Read Thangal Naga JOHAN 11 Bible Online

JOHAN 11 - Thangal Naga bible

JOHAN 11

¹Tualeh mi khat, Mari leh a sanggamnu Martha tenna khua Bethani khua a om, amin Lazar kichi achii ana a.

²A sanggampa Lazar chi-na nu pen Toupa sathau namtui nuh a, asam a akeng siaknu Mari ahi.

³Tuajiakin a sanggamnute`n Jesu kiangah, “Toupa, ngaiin, na itpa achina hi,” chi`n kamtai mi asawl ua.

⁴Jesu`n hihthu ajaktak in, “Hih natna pen sihna ding hial ahi kei a, hinanleh hihjiak a Pasian thupina ding ahijaw, Pasian Tapa hihjiak a bawlthupi ahihtheihna dingin,” achi hi.

⁵Jesu`n Martha leh a sanggamnu leh Lazar a it a.

⁶Tuajiakin a chi-na chih ajak in, a omna mun mah ah ninih aom nalai hi.

⁷Tuachi`n a nungjuite kiangah, “Judea gam ah i paikik ding uh,” achi a.

⁸A nungjuite`n a kiangah, “Rabbi, tu madeuh in Judate`n suang in ahung den sawm ua, huasan a pai nasawm kik maw?” achi ua.

⁹Jesu`n adawng a, “Sun khat sung a dakkal sawmlehnih a om hilou maw? Mi kuapeuh sun a avak leh a kisuihkha ngai kei, hih leitung vak amuh jiakin achi hi.

¹⁰Hinanleh mi kuapeuh jan a avak leh a kisuihkha jel hi, amah a vak a omlouh jiakin.”

¹¹Hih thute aman agen a, tuazoh in akiang uah, “I lawmpa Lazar a ihmuta, hinanleh a ihmutna a pan thousak dingin ka pai ding,” achi hi.

¹²Tuachi`n a nungjuite`n, “Toupa, a ihmu ahihleh adam kik na ding,” achi ua.

¹³Jesu`n asih thu agen ahi a, hinanleh amau`n ihmu a tawldam thu gen hi in a ngaihtuah uhi.

¹⁴Tuachi`n Jesu`n chiantakin akiang uah ahilh a, “Lazar asita hi.

¹⁵Tualeh nou jiak a huasan a ka omlouh ka kipak hi, na gintak theihna ding un, hitaleh zong a kiangah ipai ding uh,” achi a.

¹⁶Tuachi`n Thoma, (Didum) kichipa`n a nungjui hihpihte kiangah, “Amah tawh isihkhawm theihna dingin ei zong ipai ding uh!” achi hi. [4]

¹⁷Tuachi`n Jesu a hungtun in amah han ah nili ana omta chih ahung thei a.

¹⁸Bethani hi Jerusalem khuagei naih, melnih a gamla ahi a,

¹⁹tualeh Judate tampi Mari leh Martha kiangah, a sanggampa uh sihna tung a amauh hehnem dingin a hungpai ua.

²⁰Tualeh Martha in Jesu hungpai chih ajak takin, apai a, amah ana dawn a, hinanleh Mari innsung ah atou nalai hi.

²¹Tualeh Martha in Jesu kiangah, “Toupa hihsan a om hilechin ka sanggampa silou ding hi a!

²²Hinanleh tu in zong Pasian kiang a nanget taphot Pasian in ahung pia ding chih ka thei hi,” achi hi.

²³Jesu`n amahnu kiangah, “Na sanggampa athoukik ding hi,” achi hi.

²⁴Martha in a kiangah, “Nitawpni chiang a misite thohkikni chiangin a thoukik ding chih ka thei hi,” achi a.

²⁵Jesu`n amahnu kiangah, “Kei thohkikna leh hinna ka hi. Kuapeuh kei hung gingta tuh sinanleh zong ahing ding hi;

²⁶tualeh hing a hung gingta jousiah bangmah chik in asi ngai nawn kei ding hi, hih nagingta ei?” achi a.

²⁷Amahnu`n a kiangah, “Hi, Toupa! Nang Krist, Pasian Tapa, leitung a hungpai dingpa nahi chih ka gingta hi,” achi hi.

²⁸Martha in hih agenkhit in apai a, a sanggamnu Mari aguk in ava sam a. “Siapa a hungpai a, ahung sam hi,” achi a.

²⁹Amahnu`n tua ajaktak in kintakin athou a, akiang ah a hungpai a.

³⁰Jesu khuasung a hungtung naikei a, Martha in ava dawnna mun ah aom nalai hi.

³¹Tuachi`n Judate innsung a amah hehnem a amah tawh omten Mari kintak a thou a pawtkhia amuh un, han a kap dingin apai chi`n anung ajui ua.

³²Tuachi`n Mari-in Jesu omna mun a hungtun a, amah amuh in, a kengbul ah apuk a, akiang ah, “Toupa, hihsan a om hilechin ka sanggampa silou ding hi a!” achi a.

³³Tualeh Jesu`n Mari kap leh amah tawh hungpai Judate zong kap a om amuh takin a lungtang akhoih mahmah a, a mangbangta a.

³⁴Tualeh aman, “Amah khoia nasial uh ahia?” achi a. Amau`n akiang ah, “Toupa hungpai inla en in,” achi ua.

³⁵Jesu akapta.

³⁶Tuachi`n Judate`n, “En un, it na tazen e!” achi ua.

³⁷Khenkhat in, “Hihpa mittaw mit hihvak sakpa`n silousak theilou adiai?” achi ua.

³⁸Tuachi`n Jesu a lungsim a na sakik kawm in han ah a hungpai a, han pen suanghawm ahi a, suang a net ahi.

³⁹Jesu`n, “Asuang lakhia un!” achi a. Misipa sanggamnu Martha in, akiang ah, “Toupa tu injaw a uihta ding ajiak asihna nili ahita hi!” achi a.

⁴⁰Jesu`n amahnu kiangah, “Na gintat a ahihleh Pasian thupina namu ding, na kiangah chilou ka hi hiam?” achi hi.

⁴¹Tuachi`n amau`n misi omna pat suang alakhia ua, tualeh Jesu`n vanlam a entou a, “Pa, ka thu na ngaihkhiat jiakin natung ah ka kipak hi.

⁴²Tualeh nung ngaikhia gige chih zong kathei hi, hinanleh kakim a ding mipite jiakin hih kachi ahi, Nangman nungsawl chih agintat na ding un,” achi a.

⁴³Tuachia agenzoh in aw ngaihtak in, “Lazar hung pawtkhia in!” chi`n aki kou a.

⁴⁴Tuatakin misi pen akhut akeng hanpuan a kituam in ahung pawtdok a; amai kinawtna puan a tuam ahi a. Jesu`n akiang uah, “Phel unla, paisak un,” achi hi.

⁴⁵Tualeh Mari kiang a hungpai leh Jesu sillamdang bawl mu Judate tampi in Jesu agingta ta uhi.

⁴⁶Hinanleh khenkhat Pharisaite kiang ah apai ua, Jesu silbawlte avahilh uhi.

⁴⁷Tuachi`n siampite leh Pharisaite`n vaihawmtute a samkhawm ua, “Bang ilawh ding uai? Hihpa`n sillamdang tampi abawl hi!

⁴⁸Hih bang a amah guak i omsak uleh, mi jousiahin amah agingta ding ua, tualeh Rommite a hungpai ding ua, imun leh ichi leh namte ahung laksak ding uh!” achi ua.

⁴⁹Tualeh alak ua mi khat Kaiapha achih un, hua kum a siampi ahi a, akiang uah, “Bangmah na theikei uh!

⁵⁰Inam pumpi amanlouh na ding a mipi tang a mikhat sih ei a dingin ahoih chih zong na ngaihtuah kei uh?” achi a.

⁵¹Hihpen aman ama phuahtawm a agen ahikei a, hua kum a siampi ahi a, hua namte tang a Jesu asih ding agen kholhna ahi hi.

⁵²Tualeh hua namte guak hilou in, Pasian ta kitheh jakte jousiah pawlkhat a akaihtheihna dingin zong ahi.

⁵³Tuachi`n huani a pat in amah thahna ding ngaihtuah in a kihou jingta uhi.

⁵⁴Tuajiakin Jesu Judate lak ah a langtang in avak nawn kei a, hinanleh hua a kipan in gamdai naihlam ah Ephraim kichi khuapi khat ah apai a, huasan ah a nungjuite tawh a omjingta uhi.

⁵⁵Tualeh Judate paikan ankuang luina ahung naita a, mi tampite gam a kipan in a kisiansuah dingin Jerusalem ah paikan ankuang luima in apai tou ua.

⁵⁶Tuachi`n amau`n Jesu azong ua, Pasian tempul ah dingkawm in aki hou ua, “Bangchi`n na ngaihtuah ua? Ankuang luina a hungpailou ding adiam?” achi ua.

⁵⁷Siampite leh Pharisaite`n amah amat theihna ding un, mi kuapeuh in a omna atheihleh agenkhiat ding ahi, chih thu apiata uhi.