Read Thangal Naga LUKA 7 Bible Online

LUKA 7 - Thangal Naga bible

LUKA 7

¹Tualeh mipite jak a athugen tengteng azohkhit in Kapernaum khua ah alut a.

²Tualeh galkap zalamkai kuahiam sila deihtak achi ana a, asi dekdek a.

³Tuachi`n aman Jesu tanchin ajaktak in, akiang ah a hungpai a, a silapa damsak ding a ngen ding in Juda upate a kiangah asawl a.

⁴Tuachi`n amauhte Jesu kiang avatun un, “Amah hi bawlsak tak ahi.

⁵Ajiak ahihleh aman i mi nam uh a it a, tualeh ka kikhopna inn uh zong ama hung lamsak ahi,” chi`n hoihtak in a ngen ua.

⁶Tuachi`n Jesu amauh tawh a hungpaita a, tualeh inn a pat gamlalou ahungtun in, tua galkap zalamkaipa`n a silate a kiangah asawl a, “Toupa, kigimsak nuam dah maiin, ajiak ka innsung na lutna tak ahikei hi,

⁷tuajiakin kei zong na kiang a paitak in ka kingaihsun kei a, athu in genlechin ka silapa dammai ding ahi.

⁸Ajiak kei zong mi thunuai a om ka hi a, ka nuaiah zong galkapte a omsawn a. Khat kiangah, ‘Pai in!’ ka chihleh apai a, adang khat kiang ah, ‘Hung pai in!’ ka chihleh a hungpai a, tualeh ka silapa kiangah, ‘Hih bawl in!’ ka chihleh a bawljel,” achi hi.

⁹Jesu`n hihthute ajak takin amah lamdang asa mahmah a, a kinunghei a mipi amah juite kiang ah, na kiang uah kung hilh ahi, “Israelte lak ah zong hizahta a ginna lian ka mukha kei hi achi hi!”

¹⁰Tuachi`n hua amisawlte innlam ah apaikik ua, sila damlou a ompa pen dam in amuta uhi.

¹¹Tualeh huakhit in hichi ahung hi a, amah Nain khua kichi khat ah apaia, tualeh a nungjuite leh mi tamtak in ajui ua.

¹²Khuapi kongkhak gei a hungtun in, ngaiin misi khat ahung jawngdok ua, anu tapa neihsun ahi a, amahnu meithai ahi a, tualeh hua khua a mipi tampitak akiang ah aom uhi.

¹³Tualeh Toupa`n amahnu amuhtak in ahehpih mahmah a, tuachi`n a kiangah, “Kap ken,” achi a.

¹⁴Tuachi`n a hungpai a, ala`ng akhoih a, tuatakin ajawngtute adingta uhi. Tuachi`n aman, “Tangval! Thou in, kungchi ahi!” achi a.

¹⁵Tuatakin hua misi pen ahung thoukhia a, ahung hamta hi; tuachi`n aman amah anu kiangah a piakhiata hi.

¹⁶Tuatakin mi jousiah ahung lauta ua, Pasian apahtawita ua, “I lak uah Jawlnei thupitak ahung suakta!” Tualeh “Pasian in amite ahung vehta hi!” achi uhi.

¹⁷Tualeh hih a tungtang thu pen Judea gam pumpi leh akim akiang a gam jousiah ah a thangsuakta hi.

¹⁸Tualeh Johan nungjuite`n hihthu jousiah amah avahilh ua

¹⁹tuatakin Johan in a nungjuite lak a minih asam a, Jesu kiangah asawl a, “Hung paidingpa nahi hiam? Ahihkeileh midang na hungaihlai ding ka hi uh hiam?” chi in.

²⁰Tualeh akiang a hungtun un, “Baptispa Johan in ahung paidingpa nahi hiam? Ahihkeileh midang hungaih lailai ding ka hi uh hiam?” chia na kiang a ahung sawl ka hi uh, achi ua.

²¹Tualeh hualaitak in Jesu`n mi tampi, chinate hipi veite tualeh dawimatte adamsak a, tualeh mittawte mit asuk vaksak a.

²²Tuachi`n Jesu`n adawng a akiang uah, “Paikikta unla nasil muh uleh na jakte uh Johan vahilh un, bang chibang a mittawte mit hungvakta a, kengbaite ahung paitheita a, miphakte ahung siangthouta, bilbingte`n a hung jatheita a, misite kaihthoh in ahung omta a, tualeh tagahte kiangah tangthupha gen in a omta hi, chih.

²³Tualeh kuapeuh ka tung a lung hihmohna mulou pen ahampha hi!” achi hi.

²⁴Tualeh Johan misawlte apai nung un aman mipite kiang ah: “Bang en ding a gamdai a paikhia nahi ua? Pumpeng huih mutling maw?

²⁵Ahihkeileh bang en ding a paikhia nahi ua? Puannem silh maw? Ngaiun, puanthupi silh leh mi nuamsate pen kumpipate inn ah ahi aom uh!

²⁶Ahihkeileh bang pen en ding a pawtkhia nahi uhiam? Jawlnei maw? Ahi ka hungchi ahi, Jawlnei sang a thupi jaw ahi.

²⁷‘Ngaiin, ka kamtai namai ah ka sawl a, aman na maiah na lampi abawl ding, chih atanchin kigelh pen amah ahi.’ ”

²⁸“Numei suan lak ah baptispa Johan sang a thupijaw Jawlnei aom kei, hinanleh Pasian gam a neupen zong amah sang in a thupijaw hi, chih kung hilh ahi,” achi hi.

²⁹Tualeh athu jajousiah leh siah dongte`n Johan baptisma tang in Pasian siam atan uhi.

³⁰Hinanleh Pharisaite leh dansiam mite`n akiang ah baptisma tanglou in Pasian in amauh a ding a a lemguatsak pen anialta uhi.

³¹Tuachi`n Toupa`n, “Tulai khangthakte bang tawh kateh dia aw? Tualeh bangchi bang ahi ua?

³²Amauh ahihleh naupang van juakna mun a tou a, khat leh khat kikou tuah a, theile kung mutsak ua nalam kei ua! ‘Kung kah uleh zong nakap tuan kei ua; kichite bang ahi uhi!’

³³Bangjiakin ahia ichihleh, baptispa Johan pen anlah nelou uain lah dawnlou in a hungpai a, tuachi`n nou dawipai ahi nachi uhi.

³⁴Tualeh Mihing Tapa pen ne leh dawn in a hungpai a, tuachi`n nou, ‘En un! Anhaipa, uain haipa, siah dongte leh mikhialte lawmpa!’ na chijel uhi.

³⁵Hinanleh pilna pen ata tengteng in siam atan uhi,” achi hi.

³⁶Tualeh Pharisaite lak a khat in amah an anekpih ut a, tuachi`n amah Pharisaipa inn ah alut a, ankuang ah atouta a.

³⁷Tualeh ngaiin, hua khua a om mikhial numei khat in Jesu Pharisaipa inn ah anne in atou chih atheih in alabastar bawm in sathau namtui a hungtawi a.

³⁸Anung ah a kengbul ah kapkawm in ading a, a kengphangte a mittuiin a hihkawt a, a samin asiak a, a kengpek atawp a, sathau namtui anuh hi.

³⁹Tualeh Pharisai amah sampa in hua a muhtak in a lungsim in, “Hihpa Jawlnei ahihleh hih akhoihnu kua ahia, tualeh bang chibang mi ahiam chih theileh kilawm a, a mahlah mikhial ahi a!” achi hi.

⁴⁰Tuatakin Jesu`n adawng a akiang ah, “Simon, na kiang ah gennuam khat kanei hi,” achi a. Tuachi`n aman, “Siapa, gen in,” achi hi.

⁴¹“Sum batlaksaktu kuahiam khat in leibatu nih anei a, Khat in makhai ja nga aba a, tualeh khat in sawmnga.

⁴²Tualeh aditna ding aneihlouh tak un anih un a ngaihdam tuakta hi. Tuajiakin hunghilh in alak ua kuapen in amah a itjawdiak diam?” achi a.

⁴³Simon in adawng a, “A ngaihdam tamjawpa in hiding in ka ngaihsun achi a.” Tuachi`n aman, “Na chidik hi,” achi a.

⁴⁴Tuachiah amah numeinu lam anga a, “Simon kiang ah hih numeinu namu ei? Na innsung ah kung lut a, nang ka keng silna ding tui nungpia kei hi; hinanleh amahnu`n a mittui in ka kengpek asil a, asam in asiak hi.

⁴⁵Nang tawpzong nungtawp kei a, hinanleh numeinu`n ka hunglut a pat ka keng tawp akhawl naikei hi.

⁴⁶Nang ka lu sathau nungnuh kei a, hinanleh hihnu in, ka kengpekte sathau namtui ahung nuh hi.

⁴⁷Tuajiakin kung hilh ahi; a khialhna tampi ngaihdam ahita hi; a it mahmah jiak in; hinanleh ngaihdam tawm in a itna aneu hi,” achi hi.

⁴⁸Tualeh aman numeinu kiang ah, “Na khialhnate ngaihdam ahita hi,” achi hi.

⁴⁹Tualeh amah tawh ankuang a toukhawmte`n alungsim un, “Khialhnate zong ngaihdam hihpa kua ahia?” a kichi ua.

⁵⁰Tuatakin aman numeinu kiang ah, “Naginna in ahung hundamta hi, khamuang tak in paita in,” achi hi.