Read Thangal Naga LUKA 21 Bible Online

LUKA 21 - Thangal Naga bible

LUKA 21

¹Tualeh a dakkhia a, mihausate`n thohlawm bawm a dangka akhiat lai uh amu a,

²tualeh aman meithainu jawng mahmah khat in paisasan nih akhiat lai zong amu a.

³Tuatakin aman, “Adiktak in kung hilh ahi, amauhte tengteng sang in hih meithai jawng mahmahnu in akhia tamjaw hi.

⁴Ajiak amauhte tengteng in aneihval uh Pasian thohlawm bawm ah akhia ua, hinanleh aman ahinna ding a aneihsun teng a khiasiang hi,” achi hi.

⁵Tuachi`n kuate hiam in Pasian tempul thu, suang hoihtakte leh silpiak hoihtakte a zephoih ahihdan agen uleh aman,

⁶“hih nasil muhte uh ahihleh sukchimlouh a suang khat tung a khat kichiang mawng mawng a omlouh hun a hungtung ding hi,” achi hi.

⁷Tuachi`n amau`n, “Siapa, hih silte bangchik chiang ahung om dia? Tualeh hih silte a hungtun ding chiangin bang theihsakna ahung om dia?” chi`n adong ua.

⁸Tualeh aman, “Khem a na om louhna ding un pilvang un. ‘Krist ka hi!’ tualeh ‘Ahun tung ding ahita!’ chi`n mi tampite kamin in a hungpai ding uhi. Tuajiakin mauhte juikei un.

⁹Hinanleh kidou thu leh buai thute najak chiang un lau kei un; ajiak hih silte hungtung masa ding mawng ahi; hinanleh atawpna ahung tungpai naikei ding hi,” achi hi.

¹⁰Tuachi`n aman akiang uah, “Nam tuam in nam tuam tualeh gam tuam in gam tuam adou ding.

¹¹Tualeh mun tuamtuam ah jin thupitak aling ding a, kialte hungtung in, hiite ahung leng ding; tualeh van a pat in sil lauhhuaite leh chiamtehna thupite ahung om ding hi.

¹²Hinanleh hih silte atun ma in nou ahung man ding ua, kikhopna inn leh thong lak ah hungpaipih in ahung bawl genthei ding ua, ka min jiakin kumpipate mai leh vaihawmte mai ah ahung paipih ding uhi.

¹³Hinanleh hihpen nou a dingin theihsakna ahi ding.

¹⁴Tuajiakin bangchi dawn ding chih ngaihtuah masalou dingin na lungtang uh kipsak un,

¹⁵ajiak na melma jousiah un ahung dou ua, ahung sel theihlouh ding uh kam leh pilna kung pia ding hi.

¹⁶Tualeh nanu leh napate uh, na sanggamte uh, nabehte uleh nalawmte un zong ahung mansak ding ua, nalak ua khenkhatte ahung hihlum ding uhi.

¹⁷Tualeh kamin jiakin mijousiah huat in na om ding uhi.

¹⁸Hinanleh nalu ua na samjang khat zong a mangthang kei ding hi.

¹⁹Na kuhkal na uah na hinna uh na humbit ding uhi.

²⁰“Hinanleh galkapte`n Jerusalem a umkhum namuh chiang un amanthaina ding anaita chih thei un.

²¹Huahun chiangin Judea gam a omte mualtung ah tai uhen, asung a omte zong pawtdok uhen; tualeh gam a omte zong asung ah lut kei uhen.

²²Ajiak thu kigelh jousiah a tangtunna ding a ‘Huanite pen phuba lakni,’ ahi ding.

²³Hinanleh huani chiangin agaite leh naungek nawiteplai neite tung agik hi! gamsung ah haksatna thupitak leh hihmite tung a thangpaihna tung ding ahihjiak in.

²⁴Tualeh amauhte namsau hiam in asi ding ua, namchin kiangah sila a puiin aom ding uhi; tualeh Jentelte hun bukim masiah Jerusalem pen Jentelte totden in aom ding hi.

²⁵“Tualeh ni leh kha leh aksite ah chiamtehna aom ding a; leitung ah namchin haksatna leh mangbatna a om ding; tuipi kihot in aging veng vung ding.

²⁶Mite launa jiak leh leitung a sil hungtung dingte ngaihtuahna jiakin a sibup ding uh; van silbawl theihnate kihihling ding ahihjiak in.

²⁷Tuachi`n amauhte`n Mihing Tapa silbawl theihna leh thupina thupitak tawh meilak a hungpai amu ding uhi.

²⁸Hih silte a hungtun kipat chiangin entou unla, dakkhia un, ajiak na tatna ni uh ahung naita hi,” achi hi.

²⁹Tuachi`n aman akiang uah gentehna thu khat agen a: “Theipi kung leh singkung jousiah en un.

³⁰Anah ahungsel tak chiangin doupi ahung naita chih namu ua nathei uhi.

³¹Tuachimah bangin hih silte ahungtun namuh chiang un Pasian gam ahung naita chih thei un.

³²“Adiktak in adiktak in kung hilh ahi, sil jousiah a tangtun kim masiah tulai khangthakte amang kei ding uhi.

³³Van leh lei a mang ding a, hinanleh ka thu amang kei ding hi.

³⁴“Hinanleh pilvang un ahuachih keileh nekvah taluat leh uain kham leh damsung khuasak ngaihtuahna in na lungtang uh adim talua kha ding a, tuachi`n huani na theihlouh kal un a hungtung kha ding hi

³⁵ajiak thang kipel bang a leitung pumpi a omte jousiah tung a tungchiat ding ahihjiak in.

³⁶Tuajiakin hih silte tengteng pelding leh Mihing Tapa maia dingtak ding a guat na hihtheihna ding un bangchiklai peuhin thum unla, limsak jing un,” achi hi.

³⁷Tualeh aman sunlaiin Pasian tempul ah thu ahilh a, jan chiangin a pawtdok a, Olive mual ah ava omjel hi.

³⁸Tuachi`n mipi jousiah jingsang in a kiangah tempul ah athu ngaikhia dingin ahung pai uhi.