Read Thangal Naga JOHAN 17 Bible Online

JOHAN 17 - Thangal Naga bible

JOHAN 17

¹Hih thute Jesu`n agen a, tualeh vanlam nga in adak a, “Pa, ahun a tungta, na Tapa pahtawi in, na Tapa in zong nangmah ahung pahtawi theihna dingin.

²Tualeh nangmah in akiang a napiak jousiahte tangtawn hinna apiak theihna ding a mi jousiah tung a thuneihna napiak bangin.

³Tualeh hih ahi tangtawn hinna, nang Pasian diktak guak leh nasawl Jesu Krist atheih uh.

⁴Leitung ah namin ka pahtawita, bawl ding a nung piak nna kasem jouta hi.

⁵Pa aw! Tuin leitung omma a na kiang a kaneih pahtawina in nang mah kiang ah hung pahtawi in.

⁶“Leitung a kipan a nung piakte kiang ah namin ka langsakta hi. Amauh nang a ahi a, nang kei nungpiak ahi; tualeh nathu ajuita uhi.

⁷Nang ka kiang a nungpiak jousiah nangmah a kipan ahi chih atheita uhi.

⁸Ajiak nang thu nung piakte akiang uah ka pia a, amau`n zong asangta uh, tualeh chiantak in nang a kipan a pawt ka hi chih atheita ua, nung sawl ahi chih agingta ta uhi.

⁹“Amauh a dingin ka ngetsak hi. Leitung a dingin ka ngetsak kei a, nang nungpiakte a dingin ka ngetsakjaw hi; ajiak amauh nang a ahi uhi.

¹⁰Tualeh keia jousiah nang a ahi a; nang a jousiah kei a ahi; tualeh amau uah pahtawiin ka om hi.

¹¹Tuin kei leitung ah ka omsawt nawn kei ding, hinanleh hihte leitung ah a om ding uh, kei na kiangah hung pai ding ka hi. Pa siangthou! Ei pumkhat ihih mahbang a amauh zong pumkhat a hihtheihna ding un, nang nungpiakte na min in kem in.

¹²Leitung a amauh tawh ka omsung in na min in amauh kakem a, Pasian Laisiangthou tangtun theihna dingin mangthang tapa loungal khatbek a mangthang kei uhi.

¹³Tuin na kiang ah hungpai ding ka hita, tualeh amau ua ka kipahna abukim theihna dingin hih silte leitung ah ka gen ahi.

¹⁴Na thu leitung ah ka piata a, leitung in amauh ahua hi; kei leitung a ka hihlouhjiak a amauh zong leitung a ahihlouh jiak un.

¹⁵Amauh leitung a kipan a lamang dingin kung ngen kei a, hinanleh migiloupa a pat a veng ding in kung ngen ahijaw hi.

¹⁶Amauh leitung a ahi kei uh, kei leitung a ka hihlouh mahbang in.

¹⁷Na thu in amauh susiangthou inla; na thu thutak ahi.

¹⁸Kei leitung a nungsawl mahbang in ken zong amauh leitung ah kasawl hi.

¹⁹Amauh jiakin kaki hihsiangthou hi.

²⁰“Hihte guak a dingin kungngen kei a, hinanleh athujiak ua kei hung gingta dingte a dingin zong kung ngen hi.

²¹Pumkhat ahihtheihna ding un; Pa, nang keimah a na om a, kei nangmah a ka om mahbang a amauh zong eimah a pumkhat ahihtheihna ding un; tualeh nang nungsawl chih leitung in agintat theihna ding un.

²²Tualeh nang nung piak thupina amauh ka piata hi; ei pumkhat ihih bang a amauh zong pumkhat ahih theihna ding un:

²³Kei amauh ah, nang kei ah, pumkhat a mauh hih bukim a aom theihna ding un; tualeh nang nungsawl a, kei nung it bangin amauh na it chih leitung in atheihna ding un.

²⁴“Pa aw! Nang kei nung piakte zong ka omna a kei tawh om dingin ka deih hi; nung piak thupina a muhtheihna ding un; ajiak nang leitung pianma pek in kei nung it hi.

²⁵Pa diktak aw! Leitung in nang ahung theikei a, hinanleh ken kungthei hi; tualeh nang nungsawl ahih hihte`n atheita uhi.

²⁶Tualeh akiang uah namin ka theisakta a, ka theisakjel ding; keimah nung itna akiang uah a omtheihna ding leh, kei amauh ua ka omtheihna dingin,” achi hi.