Read Thangal Naga JOHAN 18 Bible Online

JOHAN 18 - Thangal Naga bible

JOHAN 18

¹Jesu`n hih thute agen khit in a nungjuite tawh apawt ua, Kidron luiguam akan ua; huasan ah huan khat aom a, hua-ah a nungjuite tawh alut uhi.

²Tualeh Jesu a nungjuite tawh hualam a avakjel jiakin, a mansakpa Juda in zong huamun athei a.

³Tuachi`n Juda in siampite leh Pharisaite a pat galkap pawl leh miman lamkaite zohpih in, meivakte leh meiselte leh galvante tawiin huasan ah a hungtungta hi.

⁴Tuajiakin Jesu`n atung a sil tung ding jousiah thei in apawtkhia a, akiang uah, “Kua ahia nazon uh?” achi hi.

⁵Amau`n adawng ua, “Nazareth Jesu”, achi ua. Jesu`n akiang uah, “Kei ka hi”, achi a. Tualeh a mansakpa Juda zong akiang uah ading hi.

⁶Tualeh akiang ua keimah ka hi achih takin anungtawn ua, leiah apuk uh hi.

⁷Tuachi`n aman, “Kua ahia nazon uh?” chi`n adong kik a. Amau`n, “Nazareth Jesu,” achi ua.

⁸“Jesu`n adawng a, keimah ka hi chi`n kung hilhta; tuajiakin kei hung zong nahih uleh hihte paisak un,” achi a.

⁹“Nang nung piakte khat zong ka mansuah kei,” chia aman agen a tangtun theihna dingin.

¹⁰Tuachi`n Simon Peter in namsau khat aneih adokkhia a, siampi silapa asat a, abil jiatlam a satkhiat sak hi. Silapa min Marka ahi.

¹¹Tuachi`n Jesu`n Peter kiangah, “Na namsau apaiah siat in! Ka Pa`n nou a hungpiak tuh dawnlou ding ka hi hiam?” achi hi.

¹²Tuachi`n galkap pawlte leh a lamkaite uleh Judah lamkaite`n Jesu a man ua, ahen uh a,

¹³a masapen in Anna kiang ah a zohpih ua, amah huakum a siampi a pang Kaiapha sungpa ahih jiakin.

¹⁴Tualeh Kaiapha pen mipite tang a mikhat sih ahoih hi, chia Judahte kiang a hilhpa ahi.

¹⁵Tualeh Simon Peter in Jesu ajui a, tuachimah bangin nungjui dangte`n zong ajui hi; tua nungjuipa pen siampi meltheih ahi a, siampi huang sung ah Jesu tawh alut khawm a,

¹⁶hinanleh Peter apualam ah kongkhak bul ah ading hi. Tuachi`n nungjui dang siampi meltheihpa ava pawt a, kongkhak ngaknu kiang ah agen a, Peter ahung lutpih hi.

¹⁷Tuachi`n sila kongkhak ngak nungaknu in Peter kiang ah, “Nang zong hihpa nungjuite lak a khat hilou na maw?” achi hi. Aman ka hikei achi hi.

¹⁸Tualeh silate leh lamkaite huasan ah ading ua, avot jiakin suang meihol atoh ua a awi uhi. Tualeh Peter zong amauh tawh ding khawm in mei a awi hi.

¹⁹Tualeh siampi-in a nungjuite tungtang leh a thuhilhna tungtang adong a.

²⁰Jesu`n adawng a, “A langtang in leitung ah thu ka gen a, Judahte omkhawm jingna kikhopna inn leh tempul ah thu ka hilh jing hi. Aguk in bangmah ka gen kei hi.

²¹Bangding a kei hungdong nahia? Akiang ua bang ka gen ka thugen jate kiang ah dongin, amau`n ka gen athei uhi,” achi hi.

²²Tualeh hihbang thute agenzoh in akiang a ding lamkai khat in akhut in Jesu abeng a, “Siampi huachi bangin na dawng maw!” achi a.

²³Jesu`n adawng a, “Thu gilou ka genleh, agitlouhna hung theisak in; hinanleh ahoih ka genleh bangding a hung beng nahia?” achi a.

²⁴Tuachi`n Anna in amah kansa in siampi Kaiapha kiang ah asawlta hi.

²⁵Simon Peter in dingin mei a awi a, tuajiakin amau`n akiang ah, “Nang zong nungjuite lak a khat hilou namaw?” achi ua. Aman aki theihmoh bawl a, “Ka hikei,” achi a.

²⁶Tualeh Peter in abil asatkhiat sakpa sanggam siampi silate khat in, “Huan ah amah tawh na omkhawm uh hungmu hilou ka maw?” achi a.

²⁷Tuachi`n Peter in, “Ka hikei,” chi`n a kitheihmoh bawl kik a, tuachi`n ak akhuang paita hi.

²⁸Tuachi`n amau`n Jesu Kaiapha inn a pat in vaihawmna inn ah apaipih ua; jingsan matak ahi a; hinanleh amauh vaihawmna innsung ah alutkei uhi; atuachih keileh aki hihnin kha ding ua, paikan ankuang a umthei kei kha ding uhi.

²⁹Pilat akiang uah a hungpawt a, “Hih hekna bang ahia naneih uh,” achi a.

³⁰“Amah mi gilou hikeileh na kiang ah hung piakhialou ding ka hi uh,” achi ua.

³¹Tuachi`n Pilat in akiang uah, “Paipih unla, nadan dungjui un athu vaihawmsak un,” achi hi. Tuajiakin Judahte`n akiang ah, “Kou kuamah thahtheihna ding dan ka neikei uhi,” achi ua.

³²Hih ahihleh bangchi bang a asih ding thu Jesu`n agen a tangtun theihna dingin ahi.

³³Tuachi`n Pilat vaihawmna innsung ah alut kik a, Jesu asam a akiang ah, “Judate kumpipa namaw?” achi a.

³⁴Jesu`n adawng a, “Hih nangmah lungsim a hungsuak nagen ahia ahihkeileh midang in ka tungtang thu ahih a hunghilh ahia?” achi a.

³⁵Pilat in adawng a, “Kei Judami ka hi hiam? Na chipihte leh siampite`n nang ka kiangah ahung piakhia ahi; bang ahia nabawl tak?” achi hi.

³⁶Jesu`n adawng a, “Ka kumpi gam hih leitung ah ahikei, ka kumpi gam hih leitung ah hitaleh Judahte khut ah piakkhiat ka hihlouhna dingin ka silate`n adou ding uhi. Hinanleh ka gam pen hih ahi naikei hi!” achi hi.

³⁷Tuajiakin Pilat in akiang ah, “Ahihleh kumpipa na hi hiam?” achi a. Jesu`n adawng a, “Kumpipa, na chihpen mah ka hi. Tualeh hih ding a piang ka hi a, tualeh thutak theihpih ding a leitung a hungpai ka hi. Kuapeuh thutak a om taphot in ka aw aja uhi,” achi hi.

³⁸Pilat in akiang ah, “Thutak bang ahia?” achi a. Tualeh hihthu agenzoh in Judate kiangah apawt kik a, akiang uah, “Amah ah diklouhna bangmah ka mukei hi.

³⁹Hinanleh paikan ankuang luini a mikhat kung khahsak ding ahi chih tawndan khat nanei uh; tuajiakin Judate kumpipa hung khahkhia leng na ut uai?” achi a.

⁴⁰Tuachi`n aun un akikou ua, “Hihpa hilou in! Barabba pen!” chi in. (Barabba ahihleh suamhatmi ahi.)