Read Thangal Naga LUKA 8 Bible Online

LUKA 8 - Thangal Naga bible

LUKA 8

¹Tualeh hichi ahung hi a, Jesu thuhilh kawm leh Pasian gam tangthupha gen kawm in khuapi leh khuata ah avak kawikawi a, sawmlehnihte a kiangah a om uhi.

²Tualeh numei kuate hiam, dawipai damkik leh natnate a pat damkik Mari Magdalini achih uh, a sung a pat dawi sagih pawtdoknanu tawh,

³tualeh Herod dangka kemtu Chuza zi Joanna tawh, Susana tawh, tualeh midang tampite tawh ahi ua, huaten aneihsa un a nna asepsak jel uhi.

⁴Tuachi`n mipi tampitak ahung kikhawm ua, khuachin a mi akiang a ahung pai tak un, gentehna thu agen a:

⁵“Khaichi thehpa a khaichi theh in akuan a; tualeh athehlai in khenkhat lamsik ah atu a, mi`n atuanchil a, tungleng vasaten anengaita uhi.

⁶Tualeh khenkhat suangtung ah atu a, apoutak in alei anawm louh jiakin avulpaita hi.

⁷Tualeh khenkhat loulingnei lak ah atu a, tuachi`n ling tawh a hung poukhawm a, adeplumta hi.

⁸Tualeh khenkhat leihoih ah atu a, ahung pou a, alehja in agahta hi,” achi a. Tualeh hihthute agen khit in akikou a, “Kuapeuh jakna ding bilnei jousiahin ja hen!” achi hi.

⁹Tuachi`n a nungjuite`n hih gentehna thu bang chihna ahia? chin amah adong ua.

¹⁰Tuachi`n aman, “Pasian gam thugukte noute theih ding phal ahina, hinanleh midangte kiangah gentehna guak a gen ahi; mujing ngala amuh louhna ding uleh, jajing ngala atheihsiam louhna ding un.”

¹¹“Hua gentehna thu ahihleh hih a hi: Buhchi pen Pasian thu ahi a.

¹²Lamsik a tute ahihleh thu jate ahi uh, tuachi`n dawimangpa a hungpai a, thu a lungtang ua pat a lamang hi, a gintat ua hundam a a omlouhna ding un.

¹³Suangtung ate ahihleh hichi bang ahi uh, azak tak un thu kipak takin apom ua; tualeh hihte`n jung anei kei ua, tomkhat sung agingta ua, khemna atuah chiang un apukjel uhi.

¹⁴Tualeh loulingnei lak a tute ahihleh thu jate ahi ua, ajak nung un apai ua, khawsak ding dan ngaihtuah nate, hausaknate tualeh damsung nopsaknate`n adep a, agah piching ngaikei hi.

¹⁵Hinanleh leihoih a tute ahihleh lungtang siangthou leh hoih in thu aja ua, apom ua, tualeh kuhkal tak a gah suangte ahi uhi.

¹⁶“Mi kuaman meivak adet chiangin kuang in a khuhngai kei, ahihkeileh lupna nuaiah zong a koihngai kei hi. Alut jousiahin vak a muhtheihna dingin meivak tunna ah akoihjaw hi.

¹⁷“Kilanglou ding a im bangmah aom kei a, tualeh theihlouh ding a kisel bangmah aom kei hi.

¹⁸“Tuajiakin bang chi`n ahia najak uh pilvang un, ajiak ahihleh kuapeuh aneite piak beh ahi ding a, tualeh kuapeuh aneiloute aneihsun zong laksak ahi ding hi,” achi hi.

¹⁹Tualeh anu leh a sanggamte a hungpai ua, hinanleh mipi jiakin akiang atungthei kei ua.

²⁰Tuachi`n, “Na nu leh na sanggamte nang hung munuam in inn pualam ah ading uh chi`n ahilh ua.”

²¹Tuatakin aman adawng a akiang uah, “Ka nu leh ka sanggamte ahihleh Pasian thu ngaikhia a juite ahi uh,” achi hi.

²²Tualeh hichi ahung hi a, nikhat a nungjuite tawh gunkuang ah ahung tou ua, aman akiang uah, “Nawng galkhat lam ah ipai ding uh achi a,” tuachi`n gunkuang phel in atawlta ua.

²³Tualeh a kitawl laiun amah a ihmuta a, tualeh tua nawng tung ah huihpi ahung langsuk a, a gunkuang uh tuiin adimta a, tuachi`n lauthawng huaitakin ahung omta uhi.

²⁴Tuatakin amauhte a kiangah ahung pai ua, aphong ua, “Siapa, Siapa! mangthang ding ka hita uh!” achi ua. Tuachi`n amah a hungthou a, huih leh tui kihot ataita a, tuachi`n atawp a, ahung daita hi.

²⁵Tuakhit in aman akiang uah, “Na ginna uh khoia om ahia?” achi a. Tuachi`n amauh lauin lamdang asa mahmah ua, “Hihpa bang chibang mi hi ahia? Huihte leh tui nasan thu apia a, athu amang uh!” achi ua.

²⁶Tuachi`n Galili gal a om Gadarate gam ahung tung ua. [6]

²⁷Tualeh amah gam a akaidok takin hun sawtpi dawinin pai kuahiam khat in khuapi a pat amah ana kituah pih a; tualeh aman puan asilh kei a, inn mawng mawng ah zong a om kei a, hanmual lak ah a omjel hi.

²⁸Tualeh aman Jesu amuh takin, a kikou a, amaiah apuk a, tuachiah aw ngaihtak in, “Jesu nang tungnung pen Tapa, kei leh nang bang bawlding nei ihia? Hung hihgim lou dingin kung ngen ahi!” achi hi.

²⁹Aman dawinin hua mipa sung pat a pawt ding a thu ana piaktak jiakin, tamveipi dawinin in ana mankhata a, sikkhau leh kol bulhsak in a omta a, tualeh aman a kikannate a phutan a, gamdai ah dawi delhmang in a om hi.

³⁰Tuachi`n Jesu`n akiang ah, “Na min bang ahia?” chi`n a dong a, “Aman, ‘Nuai,’ ” achi a; asung a dawi tampi lut ahihjiak in.

³¹Tualeh amau`n kawkhuk thukpi a paikik ding a thu pialou dingin akiang ah a ngen ua. [7]

³²Tualeh huamun ah vok-hon tampi ata ua, amau`n huate sung a alut phalsak dingin a ngen ua, tuachi`n aman aphalsak hi.

³³Tuatakin dawite hua mipa sung a pat a pawtkhia in vokte sung ah alut ua, vok honte nawnglam ah munken a pat a taisuk ua, tui valh in asita uhi.

³⁴Tualeh akhawite`n sil omdan amuhtak un atai ua, hihthu khuapi leh khua neu ah avagen uhi.

³⁵Tuatakin bang thu ata chia en ding in ahung pawt ua; Jesu kiang ahung tun uleh dawimatpa puansilh a, lungsim hoihtak pua a Jesu kengbul a tou amu ua, tuatakin alauta uhi.

³⁶Tualeh amauhte`n dawimatpa damsak a ahung omdante ana hilh ua.

³⁷Tuatakin Gadara gam kimvel a mi jousiahin alau mahmah jiak un amah akiang uapan paimang dingin a ngen ua; tuachi`n amah gunkuang sung ah alut a akik kikta hi.

³⁸“Tualeh a sung a dawi pawtnapa`n akiang a omden dingin a ngen a.” Hinanleh Jesu`n amah asawl khia a.

³⁹“Na inn ah paikik inla, Pasian in natung a bangchituk a silthupi hung bawlsak ata ale, chih vahilh in,” achi a. Tuatakin amah apaita a, Jesu`n sil thupitak amah ding a abawlsak khuapi pumpi ah a phuangjakta hi.

⁴⁰Tualeh hichi ahi a, Jesu ahung kinungleh kik in mipi`n amah kipak takin ana vaidawn ua, ajiak aun ua amah nangak jing ahi uhi.

⁴¹Tualeh ngaiin, pasal khat amin Jaira kichi kikhopna inn a vaihawmtu ahung pai a, Jesu kengbul ah a khupbok a a inn a hawhding in a ngen a,

⁴²ajiak aman tanu kum sawmlehnih vel pha khatguak anei a, amah laitat in alum a. Hinanleh Jesu apai takin mipi`n atuam lutlut ua.

⁴³Tualeh numei khat kum sawmlehnih sipawt, aneih jousiah daktorte kiang a joubeita, hinanleh kuaman adamsak zohlouh.

⁴⁴Anung ah a hungpai a, apuan mong akhoih a tuachi`n asipawt akangta hi.

⁴⁵Tuatakin Jesu`n, “Kua ahia ahung khoih?” achi a. Tualeh mi jousiahin kei hikeng achihchiat tak un, Peter leh alawite`n, “Siapa mi jousiahin hung tuam a, hungneh lutlut ua, kua ahia ahung khoih nachih,” achi ua.

⁴⁶Jesu`n, “Kua ahiam khat in ahung khoih hi, ajiak sil bawltheihna ka sung a pat in apawt hi chih kathei hi,” achi hi.

⁴⁷Tuachi`n numeinu`n akiphual theihlouh amuh takin, kithing kawm in a hungpai a, a maiah apuk a, mipi jousiah maiah a kiangah akhoihna san leh ahung dampai dan a phuangta hi.

⁴⁸Tuachi`n Jesu`n a kiang ah, “Tanu, khamuangtak in om in; naginna in ahung damsak ahi. Lungmuangtak in paita in,” achi hi.

⁴⁹Aman hichi a thu agenlai in kikhopna inn vaihawmtu inn a kipan in mikhat a hungpai a, “Na tanu asita hi, Siapa hihbuaidah maiin,” achi hi.

⁵⁰Hinanleh Jesu`n hih ajaktak in adawng a, a kiangah, “Lauken; gingta maiin tuachi`n amah adamdok kik ding,” achi hi.

⁵¹Tualeh innsung a aluttak in Peter tawh Jakob tawh Johan tawh tualeh naupang apa leh anu chihlouh kuamah lut aphal kei hi.

⁵²Aun un amahnu kah in ana mau vengvung ua, hinanleh aman, “Kap kei un; asi ahikei a ihmu ahijaw!” achi hi.

⁵³Amau`n amahnu asita chih atheih un amah anuihsan uhi.

⁵⁴Tualeh aman aun un a sawldok siang a, amahnu khut in atu a, “Nungak thou in!” chi`n asam a.

⁵⁵Tuatakin akha ahung paikik a, a thoukhiapai a, tuachi`n amahnu nek ding piading in thu apia hi.

⁵⁶Tuatakin anu leh apa`n lamdang asa mahmah ua; hinanleh hua sil kibawl pen kuamah hilhlou dingin aman amauh a khamta hi.