Read Thangal Naga LUKA 24 Bible Online

LUKA 24 - Thangal Naga bible

LUKA 24

¹Tualeh nipikal ni masa ni-in jingsang matakin a gimnamtui bawlte uh tawiin, numei dang kuate hiam tawh han ah ahung pai ua.

²Hinanleh suang han a pat likkhiatsa in amu ua,

³tuachi`n asung ah alut ua Toupa Jesu luang amu kei uhi.

⁴Tualeh hichi ahung hi a, huajiaka a lungbuai laiun ngaiin, mi nih puan teselhsolh silh in agei uah ahung ding a.

⁵Tuachi`n amauh laua leia a khupbok laiun, amau`n akiang uah, “Bangding a misi lak a mihing zong nahi ua?

⁶Hihsan ah aom nawn kei a, a thoukikta hi; Galili gam a aom laia na kiang ua agen thei un:

⁷‘Mihing Tapa ahihleh mikhialte khut ah matsak in aom ding a, kross ah akilhden ding ua, tualeh nithum ni-in a thoukik ding,’ ” achih achi a.

⁸Tualeh amau`n athugente ahung theidokta uhi.

⁹Tuachi`n anung paikikta ua, hih silte jousiah sawmlehnihte leh midangte jousiah kiangah ahilhta uhi.

¹⁰Amauhte Mari Magdalini tawh Joanna leh Jakobnu Mari tawh tualeh akiang ua om numei dangte tawh ahi ua. Hih silte sawltakte kiangah ahilhta uhi.

¹¹Tualeh athugen uh thu maimai bangin a ngaihsut ua; ana taksan kei uhi.

¹²Hinanleh Peter a dingkhia a, han ah avatai a, tualeh kun a a et leh puannemte guak om amu a, sil omdante lamdang asak takin a paimangta hi.

¹³Tualeh ngaiin, alak ua mi nih Emmau kichi khua khat Jerusalem a pat mel sagih a gamla ah hoh dingin apai ua.

¹⁴Amauh hih sil hung omte jousiah thu ah ahoulim ua.

¹⁵Tualeh hichi ahung hi a, houlim a aki doktuah laiun, Jesu`n ahung naih a amauh tawh a zawkkhawmta a;

¹⁶hinanleh amah atheih louhna ding un amit uh sukvaihsak in aom hi.

¹⁷Tualeh aman akiang uah, “Na paikawm ua na kihoulimna uh leh na dahna thu uh bang ahia?” achi a.

¹⁸Tuachi`n khatpa amin Kleopa kichi pen in adawng a akiang ah, “Tulai a sil omdante na theihlouh, Jerusalem a nangguak mikhual nahi hiam?” achi hi.

¹⁹Aman akiang uah, “Bang silte ahia?” achi a. Tualeh amau`n a kiangah, “Nazareth Jesu, Pasian leh mijousiah mitmuh a asilbawl leh thugen Jawlnei minthang tak tungtang thu.”

²⁰“Amah siampite leh ka lamkaite un sitak a siamlouh atansak ding un a piakkhiat ua, kross-a akilhden thu uh.

²¹Hinanleh kou Israelte tantu ding amah ahi chih ka kinem uhi! Tualeh hihte lou zong, hihte atunzoh tuni anithum ni ahita hi.

²²Tualeh ka lawilak ua numei khenkhat han a matak a vapaite`n lamdang satakin ahung koih uhi,

²³a luang amuhlouh takun ahung kinungleh kik ua, ahing kikta chia hunghilh vantungmite zong kamu uh, achi ua.

²⁴Tualeh ka ompihte lak ua khenkhat han ah avapai ua, numeite gen bang takin ava mu ua, hinanleh amah amu tuankei uhi,” achi ua.

²⁵Tuachi`n aman akiang uah, aw mimawte leh, Jawlneite thugen jousiah taksan nuamloute (taksan ding a lung ngongte)

²⁶“Krist in hih silte thuak a athupina a alut ding mawng hilou amaw?” achi hi.

²⁷Tualeh Mosi leh Jawlneite laibu a pan in Laisiangthou pumpi a amah tungtang kigelhte akiang uah a hilhchianta hi.

²⁸Tuachi`n apaina ding khua uh tungpai ding ahita ua, amah gamla tak a paisuak sawm bangin aom a;

²⁹hinanleh amau`n akhouh ua, “Ka kiang uah ta`m maiin, nitaklam ahita a, tualeh ni zong tum ding ahita hi,” achi ua. Tuachi`n akiang ua om dingin alutta hi.

³⁰Tualeh hichi ahung hi a, amauh tawh dohkan a atouin, tanghou ala a, agualjawl a, tualeh abalkek a, akiang uah apia a.

³¹Tuachi`n amit uh ahung vakta a, amah atheita uhi; tuatakin amah amit muh uapat amangta hi.

³²Tualeh amau`n, “Lampi a ahung houpih a, Pasian Laisiangthou thute ahung hilhchian laiin ilungtang sung ah akuang hial hilou amaw?” a kichi ua.

³³Tualeh huahun laitak mah in athoukhia ua, Jerusalem khua ah aki nungleh ua, sawmlehkhat omkhawmte leh akiang ua omte amu uhi.

³⁴Amau`n, “Toupa tuh athoukik taktak ahi! Simon kiangah zong akilakta!” ana chi ua.

³⁵Tuatakin amau`n zong lampi a sil hung omte leh tanghou abalkek a amah atheihkhiat dante uh ahilh uhi.

³⁶Tualeh hihthute agen laiun Jesu ngei alak uah ahung ding a, “Na kiang uah khamuanna om hen,” achi hi.

³⁷Hinanleh amauh a chija mahmah ua, tualeh alau ua: sikha mu bangin aki ngaihsun ua.

³⁸Tualeh aman akiang uah, “Bangding a mangbang nahi ua? Tualeh bangding a na lungtang ua ginglahna hung om ahi hiam?

³⁹Ka khutte leh ka kengte en-un, kei mahmah hilou ka hi hiam? Hung tham unla en-un; sa leh guh nei a nungmuh bang un, kha in sa leh guh aneikei hi,” achi hi.

⁴⁰Hihte agen zoh in amauh a ensak a.

⁴¹Hinanleh akipak seng jiak ua agingtat louh uleh lamdang asaklai un aman akiang uah, “Hiah nek ding nanei uh hiam?” achi a.

⁴²Tualeh amau`n a kiangah nga kikang gaw khat leh khuaiju khalkhat apia ua,

⁴³aman hua ala a, amai uah aneta hi.

⁴⁴Tuachi`n aman akiang uah, “Mosi dan leh Jawlneite laibute leh Psam bu a ka tungtang kigelh jousiah ahung tangtun ding dan nou tawh ka omkhawm lai a na kiang ua ka thugente hihte ahi,” achi hi.

⁴⁵Tualeh Pasian laibute a theihtheihna ding un a lungtang uh ahonsakta hi.

⁴⁶Tuachi`n aman akiang uah, “Hichi bang a gelh ahi: Krist in gim athuak ding a, nithum nia misi lak a kipan a thoukik ding mawng ahi,

⁴⁷Tualeh kisik na leh khialh ngaihdamna tuh amah min in Jerusalem a pat in namchin lak ah gen ahi ding.

⁴⁸Nou hih silte theihpihtu nahi uhi.

⁴⁹Ngaiun, ka Pa silchiam natung uah ka sawl ding hi; hinanleh tunglam a kipan a sil bawltheihna a thuam nahih masiah uh Jerusalem khuapi ah om kinken un,” achi hi.

⁵⁰Tualeh amauh Bethani tanpha in apaipih a, aban ajak a, amauh agualjawl a.

⁵¹Tualeh hichi ahung hi a, a gualjawl laitakin amauh apaisanta hi.

⁵²Tualeh amau`n amah abia ua, kipak mahmah in Jerusalem ah akileh kik ta uhi.

⁵³Tualeh Pasian tempul ah Pasian phat leh pahtawiin a omjingta uhi.