Read Thangal Naga JOHAN 10 Bible Online

JOHAN 10 - Thangal Naga bible

JOHAN 10

¹“Adiktak in kung hilh ahi: kuahileh kong a lutlou a, lamtuam a kah a belam huang a lut pen guta leh suamhat ahi.

²Hinanleh kuapeuh kong a lut pen belampu ahi.

³Amah kong ngakpa`n ana honsak a; belamte`n a aw aja uh, tualeh a belamte amin un asam a, a pawtkhiatpih jel hi.

⁴Tualeh belamte apawtkhiat sak chiangin amai uah apai a, belamte`n anung ajui uh, a aw atheih jiak un.

⁵Midang ahihleh ajuikei ding ua; a taimangsan jaw ding uh; midangte aw atheihlouh jiak un,” achi hi.

⁶Hih gentehna thu Jesu`n akiang uah agen a; hinanleh amau`n akiang ua bangthu ahia agen chih atheikei uhi.

⁷Tuachi`n Jesu`n akiang uah, “Adiktak in kung hilh ahi: Kei belam kongkhak ka hi.

⁸Ka maia hungpai jousiah gutate leh suamhatte ahi uh; hinanleh belamte`n athu uh angai kei uh.

⁹Kei kongkhak ka hi; kuapeuh keimah a alut leh hundam in a om ding, tualeh lut in apawt ding a, nek ding amu ding hi.

¹⁰Guta ahihleh gu ding leh that ding leh bawlsia ding loungal in a hungpai kei; kei ka hih leh amau`n hinna aneihna ding uleh tampitak a aneihna ding ua hungpai ka hi.

¹¹“Kei belampu hoih ka hi; belampu hoih in a belamte dingin ahinna apia hi.

¹²Hinanleh kilawh, belampu taklou, belamte amah a hilouin ngia hungpai amuh in belamte a nusia a, ataisan jel; tualeh ngia in amauh aman a, athehjak hi.

¹³Kilawh ahi a, belamte a ding a deihsakna mawng mawng aneihlouh jiakin a taimangsan jel hi.

¹⁴Kei belampu hoih ka hi, ka belamte ka thei a, amau`n zong kei ahung thei uhi.

¹⁵Pa in kei a hungtheih mahbang in, ken zong Pa ka thei hi; tualeh belamte dingin ka hinna ka pia hi.

¹⁶Tualeh hih belam huang a hilou belam dang ka nei hi; amauh zong kung paipih ding a ka aw aja ding uh; tualeh honkhat in aom ding ua belampu khat tawh.

¹⁷“Tuajiakin ka Pa in ahung it hi, lakkik ding a ka hinna ka piak jiakin.

¹⁸Kei a pat kuaman ahung laksak ahi kei a, hinanleh ka thu in kapia ahijaw hi. Piak theihna leh lakkik theihna thu ka nei hi. Hih thupiak ka Pa a pat kamuta hi,” achi hi.

¹⁹Hih thute jiakin Judate lak ah kikhennate a omkik ta hi.

²⁰Tualeh alak ua mi tampite`n, “Dawipai ahi! Amaw ahi! Bang ding a athu ngaikhia nahi ua?” achi ua.

²¹Adangte`n, “Hih thute dawipaimi thugen ahi kei! Dawi in mittaw mit a vaksakthei ngel ei?” achi ua.

²²Tualeh Jerusalem a kipum apna ankuang luilai ahi a, phalbilai ahi.

²³Jesu hih innlim ah Solomon inlim ah avak kawikawi a,

²⁴tuachi`n Judate`n a im ua akiang ah, “Bangtan ahia lung awpkai a nung koih ding? Krist nahihleh chiantakin hunghilh in?” achi ua.

²⁵Jesu`n amauh adawng a, “Kunghilhta a nagingta kei uh; ka Pa min a ka nasepte`n ahung theihpih uhi;

²⁶hinanleh na kiang ua ka genta`k mah bangin ka belam lak a mi na hihlouh jiak un na gingtakei uhi.

²⁷Ka belamte`n ka aw aja uh, ken amauh ka thei hi; tualeh amau`n ahung jui uhi.

²⁸Tualeh ken akiang uah tangtawn hinna kapia hi, tangtawn in a mangthang kei ding ua, kuaman ka khut a pat ahung tuhkhiathei kei ding uhi.

²⁹Ka Pa amauh hung piapa mi jousiah sang in alianjaw hi, kuaman ka Pa khut a pat ahung tuhkhiathei kei ding hi.

³⁰Kei leh ka Pa khat ka hi uh,” achi a.

³¹Tuachi`n Judate`n adenna ding suang ala ua.

³²Jesu`n akiang uah, “Nasep hoih tampi ka Pa a kipan nou kung musak a, hua nate lak ah khoipen jiakin ahia suang a nungden sawm uh?” achi a, a dong a.

³³Judate`n adawng ua, “Nasep hoih jiakin suang in den kungsawm uh ahikei a; hinanleh Pasian nagensiat jiak leh nang mihing hi chin a Pasian bang a na kibawl manin ahijaw!” achi ua.

³⁴Jesu`n akiang uah, “Pasian in, ‘pasiante nahi uh,’ achi, chih gelh hilou maw?

³⁵Pasian thu tunnate bawn pasiante chih ahihleh, Pasian Laisiangthou lah suksiat theih hilou a.

³⁶Pa in aguat, leitung a asawlpa tung ah, Pasian Tapa ka hi ka chihjiak in Pasian nagensia nungchi uh ahi maw?

³⁷Ka Pa nasepte kasep kei leh hung gingta kei un.

³⁸Hinanleh kasep a ahihleh kei hung gingta kei nanle uchin zong ka nasepte bek gingta un,” achi hi.

³⁹Tuajiakin amah mat asawm kik ua, hinanleh akhutte ua pat apawt a.

⁴⁰Tuachi`n Jesu Johan in baptis abawlna mun Jordan gal ah a paikik a, huasan ah ava omta hi.

⁴¹Tuachi`n mipi tampi a hungpai ua, “Johan in sillamdang bangmah bawl anei kei a, hinanleh hihpa tungtang Johan in agen adiksiang hi,” achi ua.

⁴²Tuachiah huasan ah mi tampi`n amah agingta uhi.