Read Thangal Naga LUKA 5 Bible Online

LUKA 5 - Thangal Naga bible

LUKA 5

¹Nikhat mipite`n Pasian thu ngai ding a aboh huthut laiun, Jesu Genesaret nawng geiah ading a.

²Nawng geiah gunkuang nih om amu a; hinanleh ngaman mite a gunkuang uh nusia a a ngente uh sawp in aom ua.

³Tuachi`n gunkuang lak a khat, Simon a pen ah atuang a, piaugei a pat themkhat kitawl deuh dingin a ngen a, tuachi`n atou a, mipite gunkuang sung a pat in thu ahilhta hi.

⁴Tualeh a thugen zoh in Simon kiangah, “Lithuklam naih unla nga man dingin na ngente uh khuh un,” achi a.

⁵Simon in adawng a akiang ah, “Siapa, jankhuavak in gimtak in ka pang ua, bangmah ka mankei uhi; hinanleh na thu in ngen ka khuh ding,” achi hi.

⁶Tualeh hih abawl jawh un nga tampi akhuhkha ua; a ngen uh akek diakdiak a.

⁷Tuatakin gunkuang dang a tou alawite uh hungpai a panpih dingin akhut jap a, amauh zong a hungpai ua, gunkuang tegel a sungdim ua, tuachi`n tum dingin akisahial ta hi.

⁸Simon Peter in hih a muhtak in, Jesu kengbul ah khupbok in, “Toupa! Hung paisan in, mikhial ka hi!” achi hi.

⁹A ngamat uh amah leh alawite`n lamdang asak mahmah jiak un.

¹⁰Tualeh Simon kithuahpih Zebedi tate Jakob leh Johan in zong lamdang asa uhi. Tuachi`n Jesu`n Simon kiangah, “Lauken; tu a pat in mihing naman ta ding,” achi hi.

¹¹Tuachi`n a gunkuangte uh luipiau a ahung tawldok zoh un, bangkim anusia ua amah ajuita uhi.

¹²Tualeh hichi ahung hi a, khuakhat a aom laiin, ngaiin, mikhat apumtang a phak in atuam aom a; Jesu amuhtak in amaiah a khupbok a, “Toupa, na ut leh nung siangsakthei hi!” chi`n a ngen a.

¹³Tuatakin Jesu`n akhut a tungah akoih a, “Ka ut hi,” “Siangthouta in!” achi a. Tuachi`n manlang takin aphakna in amah a nusiata hi.

¹⁴Tualeh aman, “Kuamah hilh ken, hinanleh pai inla siampute kiangah vakilak in; amauhte theihsakna dingin Mosi thupiak bang in kisiansuahna dingin sil valan in,” achi hi.

¹⁵Hinanleh a tanchin athang nasa jawsem a; tualeh mipi tamtak athu ngaikhia ding leh a natnate uh ki hihdamsak dingin a hungpai uhi.

¹⁶Tuachi`n amah gamdai ah a paituam a athumta hi.

¹⁷Tualeh nikhat hichi ahung hi a, thu ahilhlai in, Galili leh Judea gam khuachin leh Jerusalem a kipan-a hungpai Pharisaite leh dansiamte a kiangah atou ua, amauh damsakna dingin Toupa hihdam theihna akiang uah a om a.

¹⁸Tualeh ngaiin, mi`n jeng khat lupna in ahung jawng ua; tualeh amah a jawnglut theihna ding leh a koihtheihna ding a ngaihtuah ua.

¹⁹Hinanleh mipi jiakin jawnglut theih nang amu kei ua inntung ah akahtou ua, inntung phetvang in alaitak ah Jesu maiah alupna tawh a khaikhia suk uhi.

²⁰Tualeh aman aginna uh amuhtak in a kiangah, Mihing na khialhnate ngaihdam ahita hi, achi hi.

²¹Tuachi`n Laigelhmite leh Pharisaite`n, “Pasian gensia hihpa kua ahia! Pasian guak loungal kuan ahia hih khialhna ngaidam thei!” chi in a ngaihtuah ua.

²²Hinanleh Jesu`n angaituah uh athei a akiang uah, “Bang ahia na lungtang ua na ngaihtuah uh?

²³‘Na khialhnate uh ngaihdam ahita,’ chih leh, ‘Thou inla keng in paita in,’ chih khoipen abaihlam jaw ei? achi a.

²⁴Mihing Tapa in leitung ah khialh ngaidam theihna anei hi, chih na theihna ding un,” jeng a damloupa kiangah, “Thou inla na lupna la inla, na inn ah paita in kungchi ahi!” achi hi.

²⁵Tuachi`n amah a thoutoupai a, alupna la-in Pasian phat kawm in a innlam ah apaita hi.

²⁶Tuatakin amauhte`n aun un lamdang asa mahmah ua, Pasian a phat ua, “Tualeh tuni`n sillamdang takmai imu uh chi`n alau mahmah uhi!”

²⁷Tualeh hih silte tengteng zoh in apawt khia a, siah dawnna zum a tou amin Levi kichi siah dawngtu khat amu a; a kiangah, “Hung juiin,” achi a. [5]

²⁸Tuachi`n aman bangkim nusia in dingtou in anung ajuita hi.

²⁹Tuachi`n Levi in a inn ah Jesu a dingin ankuang luina thupitak anei a, hua ah siah dongtute tampi leh midang tampite`n a ankuang uh a umpih uhi.

³⁰Hinanleh a laigelhmite uleh Pharisaite a nungjuite tung ah aphun ua, “Bangding a siah dongte leh mikhialte tawh ne a dawnkhawm nahi ua?” achi ua.

³¹Tuatakin Jesu`n a dawng a akiang uah, “Mi chidamte`n daktor a poimoh kei ua, mi chinate`n a poimohjaw uhi.

³²Midiktatte sam ding a hungpai ka hikei a, mikhialte sam a kisiksak ding a hungpai ka hijaw hi,” achi hi.

³³Tualeh amauhte`n a kiangah, “Bangding a Johan nungjuite`n anngawl jel uh a, thumna aneijel ua, tualeh Pharisaite nungjuite`n zong huachimah bang in abawl ua, hinanleh nang nungjuite`n ne a dawn ahi ua,” achi ua.

³⁴Tuachi`n Jesu`n akiang uah, “Moupuite kiang a mouneipa a om laiin moupuite an na ngawlsak ngai uai le?

³⁵Hinanleh alak ua pat mouneipa lakmang hun ahung tung ding a, huani chiangin a ngawl ding uh,” achi hi.

³⁶Tuachi`n aman akiang uah, gentehna thu zong agen a, “Kuaman puanthak in puanlui aphawh ngaikei; phawhta henla hileh anih in akek ding a, tualeh athak them pen alui tawh akituak kei ding hi.

³⁷Tualeh kuaman uain thak savun thawllui ah akoih ngaikei, koihta henla hileh uainthak in savun thawlluipen apokjak sak ding a, a kibua ding, tualeh athol zong asia siang ding hi.

³⁸Hinanleh uainthak pen savun thawlthak a koih ding ahi, tuachi`n anih un abit ding uh! achi hi.

³⁹Mi kuaman uain lui adawn zoh nung un athak a duhpai ngaikei uh; ‘Aluimah limjaw,’ achi uhi.”