite upate tawh ahung pai ua

²tuachi`n a kiang ah, “Kua thu in ahia hih silte nabawl? Kuan ahia thu ahung piak?” Hung hilh in, achi ua.

³Hinanleh aman adawng a akiang uah, “Ken zong silkhat kung dong ding hi. Hung dawng un,

⁴Johan baptisma van a kipan ahia, ahihkeileh mihing a kipan?” achi a.

⁵Tuatakin amauh a kingaihtuah ua, “ ‘Van a kipan chileila, ahihleh bangding a gingta lou?’ Hung chi ding a.

⁶Tualeh, ‘Mihing a kipan ahi chileila,’ mipi jousiahin suangin ahung deng ding uh, ajiak Johan hi Jawlnei ahi a chihchiat jiak un.”

⁷Tuachi`n amau`n, “Khoia pat ahia chih ka genthei kei uh,” chi`n adawng ua.

⁸Jesu`n akiang uah, “Ken zong bang thuneihna a hih silte bawl ka hiam chih kung hilh kei ding hi,” achi hi.

⁹Tuachi`n mipite kiangah hih gentehna thu agen a, “Mi kuahiam khat in grep huan abawl a, grep huanbawlmite kiangah asan dingin apia a, tualeh gamtuam ah sawtpi tam dingin paita hi.

¹⁰Tualeh agah lawh hun in grephuan a agah ana piak ding un grep huanbawlmite kiangah a silate khat asawl a; hinanleh grep huanbawlmite`n amah anavua ua, khutguakin asawlmang ta uhi.

¹¹Tuachi`n aman sila dang asawl kik a, amah zong anavua ua, jumhuaitak in abawl ua, khutguakin asawlmangta uhi.

¹²Tuachi`n aman athumna asawl kik a, amah zong ana hihliam ua, adelhdokta uhi.

¹³Tuachi`n grep huanneipa`n, ‘Bang chi bawl ding kadiam? Ka tapa ittak ka sawl ding hi, amah be`k amuh chiang un amah anajah khamoh kei ding uh!’ achi hi.

¹⁴Hinanleh grep huanbawlmite`n amah amuh tak un, ‘Hihpa gouluah dingpa ahi, agou itantheihna ding un ithat ding uh!’ chi`n aki hou ua.

¹⁵Tuachi`n grep huan a pat apaikhia ua, a thatta uhi. “Tuajiakin, grep huanneipa`n atung uah bang chi`n abawl tadia le?”

¹⁶“A hungpai ding a, grep huanbawlmite ahihmang ding a, tualeh grep huan midangte kiangah apia ding hi,” achi a. Amau`n hihthu ajak tak un, “Tuachi liangjaw tundah hen!” achi ua.

¹⁷Tuachi`n aman amauhte a en a, “Ahihleh hihthu kigelh bang hiam? ‘Inn lamte suang deihlouh pen tuapen mah aning a suang poimoh pen ahung hita,’ chih, achi a.

¹⁸Kuapeuh hih suangtung a puk tuh a kitattawng ding a; tualeh kuapeuh apukkhum tuh aguaijan ding hi,” achi hi.

¹⁹Tualeh hua hunlai mah in siampite leh laigelhmite`n amah mat asawm ua, hinanleh mipite alau uh, ajiak hua gentehna amauh demna a agen ahi, chih athei uhi.

²⁰Tuachi`n amah ata`ng ua, gam ukpa vaihawmna leh thuneihna atuttheihna ding un athu genkhialh man dingin midik kipang enkhiami asawlkhia ta uhi.

²¹Tuachi`n amau`n a kiang ah, “Siapa, diktakin nagen a, na hilhjel, tualeh kuamah khentuam neilouin Pasian lampi diktakin nahilh hi chih ka thei uhi.

²²Kou a dingin Kaisar kiang a siah piak asiang hiam siang lou?” chi`n adong ua.

²³Hinanleh aman a ze-et uh a thei a akiang uah, bangding a hung ze-et nahi ua?

²⁴“Makhai khat hung ensak un. Kualim leh kua laigelh ahia atuang?” achi a. Amau`n adawng ua, “Kaisar a,” achi ua.

²⁵Aman akiang uah, “Tuajiakin Kaisar silte Kaisar kiangah pia unla, Pasian silte Pasian kiangah pia un,” achi hi.

²⁶Tuachi`n mite maiah athu gen khialh mat ding amu takei ua, adawnna lamdang asa mahmah ua, adaita uhi.

²⁷Tualeh thohkikna a om kei chi Sadukaite lak a mi khenkhat a kiangah a hungpai ua, amah adong ua,

²⁸“Siapa, ‘Mosi-in kuapeuh a sanggam pa`n zi aneih a taneilou a asihsan leh anaupa`n azi aluah ding a, a upa dingin chi khahsak ding ahi,’ chi`n ahung gelhsak hi.

²⁹Tuin sanggam pasal sagih aom ua, atak pen in zi anei a, ta neilou in asi a.

³⁰Tuachi`n anihna in aluah a, ta neilou in asi a,

³¹tualeh athumna in aluah a, tuachimah bangin asagihna in aluah a, ta neilou in asi chiatta uhi.

³²Atawp in numeinu zong asita hi.

³³Tuajiakin thohkikni chiangin amahnu kua zi ahita diai? A sagih unlah zi-in aneichiat ua,” achi ua.

³⁴Jesu`n adawng a akiang uah, “Hih leitung tate akiteng ua, tualeh zi leh ta in akinei uhi.

³⁵Hinanleh huahun chiang a jautak ding leh misi lak a pat thohkikna a jautak ding a aguatte akiteng kei ua, zi leh ta in zong akinei kei uhi.

³⁶Amauhte si zong asi nawn kei ding uh; ajiak vantungmite bang ahi ua; tualeh thohkikna tate ahihjiak un, Pasian tate ahi uhi.

³⁷Misi kaihthoh in a om ding chih Mosi in zong sawlbuk mun ah, ‘Toupa tuh Abraham Pasian, Isak Pasian tualeh Jakob Pasian achih laiin a theisakta hi.’

³⁸Amah misi Pasian ahi kei a mihing Pasian ahijaw hi; ajiak ama ngaihin mi jousiah ahing hi,” achi hi.

³⁹Tuachi`n laigelhmite khenkhat in adawng ua, “Siapa, nagen dik hi!” achi ua.

⁴⁰Huanung in amau`n thu dang mawng mawng a dongngam nawn kei uhi.

⁴¹Tualeh aman akiang uah, “Krist hih David tapa ahi bang chidan a achih uh ahia? achi a.

⁴²Amah David ngeiin sam laibu ah, ‘Toupa`n ka Toupa kiangah: ka jiat lam ah tou inla

⁴³Na melmate nakeng ngakna a ka bawl masiah,’ achi a.

⁴⁴Tuajiakin David in amah ‘Toupa’; achihleh bang chidan a a tapa hithei ding ahia?” achi hi.

⁴⁵Tuazoh in mipi kikhawmte jousiah jak in a nungjuite kiangah,

⁴⁶“puan-ak tual silh a vak ut, vanjuakna munte a chibai buk bang, kikhopna inn a touna hoihpente leh ankuang luina a mun hoihpente tan ngaina laigelhmite lak ah kiveng un;

⁴⁷meithaite innsung ane gam ua, mi khemna in sawtpipi thumna anei uh! Tuachibang mite`n siamlouh ahahtan sem ding uh!” achi hi.