Read Thangal Naga LUKA 22 Bible Online

LUKA 22 - Thangal Naga bible

LUKA 22

¹Tualeh tanghou tol sawhlouh ankuang luina paikan kut achih uh ahung naita a.

²Tualeh Siampite leh laigelhmite`n amah a thahtheihna ding uh a ngaihtuah ua; mipite lah alau ua.

³Tuachi`n sawmlehnihte lak a pang Juda amin khem Iskariot achih uh sung ah setan alut a.

⁴Tualeh apaita a, akiang ua Jesu amatsak theihna dingdan siampite leh laigelhmite ava kihoupih hi.

⁵Tuatakin amauh akipak mahmah ua, amah dangka piak dingin ana chiamta uhi.

⁶Tuachi`n aman lem asata a, mipi omlouhkal a matsakna ding lemtang a zongta hi.

⁷Tuachi`n tanghou tol sawhlouhni paikan kut belam nou gohni ding a hungtungta hi.

⁸Tualeh aman Johan leh Peter asawl a: “Pai unla paikan kut inekna ding un hung vabawlsak un,” achi hi.

⁹Tuachi`n amau`n a kiangah, “Khoitak ah hung vabawlsak le ung nadeih a?” achi ua.

¹⁰Aman akiang uah, “Ngai un, khuapi sung a nalut chiang un tuibel pua pasal khat in ahung natuak ding a; alutna inn ah juilut un,

¹¹tuachi`n a inn neite kiangah: ‘Siapa`n ka nungjuite tawh paikan kut ka nekna ding uh mikhual inndan khoitak ahiam?’ ahung chi hi, chi`n gen un.

¹²Tuachi`n aman inndan tungnung lianpi, guatsa a om khat ahung ensak ding; huasan ah bawl un,” achi hi.

¹³Tuachi`n apai ua, agen bangin a vamuta ua; paikan kut abawlta uhi.

¹⁴Ahun ahung chin takin atouta ua, sawmlehnihte`n zong atoupih ua.

¹⁵Tuachi`n aman akiang uah, “Ka thuakma in hih paikan kut noutawh nek ka ut mahmah hi!

¹⁶Ajiak kung hilh ahi, Pasian gam a sukbukim ahih masiah hih ka nenawn kei ding hi,” achi hi.

¹⁷Tuachi`n nou ala a, kipahthu agenzoh in, “Hih la unla kihawm un.

¹⁸Ajiak Pasian gam a hungtun masiah grepgah tui ka dawn nawn kei ding hi,” achi hi.

¹⁹Tualeh tanghou ala a, kipahthu agenzoh in abalkek a, akiang uah apia a, “Hih ka taksa nou a ding a piak ahi, nung theihjingna ding un hih bawljel un,” achi hi.

²⁰Tuachimah bangin nitak an anekzoh un nou ala a, “Hih nou ka sisan a thukhunthak, nou a ding a luangkhia pen ahi.

²¹“Hinanleh, ngaiun! A hung mansak dingpa khut ka kiangah dohkan tungah aom hi!

²²Mihing Tapa pen a kiguatsa bangin apaitakpi ding hi; hinanleh amansakpa tung agik hi!” achi hi.

²³Tuachi`n amauhte hichibang bawl ding alak ua kuapen hi ding ahia chi`n aki dongtuahta uhi.

²⁴Tualeh amauh lak a kua ahia alian pen a seh ding chi a kinialna zong aom a.

²⁵Aman akiang uah, “Jentelte kumpipate atung uah laltak in aom ua, tualeh atung ua thuneitute pen, ‘Mi hoihna ding bawltute achi uhi.’

²⁶Hinanleh noupen hichi bang na hikei ding uh; nalak ua lianpen tuh naupangjaw bang in om henla; tualeh a thupipen tuh nekbawl bang in omjaw hen.

²⁷Ajiak ankuang imtu leh nek bawltu kua ahia alianjaw? Hinanleh kei tuh nalak ua nek bawltu bangin ka om hi.

²⁸“Hinanleh nou pen khemna katuah sung a hung ompihte nahi uhi;

²⁹tualeh ka Pa`n kei gam ahung guatsak bangin nou dingin gam kung guatsak hi.

³⁰Ka gam a ka dohkan a nanek ua, nadawn ua, tualeh Israel nam sawmlehnihte vaihawmsak a, lal touna a na toutheihna ding un, achi hi.”

³¹Tualeh Toupa`n, “Simon, Simon! Ngaiin, setan in buh bang a ahung septheihna dingin ahung ngen hi.

³²Hinanleh na ginna aman louhna dingin kung thumsak ahi. Na kiheikik chiangin nasanggamte hihkip in,” achi hi.

³³Hinanleh aman a kiangah, “Toupa nang tawh thong leh sihna ah zong pai ka-ngap hi!” achi a.

³⁴Tuachi`n aman, “Peter, kung hilh ahi, thumvei nung kitheihmoh bawl masiah tunin ak akhuang kei ding,” achi hi.

³⁵Tualeh aman akiang uah, “Nou dangka-ip beia, thungpi beia, tualeh khedap beia kungsawl laiin sil khatbek na kitasam uai le?” achi a, amau`n, “Tasam lou,” achi ua.

³⁶Tuachi`n aman akiang uah, “Hinanleh tuin, dangka-ip neiin keng henla, tuachibang mah in thungpi neiin zong tualeh namsau neilouin apuantual juak henla, lei hen.

³⁷Ajiak kung hilh ahi, amah pen, ‘dan bawtsiatute lak ah asimtel uh,’ chih gelh pen ka tungah a tangtung ding mawng ahi, ka tungtang thute tungkim ahita,” achi hi.

³⁸Tuachi`n amau`n, “En in Toupa! Hihsan ah namsau nih aom hi!” achi ua. Aman akiang uah, “A hun hi!” achi hi.

³⁹A pawtkhia a, angaina bangin Olive mual ah apai a; tualeh a nungjuite`n zong ajui ua.

⁴⁰Amun atun un aman akiang uah, “Khemna a na lutlouhna ding un thum un,” achi hi.

⁴¹Tualeh amah suang a denphakna ding chiang ah apaituam a, akhup din a, athum a.

⁴²“Pa aw, lem nasak a ahihleh hih nou ka kiang a pan suankhia in, hinanleh kei thu hilouin nang thu hijaw hen,” achi hi.

⁴³Tuatakin van a pan vantungmi khat a kiangah ahung kilak a, amah ahung hatsak hi.

⁴⁴Amah agim mahmah a, ahah thum jawsem a, tualeh a khua-ulsisan bangin mal lian taktakin leiah ahung takkhia a.

⁴⁵Athum zoh in dingkhia in a nungjuite kiangah ahung pai a. amauhte lungkham jiakin ihmu in ahung mu a.

⁴⁶Tuachi`n akiang uah, “Bang ding a ihmu nahi ua? Khemna a na lutlouhna ding un thou unla thum un,” achi hi.

⁴⁷Tualeh thu agen laitakin ngaiin, mipi honkhat ahung pai ua, tualeh sawmlehnihte lak a khat Juda achih uh ahung lamkai a, tawp sawm in Jesu kiang ahung naih a.

⁴⁸Hinanleh Jesu`n a kiangah, “Juda, Mihing Tapa tawp a matsak ding nachi maw?” achi hi.

⁴⁹Akim a mi omten sil hung om ding amuh un, “Toupa, namsau in ka satding uai?” achi ua.

⁵⁰Tualeh alak ua mi khat in siampi silapa asat a, abil jiatlam asatkhiat sak hi.

⁵¹Hinanleh Jesu`n ahoupih a, “Hichitan ah hunsak un!” achi a, tuachi`n abil atham a adamsakta hi.

⁵²Tualeh Jesu`n akiang a hungpai siampite leh Pasian tempul a lamkaite leh upate kiangah, “Guta man ding bangin namsau leh khetbuk tawiin nungpai uh maw?

⁵³Na kiang uah niteng a Pasian tempul a ka om laiin lah ka tungah khut nakha kei ua, hinanleh tuin nahun uh ahi, tualeh mial thuneihna hun ahi,” achi hi.

⁵⁴Tuachi`n amah aman ua, apaipih ua, siampi inn sung ah a pailutpih uhi. Tualeh Peter in gamla tak a pat agal juih a.

⁵⁵Amau`n huangsung lai ah mei atawh ua, atoukhawm ua, Peter zong alak uah avatou a.

⁵⁶Tualeh meigeia atou laiin nungak kuahiam khat in amu a, hoihtak in a en a, “Hihpa zong a kiang a om ahi!” achi a.

⁵⁷Hinanleh aman, “Numei, amah ka theikha kei!” chi`n aki theihmoh bawl hi.

⁵⁸Tualeh tomkhat zoh in midang khat in a mukik a, “Nang zong alak ua mikhat nahi!” achi a. “Ka hikei, nangpa!” achi hi.

⁵⁹Tuachi`n dakkal khat ding zoh in midang khat in, “Hihpa zong akiang a om himah ve aw, Galilimi himah veh!” achi tinten a.

⁶⁰Hinanleh Peter in, “Na thugen ka theikei nangpa!” achi a. Tualeh athugen laitak in ak ahung khuangta hi.

⁶¹Tualeh Toupa akihei a, Peter a en a, Peter in “Tuni`n ak khuanma in thumvei nung kitheihmoh bawl ding,” chia Toupa`n akiang a achihpen ahung theidok a.

⁶²Tuatakin Peter apawtkhia a, akap huthut ta hi.

⁶³Tualeh Jesu mantute`n amah chiamnuih bawlnan anei ua, avua ua.

⁶⁴Tualeh amai a tuamsak zoh un amai abeng ua, “Kua ahia hung vua? Gen in!” chi`n adong ua.

⁶⁵Tualeh thudang tampi in amah gensia in akawk uhi.

⁶⁶Khuavak takin siampite leh laigelhmite ahung kikhawm ua, a vaihawmna mai uah apaipih ua.

⁶⁷“Krist nahi hiam? Hung hilh in,” achi ua. Aman akiang uah, “Hung hilh nan leng zong na gingta kei ding uh;

⁶⁸tualeh ken zong nou thu hung dong leng nung dawng kei ding uh, pai zong nung paisak kei ding uhi.

⁶⁹Tubansiah mihing Tapa pen Pasian silbawl theihna jiatlam ah atouta ding hi,” achi hi.

⁷⁰Tuachi`n aun un, “Ahihleh Pasian Tapa nahi maw leh?” achi ua. Aman akiang uah, “Nung chihmah bang un ka hi,” achi a.

⁷¹Tualeh amau`n, “Bang theihsakna dang ipoimoh nawn lai ding ua! Eimah ngeiin akamsuak ijata uhi!” achi uhi.