Read Thangal Naga JOHAN 12 Bible Online

JOHAN 12 - Thangal Naga bible

JOHAN 12

¹Tuachi`n paikan kut ni masang niguk in Jesu`n misi lak a akaihthou Lazar omna Bethani khua a hungtung a.

²Huasan ah amah a dingin nitak an abawl ua, Martha in nek abawl a, hinanleh Lazar amah tawh ankuang ompihte lak a khat ahi.

³Tuachi`n Mari-in spaiknard sathau namtui man tamtak bawm kimkhat ahung tawi a, Jesu keng anuh a, asam in akengte asiak a, tualeh sathau gim in innsung a dimta hi.

⁴Hinanleh nungjuite lak a khat amah mansak dingpa Juda Iskariot Simon tapa in,

⁵“Bangding a hih sathau namtui makhai zathum a juak a, mi gentheite kiang a piajaw lou uh ahi?” achi a.

⁶Hihpen aman mi gentheite akhuatuah jiak a hihthu gen ahi kei a, guta ahi a, dangka-ip a kem a, tualeh asung a kikoih a lak jel jiakin agen ahijaw hi.

⁷Hinanleh Jesu`n, “Amah guak in nusia un! Ka kivuini chiang a dingin aman hih akoih ahi.

⁸Mi gentheite ahihleh na kiang uah a omjing ua, kei pen na kiang uah ka om gige kei ding,” achi hi.

⁹Tuachi`n Judate`n amah huasan ah aom chih atheita ua; Jesu guak hilou in misi lak a pat akaihthoh Lazar zong amuh nuam jiak un a hungpai ua.

¹⁰Hinanleh siampite`n Lazar zong athah theihna ding un akihou ua,

¹¹ajiak amah jiakin Judate tampi a paimang ua, Jesu agingta uhi.

¹²Ajingni in ankuang luina a hungpai mi tampi in Jesu Jerusalem ah hungpai ding ahi chih ajaktak un.

¹³Tumnahte atawi ua amah dawn dingin apawtkhia ua, tualeh, “Hosanna! Toupa min a hungpai Israel kumpipa a hampha hi!” chi`n aki kou ua.

¹⁴Tuachi`n Jesu`n sabiltung nou khat amu a, atung ah atuang a, hichi a gelh bangin:

¹⁵“Lauken, Zion tanu! ngaiin, na kumpipa sabiltung nou tung a tuangin a hungpai hi,” chih.

¹⁶Hih silte nungjuite`n atu`ng in a theikei uh, hinanleh pahtawi a aom nungin hih thute amah tungtang a kigelh ahi a, tualeh atung ah hih silte abawl uhi chih ahung theikhiata uhi.

¹⁷Tuajiakin hihsan a pat Lazar asap khiat leh misi lak a pat akaihthoh lai a akiang a omten athu a theihpih uhi.

¹⁸Hih jiakin mipite`n zong hih sillamdang abawl chih ajak jiak un amah ana lamtuah uhi.

¹⁹Tuachi`n Pharisaite a kikou ua, “Bangmah nalawh theikei uh chih nathei uai! En un, leitung mite`n amah ajuita uh!” achi uhi.

²⁰Tualeh ankuang luina a hungpaite lak ah Grikmi kuate hiam zong a om uh a.

²¹Amauh (Galili gam a Bethsaida khua a om) Philip kiang ah a hungpai ua, “Pu, Jesu muh ka ut uh chi`n a ngen ua.”

²²Philip a hungpai a, Andru a hunghilh a, tualeh Andru leh Philip in Jesu ahilh ua.

²³Hinanleh Jesu`n amauh adawng a, “Mihing Tapa pahtawi a aom na`ng hun a tungta hi.

²⁴Adiktak in kung hilh ahi: buh tangkhat leia akiat a, asih kei leh amahtang in a omjing hi; hinanleh asihleh tampi in agah jel hi.

²⁵Kuapeuh hinna it in ata`n ding a, tualeh kuapeuh hih leitung a ahinna hua in tangtawn hinna dongin akembit ding hi.

²⁶Kuapeuh in kana asep ut leh hung jui hen; ka omna ah ka silapa zong a om ding ahi; mi kuapeuh in kana asep leh ka Pa in a kipahpih ding hi.

²⁷“Tu in ka kha a mangbang hi; tualeh bang ahia ka gen ding? ‘Pa, hihhun lak ah hung hundam in ka chiding hiam’? Hinanleh hihding a hungpai lah ka hi ngal a.

²⁸Pa, na min pahtawi in!” achi a. Tuachi`n van a pan in aw khat a hungsuak a, “Ka pahtawita a, tualeh ka pahtawi kik ding hi,” chi in.

²⁹Tuajiakin mipi akiang a ding leh hih jate`n, “Van ging ahi!” achi ua.

³⁰Hinanleh Jesu`n adawng a akiang uah, “Hih aw pen kei jiak a hungsuak ahi kei a, hinanleh nou a ding a hung suak ahijaw hi.

³¹Tu in hih leitung vaihawm lai ahi a, tu in hih leitung vaihawmtu paihkhiat ahi ding hi.

³²Tualeh kei pen leia pat a khaikang a ka om leh mi jousiah ka kiangah ka hip ding hi,” achi hi.

³³Hihpen aman bangchi bang sihna in ahia asih ding chih theihsakna a agen ahi.

³⁴Mipite`n adawng ua, “Krist ahihleh tangtawn in a omjing ding chih ka dan uapat kaja uh, bang chidan a nang mihing Tapa khaikang a om ding ahi, nachih ahia? Hih Mihing Tapa kua ahia?” achi ua.

³⁵Tuachi`n Jesu`n akiang uah, “Hun tomnou khat vak nalak uah aom ding hi, vak naneih laiun vak ah khuasa un, atuachih keileh mial in ahunglap ding hi. Kuapeuh mial a khuasa in khoilam apai chih atheikei hi.

³⁶Vak naneih laiun vak gingta un, vak tate na hung hihtheihna ding un,” achi a. Hih thute Jesu`n agen a, tualeh apawt a, amauh ua pat a kibuta hi.

³⁷Hinanleh amai uah sillamdang tampi bawl nanleh amah agingta tuan kei uhi.

³⁸Jawlnei Isaiah in: “Toupa, ka thugen uh kua ahia agingta? Tualeh Toupa khut zong kua kiangah ahia a kilak?” chia agen ahung tangtun theihna ding in.

³⁹Tuajiakin agingta thei kei uh, ajiak Isaiah in:

⁴⁰“Aman amit ua amuh theihlouh na ding un amit uh asuk tawtsak a, tualeh a lungtang ua a theihsiam theihlouh na ding un, a lungtang uh asuk khauhsak hi; ahung kihei kik ua, kana sukdam kik louhna dingin,” achi kik hi.

⁴¹Hih thute pen Isaiah in a thupina a muhlai a agen ahi a, tualeh a tungtang thu agenna ahi.

⁴²Ahihhang in vaihawmtu lamkaite lak ah zong tampi in amah agingta ua, hinanleh Pharisaite jiakin amah aphuang khia ngam kei ua, atuachih keileh kikhopna inn a pat nawhdok in a omkha ding uhi.

⁴³Ajiak amau`n Pasian kipahpih a om sang in mihingte phat a om adeih jaw uhi.

⁴⁴Tuachi`n Jesu a kikoukhia a, “Kuahileh kei hung gingta tuh kei hung gingta ahikei a, a hungsawlpa gingta ahijaw hi.

⁴⁵Tualeh kuahileh kei hung mu tuh kei hungsawlpa mu ahi.

⁴⁶Vak ding a leitung a hungpai ka hi a, kuahileh kei hung gingta te miala a omlouh na dingin.

⁴⁷Mi kuapeuhin ka thugente ja in gingta kei nanle uh zong, ken siamlouh ka tangsak kei; ajiak leitung siamlouh tangsak ding a hungpai ka hikei a, leitung hundam ding a hungpai ka hijaw hi.

⁴⁸Kuapeuh kei hung deihlou a, ka thugente zong sanglou in siamlouh tangsak khat anei hi, ka thugente mahmah in nitawp ni chiangin amah siamlouh a tangsak ding hi!

⁴⁹Ajiak keima phuahtawm in ka gen kei a, hinanleh Pa, a hungsawlpa`n ka gen ding leh ka hilh ding thu a hungpia hi.

⁵⁰Tualeh a thupiak ahihleh tangtawn hinna ahi chih ka thei hi; tuajiakin ka gen ding jousiah Pa in ka kianga agen bangin ka genjel hi,” achi hi.