Read Thangal Naga LUKA 4 Bible Online

LUKA 4 - Thangal Naga bible

LUKA 4

¹Tuachi`n Jesu pen Khasiangthou a dim in Jordan lui a pat in akileh kik a gamdai ah kha puiin a om a.

²Ni sawmli sung setan khem in a omta a, tualeh huanite in bangmah ane kei a, atawp in agil ahung kialta hi.

³Setan in a kiangah, “Nang, Pasian Tapa nahihleh hih suang tanghou suak dingin thu piain,” achi a.

⁴“Hinanleh Jesu`n, ‘Mihing tanghou guak in ahing kei ding a, Pasian kam a thuchin pawt in ahingjaw ding, chih gelh ahi,’ ” chi`n adawng hi.

⁵Tuachi`n setan in mualsang tung ah a paipihtou a, tomnou khat sung in leitung kumpi gam jousiah a ensak a.

⁶Tualeh akiang ah, “Hih tengteng tung a thuneihna leh athupina kung pia ding, ka kiang a piak ahihtak jiakin, ka piaknuam taphot kiangah ka piajel hi.

⁷Tuajiakin, kei nungbiak leh aun in nang a ahi ding,” achi a.

⁸Jesu`n adawng a akiang ah, “Ka nunglam ah om in setan; ‘Toupa na Pasian nabia ding a; ama nna guak nasep ding ahi, chih gelh ahi!’ ” achi hi.

⁹Tuachi`n setan in Jerusalem ah apaipih a, tempul tungvum ah akoih a, akiang ah, “Nang, Pasian Tapa nahihleh hihsan a pan in kekhiasuk in.

¹⁰‘Aman nang hung humbit dingin a vantungmite thu apia ding a.’

¹¹‘Tuachi`n amau`n akhut un ahung nadom ding uh; atuachih keileh na keng in suang nasuihkha ding, chih gelh ahi,’ ” achi a.

¹²“Hinanleh Jesu`n adawng a akiang ah, ‘Toupa na Pasian ze-et ken, chih ahi,’ ” achi hi.

¹³Tuachia setan in akhemna ding teng a akhemzoh in hun lemtang a dingin apaisanta hi.

¹⁴Tuachi`n Jesu Kha silbawltheihna neiin Galili gam ah akileh kikta a; tualeh a tanchin hua gamkim jousiah ah athangsuak ta hi.

¹⁵Tuachi`n kikhopna inn ah thu ahilhjel a, mijousiah pahtawi in a omta hi.

¹⁶Tualeh akhanletna khua Nazareth a hungtungta a; a bawldan ngaina bang in khawlni-in kikhopna inn ah alut a sim dingin ading a.

¹⁷Tuachi`n a kiangah Jawlnei Isaiah laibu apia ua, tuachi`n aman tua laibu aphel a, hihthu kigelhna santak amu a:

¹⁸“Mi gentheite kiang a tangthupha gen ding a nungsawl jiakin, Toupa Kha ka tung ah a om hi. Aman lungtang khasiate damsak ding leh, saltangte kiang a suahtakna thu leh mittawte kiang a mitvak neihkikna thu leh bawlsiat thuakte pawtsakna ding

¹⁹Toupa lungkim kum thu gen ding in a hungsawl hi,” chih.

²⁰Tuachi`n laibu ajial a, nna sepsakpa kiangah a piakik a atouta hi. Tualeh kikhopna inn a om jousiah mit a tung ah atuta hi.

²¹Tuatakin aman akiang uah, “Tuni in hih Pasian Laisiangthou thu najak un a tangtungta hi,” achi hi.

²²Tuachi`n mijousiahin athu atheihpih ua, akam a pawt hehpihna thute lamdang asa mahmah uhi. Tualeh amau`n, “Hihpa Joseph tapa hilou amaw le?” achi uhi.

²³Tualeh aman akiang uah, “Nou hih thupil, ‘Daktor, nang leh nang ki damsak in,’ Kapernaum khua a na silbawl ka najak jousiah uh, hiah nangma khua lam ah zong bawl in, nungchi ngei ding uhi, achi hi.

²⁴Tuachiang in aman, Adiktak in kung hilh ahi, Jawlnei kuamah amah khualam ah kipahpih in a omngai kei.”

²⁵Hinanleh thutak kung hilh ahi: “Elijah damlai a kum thum leh khaguk van akikhak a leitung pumpi a kial nasatak atunlai in Israel gam ah meithai tampi a om uhi.

²⁶Hinanleh Sidon gam a Sarepta khua a meithainu khat kiang ah chihlouh alak ua kuamah kiang ah Elijah sawl ahi kei hi.

²⁷Tualeh Jawlnei Elisa damlaiin Israel gam ah phak tampi aom uh, hinanleh Sireami Naaman chihlouh kuamah suksiangthou in aom kei uh,” achi hi.

²⁸Tualeh kikhopna inn a omten hihthu ajak tak un aheh mahmah ua,

²⁹Tuachi`n a dingdok ua, amah khua a kipan in adelhdok ua, akhua gei kawl a sawnkhiat dingin apaipihta uhi.

³⁰Hinanleh amahpen mipite kawmkal ah akigelkhia a a paimangta hi.

³¹Tuachi`n Galili gam a khua khat Kapernaum ah ahung paisuk a, khawlni-in amauh thu ahilh hi.

³²Tualeh thunei tak a agen jiakin a thuhilhdan lamdang asa mahmah uhi.

³³Tualeh kikhopna inn sung ah dawiniin pai mi khat a om a, aw ngaihtakin akikou khia a,

³⁴“Kou guak in hung omsak in; Nazareth Jesu? Nang leh kou bang ahia bawlding ineih? Nang kua na hiam chih kungthei hi, Pasian Misiangthou na hi!” achi hi.

³⁵Tuatakin Jesu`n atai a, “Dai inla, asung a pat in hungpawt in!” achi a. Tuachi`n dawi in amah alai ua apuksak zoh in amah liamsak louin asung a pat in ahung pawtdok hi.

³⁶Tuatakin aun un lamdang asa mahmah ua, “Hih bangthu ahi a le? Thuneitak leh silbawlthei takin dawininte thu apia a, apawt uh!” chi in akihou ua.

³⁷Tuachi`n huakim gam munchin ah a tanchin athangta hi.

³⁸Tuachi`n amah kikhopna inn a pan a pawtkhia a, Simon inn ah apaita hi. Tualeh Simon sungnu nasatak in ana nattun a; tuajiakin amah a dingin ana ngetsak ua.

³⁹Tuachi`n Jesu amahnu geiah ading a, a nattun atai a, tuachi`n aphata hi; amahnu zong kintakin ahung thoukhia a, ana uh asepsak ta hi.

⁴⁰Tualeh nitumkuan ahunghih in natna tuamtuam a damlou nei jousiahin a kiangah ahung paipih ua; tuachi`n aman atung chiat uah akhut anga a, a damsakta hi.

⁴¹Tualeh dawininte zong, “Nang Krist, Pasian Tapa nahi, chia kikou in mi tampite sung a pat ahung pawtdok uhi!” Tuachi`n aman amauhte atai a, aham ding uh aphal kei hi; ajiak Krist ahi chih athei uhi.

⁴²Tuachi`n khua ahung vak in, apawt a gamdai mun ah apaita a, mipite`n amah a zong ua, a kiangah a hungpai ua, amauh apaisan louhna ding un tuk asawm ua.

⁴³Hinanleh aman akiang uah, “Khua dang ah zong Pasian gam tangthupha ka gen ding ahi; hua ding a sawl kahihman in,” achi hi.

⁴⁴Tuachi`n Galili gam a kikhopna innte ah athupuak ahilhjel hi. [4]