Read Thangal Naga LUKA 9 Bible Online

LUKA 9 - Thangal Naga bible

LUKA 9

¹Tuachi`n aman anungjui sawmlehnihte a samkhawm a, dawi jousiah tung a silbawltheihna leh thuneihna tualeh natnate damsak theihna apia a.

²Amauhte Pasian gam thu gen ding, damloute damsak dingin a sawlkhiata hi.

³Tualeh aman akiang uah, “Na zinna ding un chiang hiam, thungpi hiam, tanghou hiam, dangka hiam bangmah keng kei un; puan tungsilh zong nih keng kei un.

⁴Na lutna inn uah tungden unla, tualeh hua inn a kipanin paikhia un.

⁵Tualeh ahung kipahpih lou peuhmah pen hua khuapi a kipan-a na pawtdok chiang un amauh mawhpaihna dingin na kengpek ua leivui thingkhia un,” achi hi.

⁶Tuachi`n apaikhia ua, tangthupha genkawm in leh munchin a mite damsak in akhua akhua ah apaita uhi.

⁷Tuachi`n kumpipa Herod in a silbawl jousiah anaja a; alung buaita a, ajiak khenkhat in Johan ahung hingkik ahi achi ua.

⁸Khenkhat in Elijah ahung hingkik ahi, achi ua, tualeh midangte`n tanglai a Jawlneite khat a hung hingkik ahi achi uhi.

⁹Tualeh Herod in, “Johan lah a ngawng tanta ing a; hinanleh hichi bang a athu kajak hi kua ahi diam aw?” achi a. Tuachi`n amah muh a utta hi.

¹⁰Tualeh sawltakte`n ahung kinungleh un a silbawl jousiah uh amah ahilh ua, tuachi`n Jesu`n amauh apui a, Bethsaida kichi khuapi a gamdai munkhat ah apaituampih a.

¹¹Mipite`n tua atheihtak un amah ajui ua, tualeh aman amauhte ana kipahpih a, akiang uah Pasian gam thu ahilh a, damsak ngaite adamsak hi.

¹²Tualeh nitum kuan ahung hih in sawmlehnihte a hungpai ua a kiangah, “I kim ua khuapite leh gamte a paia giahna leh nek ding zong dingin mipite sawlkhia in, hihsan gamdai mun ahi,” achi ua.

¹³Hinanleh aman akiang uah, “Nou a nek ding uh pia un,” achi hi. Amau`n, “Mipi hizahpi nek ding i valeisak keileh tanghou nga leh nga nih guak chihlouh ngal, bangmah i neikei uhi?” achi ua.

¹⁴Ajiak amauh mi sangnga vel ahi uhi. Tuachi`n aman a nungjuite kiangah, “Sawmnga jel in ahawn hawn in tousak un,” achi a.

¹⁵Tuachi`n amau`n abawl ua, a tousakta uhi.

¹⁶Tuachi`n aman hua tanghou ngate leh nga nihte ala a, vanlam entou in agualjawl a, abalkek a a nungjuite kiangah mipite mai a lui dingin apia hi.

¹⁷Tuachi`n ane ua avahchiatta uh; tualeh anekval uh aneng lawh sawmlehnih aluak dim uhi.

¹⁸Tualeh hichi ahi a, amah guak a athum laiin a nungjuite a kiangah a om ua; aman akiang uah, “Mipite`n kei kua ka hi hungchi ua?” chi`n adong a.

¹⁹Amau`n adawng ua, “Baptispa Johan ahi,” a hungchi uh; “Hinanleh khenkhat in Elijah ahi a hungchi ua; tualeh adangte`n tanglai a Jawlneite lak a khat hung thoukik ahi, a hungchi uh,” achi ua.

²⁰Aman akiang uah, “Ahihleh nou kei kua ka hi nungchi ua?” achi a. Peter in adawng a, “Pasian Krist nahi,” achi hi.

²¹Tuachi`n aman hihthu kuamah hilhlou dingin akhamta hi.

²²“Mihing Tapa in sil tampi athuak ding a; upate, siampite, laigelhmite deihlouh in aom ding a, thah in aom ding, tualeh nithum ni`n kaihthoh in aom ding hi,” achi hi.

²³Tuachi`n aman amauhte tengteng kiangah, “Mi khatpeuh in kanung ajuih nuam leh amah kimanghilh in nisial a akross pua in hungjui hen.

²⁴Ajiak kuapeuh a hinna humbit ut in ata`n ding a, hinanleh keimah jiak a a hinna ta`n in a humbit ding hi.

²⁵Mi`n leitung pumpi nei henla, amah ki mangsak hiam ahihkeileh ki siatlawh in omtaleh! amah a dingin bang a phatuam dia?

²⁶Kuapeuh keimah leh ka thu jumpihte pen mihing Tapa in ama thupina tawh a Pa thupina tawh vantungmi siangthoute thupina tawh ahung pai chiangin amauh azumpih ding hi.

²⁷Hinanleh adiktak in kung hilh ahi, hihsan a dingte Pasian gam amuh masiah uh, sihna chiamlou ding aom uh,” achi hi.

²⁸Tualeh hichi ahung hi a, hihte agenzoh nung nigiat ding bang in aman Peter, Johan leh Jakob apui a mualtung ah thum dingin apai a.

²⁹Tualeh athum laiin amel omdan ahung lamdangta a, apuansilhte a hung vam a, ate-selhsawlh a.

³⁰Tualeh ngaiin, minih amah tawh akihou ua, huate Mosi leh Elijah ahi uhi.

³¹Amauh thupina a kithuam in akilak ua, Jerusalem khua a sihna ahihkim ding thu agen uhi.

³²Hinanleh Peter leh akiang a omte a ihmut uh asuak mahmah a, hinanleh a hunghalh tak un Jesu thupina leh akiang a ding minihte amuta uhi.

³³Tualeh hichi ahung hi a, akiang a kipan a paikhiat un Peter in Jesu kiangah, “Siapa, ei a dingin hihsan a om ahoih hi! Sawlbuk thum ilam ding a, nang a dingin khat, Mosi a dingin khat tualeh Elijah a dingin khat,” achi a; (A thugen zong theilou pi`n.)

³⁴Tuachia agen laiin meilum ahung kaia, amauh ahung khuh a, meilum lak a aluttak un alauta uhi.

³⁵Tualeh meilum lak a kipan aw ahung suak a, “Hih ka Tapa deihtak ahi, athu ngai un” chi in.

³⁶Tualeh aw adaihtak in Jesu guak amuta ua, tualeh a sipdide a, huahun laiin asilmuhte uh kuamah ahilh kei uhi.

³⁷Tualeh hichi ahung hi a, ajingni a mual a kipan ahung kumsuk un, mipi tampitak in amah ana dawn ua.

³⁸Tualeh ngaiin mipi lak a pat mikhat hung kikou in, “Siapa! kung ngen ahi, ka tapa en in; ka tapa neihsun ahihjiak in!

³⁹En in, khanin khat in aman a, thakhat khat in akikou khia a, tualeh chilphuan kaijen in a bawlgim jel a, nakpitak a sidup in a nusia jel hi.

⁴⁰Na nungjuite kiangah hawlkhia dingin ka ngen a, a delhdokthei kei uh,” achi hi.

⁴¹Jesu`n adawng a, “Ginna beite leh khangthak hilhhakte aw! Na kiang uah bangtan om a hung thuakpih ding ka hia?” “Na tapa hiah hung paipih in,” achi a.

⁴²Tualeh amah ahung pailai, dawi-in apuksak a a bawlgim hi. Tuatakin Jesu`n dawinin atai a, naupang adamsak a, apa kiangah apiata hi.

⁴³Tualeh aun un Pasian silbawl theihna thupitak tuh lamdang asa mahmah ua. Hinanleh michih in Jesu silbawl jousiah lamdang asak laiun aman a nungjuite kiangah,

⁴⁴“Hihthu kigente na bilsung uah lut heh; ajiak mihing Tapa mite khut a matsak a om ding ahi,” achi hi.

⁴⁵Hinanleh amau`n a thugen atheisiam kei ua, atheihlouh ding ua im ahihjiak in. Tualeh athugen amah adong ngam kei uhi.

⁴⁶Tuachi`n alak ua kua alianpen dia chih thuin kiselna ahung neita ua.

⁴⁷Jesu`n a lungtang ua a ngaihtuah uh athei a, naupang khat ala a, ageiah atousak a,

⁴⁸akiang uah, “Kuapeuh ka min a hih naupang kipahpih tuh kei hung kipahpih ahi, tualeh kei hung kipahpih tuh a hungsawlpa kipahpih ahi, nouteng lak a aneupen tuh alianpen ding ahi,” achi hi.

⁴⁹Tualeh Johan in adawng a, “Siapa, mikhat namin a dawite notdok kamu ua, ei ahung juihlouh jiakin ka khamta uhi,” achi a.

⁵⁰Jesu`n akiang uah, “Amah khamkei un,” “ajiak, ei hung doulou tuh eilam a pang ahi,” achi hi.

⁵¹Tualeh hichi ahung hi a, laktouh a aom ding hun a hungtun in, Jerusalem khua a pai ding in amai angat tinten a.

⁵²Amasang ah kamtai mi asawl a, tuachi`n amah napaiin amah ding a guatsa diam a nakoih dingin Samariamite khua khat ah alut hi.

⁵³Tualeh amau`n Jerusalem lam a paiding bang a amel alat jiakin amah ana kipahpih kei ua.

⁵⁴Tualeh a nungjuite Jakob leh Johan in hih atheihtak un, “Toupa, Elijah bawl bang in amauh kangmang dingin van a kipan in mei samkhialei hoih nasa diam?” achi ua.

⁵⁵Hinanleh amah a kihei a, amauh atai a, “Bang chibang lungsim puami nahih uh kitheilou nahi uh.

⁵⁶Ajiak mihing Tapa mite hinna hihsia ding a hungpai hilouin, hundam dingin hungpai ahijaw,” achi hi.

⁵⁷Tualeh hichi ahung hi a, lampi a apailai un mikhat in a kiangah, “Toupa napaina teng ah hung juining,” achi a,

⁵⁸Jesu`n a kiangah, “Si-alte`n kua anei ua, tungleng vasate`n zong bu anei uh; hinanleh mihing Tapa-in alu ngakna ding zong a neikei,” achi hi.

⁵⁹Tuachi`n aman midang khat kiangah, “Hung juiin,” achi a, hinanleh aman, “Toupa, kapa vavui masa phot ning,” achi a.

⁶⁰Jesu`n a kiang ah, “Misi-in amisi uh kivui uhen, hinanleh nang pai inla Pasian gam thu vagen in,” achi hi.

⁶¹Tualeh midang khat in zong, “Toupa hungjui ning; hinanleh ka inn a mite kampha in hung khasak masa phot in,” achi a.

⁶²Jesu`n a kiang ah, “Mi kuapeuh langkawn tukawm a nunglam en pen Pasian gam mi hitak ahi kei,” achi hi.