Read Thangal Naga JOHAN 16 Bible Online

JOHAN 16 - Thangal Naga bible

JOHAN 16

¹“Lungkia a na om louhna ding un hih thute na kiang uah ka gen ahi.

²Kikhopna innte ah ahung notpot ding ua; ahi, kuapeuh nou hung that in Pasian tung a silhoih bawl in aki ngaihtuah ding uh, huachibang hun a hungtung ding hi.

³Tualeh Pa leh kei ahung theihlouh man un, hih silte natung uah a bawl ding uhi.

⁴Hinanleh ahun a hungtun chiang a huate kung hilhta chih na theihdokna ding un hih silte nou kung hilh ahi. Na kiang ua ka om jiakin hih thute atungin na kiang uah ka gen kei hi.

⁵“Hinanleh tuin pen a hungsawlpa kiang a pai ding ka hi a; hinanleh kuamah in khoi a pai ding na hia? chi`n nung dong kei uhi.

⁶Hinanleh hih thute na kiang ua ka gen jiakin na lungtang uh lunggimna in adimta hi.

⁷Hinanleh thutak kung hilh ahi; ka paimang nou a dingin ahoih hi; ajiak ka paimang keileh Khamuantu na kiang uah a hungpai kei ding hi; ka pai leh na kiang uah kung sawl ding hi.

⁸Amah a hungpai chiangin khialhna thu ah, diktatna thu ah tualeh vaihawmna thu ah leitung adiklouh dan atheisak ding hi.

⁹Khialhna thu ah siamlouh a tangsak ding, kei a hung gintatlouh jiak un;

¹⁰diktatna thu ah siamlouh a tangsak ding, ka Pa kiang a pai a nungmuh nawnlouh ding jiak un;

¹¹vaihawmna thu ah siamlouh a tangsak ding, hih leitung lal vaihawm sak a aom tak jiak in.

¹²“Na kiang uah gen ding thu tampi kanei nalai a, hinanleh tuin na puajou naikei uh.

¹³Bangteng hileh thutak Kha a hungtun chiangin, aman nou thutak tengteng ah ahung lamkaih ding; ajiak ama phuah thu in thu a genkei ding a, hinanleh ajak taphot agenjaw ding; tualeh sil hungtung dingte ahung musak ding hi.

¹⁴Aman kei a hung pahtawi ding; ajiak keimah a ala ding a, nou ahung musak ding hi.

¹⁵Pa silneih jousiah kei a ahi; tuajiakin keimah a ala ding a, nou ahung musak ding, ka chi ahi.

¹⁶“Tomkhat nou kei nung mukei ding uh a, tualeh tomkhat zoh in nou kei nung mukik ding uh, Pa kiang a kapai ding jiakin,” achi hi.

¹⁷Tuachi`n a nungjuite khenkhat in, “Tomkhat nou nung mukei ding uh, tualeh tomkhat zoh in nou kei nung mukik ding uh, ‘Pa kiang a kapai ding jiakin,’ ikiang a achih bang achihna ahia? chi`n aki hou ua.

¹⁸Tuajiakin amau`n hih a thugen ‘tomkhat,’ achih bang achihna ahia!” achi ua.

¹⁹Tualeh amah a dong nuam uh chih Jesu`n athei a, akiang uah, “ ‘Tomkhat nou kei nung mukei ding ua, tualeh tomkhat zoh chiang nou kei nung mukik ding uh,’ chi-a ka gen naki dongtuah uh maw?

²⁰Adiktak in, adiktak in kung hilh ahi: nou nakap ding ua na sun ding uh; hinanleh leitung a kipak ding; nou na lungkham ding ua; na lungkhamna uh kipakna asuak ding hi.

²¹Numei anau in apehlai in a lungkham a, ahun atuntak jiakin; hihnanleh nau asuahzoh takin a lungkhamnate athei nawn kei hi, mihing khat leitung a ahung pian kipakna jiakin.

²²Tuajiakin tulaitak in lungkhamna nanei uhi, hinanleh nou kung mukik ding a, na lungtang uh akipak ding; tualeh na kipahna uh kuaman ahung laksak kei ding hi.

²³“Tualeh huani chiangin nou bangmah nung ngen kei ding uh, adiktak in kung hilh ahi, kamin a Pa kiang a na nget uh khat peuh Aman ahung pia ding hi.

²⁴Tutan in kamin in nou bangmah na ngen naikei uh; ngen un, namu ding uh, na kipak uh a kimna ding in.

²⁵“Hih thute ahem in na kiang uah ka gen hi; hinanleh ahem a na kiang ua thu gennawnlou a, Pa tungtang chiantak a kung theihsak ding hun tung ding ahi ta.

²⁶Huani chiangin kamin in nung ngen ding uh; nou dingin Pa ka ngen ding chi ka hikei hi,

²⁷ajiak nou kei nung it ua, tualeh Pa a kipan a hungpai ka hih na gintak jiak un Pa amah in zong nou ahung it hi.

²⁸Pa a kipan a hung paikhia a, leitung a hungpai ka hi, tualeh leitung nusia a Pa kiang a paikik ding ka hi,” achi hi.

²⁹A nungjuite`n akiang ah, “Ngaiin tuin ahem in nagen kei a, chiantak in nagenta hi.

³⁰Tualeh tuin pen sil bangkim nathei a, kuamah in ahung dok na kiphamoh kei chih ka theichianta uh; hih jiakin Pasian a kipan a hungpai nahi chih ka gingta uhi,” achi ua.

³¹Jesu`n amauh adawng a, “Tuin na gingta uh maw?

³²Ngai-un, a hun a hungtung ding; ahi, tuin zong a tungta, michih na inn chiat uah na kikhenthang ding ua; keiguak in nung nusia ding uh; hinanleh Pa ka kiang a aom jiakin keiguak ka hikei hi.

³³Keimah a khamuanna naneih na ding un hih thute na kiang uah ka gen ahi. Leitung ah thuakgimna nanei ding uh; hinanleh kipaktak in om un ken leitung ka zouta hi!” achi hi.