Read Thangal Naga LUKA 6 Bible Online

LUKA 6 - Thangal Naga bible

LUKA 6

¹Tualeh hichi ahung hi a, khawlni khat in buhleilai tuan in apaisuak a, a nungjuite`n buhvui asiktan ua, akhut ua nuaisiang in ane ua.

²Tualeh Pharisai kuate hiam in a kiangah, “Bangding a khawlni a bawl sianglou na bawl uh ahia?” achi ua.

³Tuachi`n Jesu`n adawng a, “David in agilkial laia asilbawl uh sim khalou nahi uh maw?

⁴Tuachia Pasian inn a alut a, siampite loungal nek sianglou tanghou alak a, anek a tualeh alawite kiang a zong apiakthu,” achi hi.

⁵Tualeh aman akiang uah, “Mihing Tapa hi khawlni Toupa ahi,” achi hi.

⁶Tualeh hichi ahung hi a, khawlni dang in kikhopna inn ah alut a, thu ahilh a, tualeh huasan ah mi khat khut jiatlam jeng ana om a.

⁷Tuachi`n laigelhmite leh Pharisaite`n ahekna ding a muhtheihna ding un, khawlni a a damsakleh a damsaklouh adap et ua.

⁸Hinanleh aman a ngaihtuah uh athei a, khutjawpa kiangah, “Thou inla alai ah dingdok in,” achi a, tuachi`n amah athou a, a dingdokta hi.

⁹Tuachi`n Jesu`n akiang uah, “Silkhat kung dong ding hi, khawlni a silhoih bawl ahia asiang sil hoihlou? Hundam ahia asiang hihlup?”

¹⁰Tuachiah akim a omte jousiah a en kawikawi a, khutjawpa kiangah, “Na khut zandok in,” achi a. Tuatakin aman azan a; akhut langkhat bang in adamta hi.

¹¹Tuatakin amauh ahehta mahmah ua, Jesu tung a abawl dan ding uh khat leh khat a kihouta uhi.

¹²Tualeh huahun laiin hichi ahung hi a, mual ah thum dingin apai a, Pasian kiangah jan khuavak in athum hi.

¹³Tualeh khua ahung vak takin a nungjuite asam a; alak ua pat sawmlehnih atel a, amin uh zong sawltakte ahisak hi.

¹⁴Simon (aman Peter zong achih) leh a sanggampa Andru, Jakob leh Johan, Philip leh Bartholomai;

¹⁵Mathai leh thoma, Alphai tapa Jakob, tualeh Simon (Zealot achih uh,)

¹⁶Tualeh Jakob sanggampa Juda, tualeh a mansakpa Juda Iskariot ahi uhi.

¹⁷Tuachi`n amauh tawh a kitonsuk a, munjang ah ading a, a nungjuite mi tampi leh Judea gam pumpi leh Jerusalem a kipan leh Tura leh Sidon lam a tuipi geia kipan mipi tampitak tawh, huate pen a thugen ngai ding leh a damlouh nate uh damsak ut in a hungpai ua.

¹⁸Tualeh khanin bawl gentheihte zong a hungpai ua a damsiangta uhi.

¹⁹Tualeh amah a kipan-a sil bawltheihna pawtkhia a miteng adamsak jel jiakin mipite`n aun un amah khoih atum uhi.

²⁰Tuachi`n a dakkhia a, a nungjuite en in agen a, “Nou migentheite na hampha uhi; van gam nou a ahihjiak in!

²¹“Nou tu a gilkialte na hampha uhi; tai ding nahihjiak un!” “Nou tu a kapte aw, na hampha uhi; nui ding nahihjiak un!”

²²“Mihing Tapa jiak a mi`n ahung huat ua, ahung pampaih ua, ahung phawk ua, namin uh ahoihkei chia ahung paihmang chiang un, na hampha uhi!

²³Hih ni-in kipak unla nuam in kidiang un, ngaiun, van ah na nuamman uh athupi jiakin. Huachi mah bang in napu napate un Jawlneite ana bawl uhi.

²⁴“Hinanleh nou mihausate tung agik hi; na khamuanna uh namuhtak jiak un!”

²⁵“Nou, tu a vahte aw, natung uh agik hi; nagil uh hungkial ding ahihjiak in!” “Nou tu a nuite aw, natung uh agik hi; lungkham a kap ding nahihjiak un!”

²⁶“Mijousiahin a hungphat chiang un natung uh agik hi; ajiak huachimah bang in apu apate un Jawlnei takloute tung ah ana bawl uhi.”

²⁷“Hinanleh nou ka thu ngaikhiate kiangah kung hilh ahi: Na melmate uh it unla, ahung mudahte limbawl un.

²⁸A hung hamsiatte vangbuak unla, ahung simmohte thumsak un.

²⁹Na pheta hung beksaktu kiangah alang khat zong doh in, tualeh na puantual uh hung laksaktu kiangah na puan-ak uh zong it kei un.

³⁰Na kiang a hung ngen jousiah kiangah pia unla, navan hung laksakpa kiangah ngenkik nawn kei un.

³¹Tualeh mi`n natung ua silhoih abawl ding nadeih bang un, nou zong amauh tung ah bawl un.

³²“Hinanleh nou hung itte guak na it uleh, pahtakna bang nalawh ding ua? Mikhial tenzong amauh itte a it uhi!

³³Tualeh natung ua hoihte tung guak a nahoih uleh pahtakna bang nalawh ding ua? Mikhial ten zong huachi bang in abawl uhi.

³⁴Tualeh muhkik na kinepna kiang guak a na batlaksak uleh pahtakna bang nalawh ding ua? Mikhialte`n zong azahmah mukik dingin mikhialte kiangah a batlaksak uhi!

³⁵Hinanleh nou na melmate uh it unla, hoih bawl un, bangmah muhkik kinem louin batlaksak un. Tuachi`n na nuamman uh a thupi ding a, Tungnungpen Tate na hi ding uhi; aman mi kipakdan theiloute leh mikhialte ahehpih hi.

³⁶Huajiakin napa uh mihehpih asiam mah bang in nou zong mihehpih siam un.

³⁷“Thu khen kei un, tuachi`n thu khensak in na omkei ding uh, mohpaih kei un, tuachi`n mohpaih in na omkei ding uh. Tualeh ngaihdam un tuachi`n ngaihdam in na om ding uhi.

³⁸Pia un, tuachi`n piak in na om ding uh, sawndet in, hentaak in, tualeh letjen in na angsung uah piak in na om ding uhi. Nou mauh tehna mah in tehsak in na om ding uhi.”

³⁹Tualeh aman akiang uah gentehna thu khat agen a, “Mittaw in mittaw khat a lamkaih theih ding maw? Anih un kuakhuk ah kiakhawm talou ding uh maw?

⁴⁰Nungjuimi pen a siapa tung ah aom ngaikei, hinanleh mi hoihtak a sinsak zoh chiangin asiapa bang in a omthei hi.

⁴¹“Tualeh bangding a nangma mit a singtun om mulou a, na sanggampa mit a ninthem om mu na hia?

⁴²Nangma mit a singtun om mulou pia na sanggampa kiang a, ‘Sanggampa na mit a ninthem om hung laksak ning,’ bangchia na chih ahia? Nang milepchiah! Namit a singtun om pen lakhia masa inla, tuahileh na sanggampa mit a ninthem om lakkhiat ding chiantak in na muthei ding hi.

⁴³“Ajiak ahihleh sing hoih agah asia ngai kei a, tualeh singsia zong gahhoih in agahngai kei hi.

⁴⁴Singchih agah ah kithei hi. Ajiak mi`n lingkung ah theipi alou ngai kei ua, tualeh lingnawk lak ah zong grep alou ngai kei uhi.

⁴⁵Mihoih in a lungtang goubawm hoih a kipanin silhoih ahung suahkhia a, tualeh migilou in a lungtang goubawm sia a kipanin sil hoihlou ahung suahkhia jel hi. Bangjiakin ahia ichihleh lungtang a dimlette akam in ahung gen hi.

⁴⁶“Tualeh noute`n ka gen bawllou pia bangding a, ‘Toupa’ hungchi nahi ua?

⁴⁷Kuahileh ka kiang a hungpai a, ka thugente ja a, tualeh juite bang chibang mi ahi ua kung ensak ding;

⁴⁸Amauhte pen innlammi thuktak tou a suangpi tung a suangphum lem tawh kibang ahi; tuachi`n tui ahung khang a tui hat in tua inn ahung khoh a ahihling jou kei, dettak a lam ahihjiak in.

⁴⁹Hinanleh za-ngal a juiloute pen suang phum loua, leitung maimai a innlam tawh kibang ahi; huapen tui hat in ahung khoh a, apukpai hi, tualeh hua inn siatdan anasia hi, achi hi!”