Read Thangal Naga JOHAN 20 Bible Online

JOHAN 20 - Thangal Naga bible

JOHAN 20

¹Nipikal ni masapen in, jingsang baihtak khuamial nalai in, Mari Magdalini han ah avapai a, tualeh han a kipat suang ki lakhia in amuta a.

²Tuachi`n atai a Simon Peter leh nungjui dang Jesu`n a itpa kiangah a hungpai a, akiang uah, “Han a kipat in Toupa a lamangta ua, khoisan a akoih uh ka theikei uh!” achi hi.

³Tuachi`n Peter a pawtkhia a, nungjui dang tawh han lam juanin a hungpai ua.

⁴Tuachi`n ataituak ua, nungjui dang in Peter a makhelh a han a hungtung masa hi.

⁵Tualeh aman kun in a en a, puan malngat om amu a, ahihhang in asung ah alut kei hi.

⁶Tuachi`n Simon Peter in a nung ah ahungjui a, hansung ah alut a, puan malngatte amu hi.

⁷Tualeh a lutuamna kinawtna puan pen puanmalngat tawh omkhawm lou a atuam a munkhat a kijial a om amu hi.

⁸Tuachi`n nungjui dang hantung masapen zong asung ah alut a, tualeh amu a, ataksanta hi.

⁹Ajiak amau`n misi lak a kipan a thoukik ding ahi chih Laisiangthou athei naikei uhi.

¹⁰Tuachi`n nungjuite amauh inn lam ah a paikikta uhi.

¹¹Hinanleh Mari pen han pualam ah ading a; tualeh akah pum in akun a, hansung a en a.

¹²Tualeh Jesu luang kisialna mun ah puanngou silh vantungmi nih khat alukhung ah khat a khekhuantaw ah tou in amu hi.

¹³Tuachi`n amau`n akiang ah, “Numei bangding a kap nahia?” achi ua. Amahnu`n akiang uah, “Ka Toupa a lamangta ua, tualeh a koihna uh ka theihlouh jiakin!” achi hi.

¹⁴Tuachia agenzoh in a kinunghei a, Jesu ding amu a, hinanleh Jesu ahi chih atheikei hi.

¹⁵Jesu`n amahnu kiang ah, “Numei bangding a kap nahia? Kua ahia nazon?” achia hi. Amahnu`n huan vengpa sa in akiang ah, “Hihsan a pat amah na puakmang ahihleh na koihna hunghilh in, tuachi`n amah ka la ding,” achi hi.

¹⁶Jesu`n amahnu kiangah, “Mari!” achi a. Amahnu akihei a akiang ah Hebrai ham in “Rabboni!” achi a, (Huapen “Siapa” chihna ahi hi.)

¹⁷Jesu`n amahnu kiang ah, “Hungtu ken, ajiak ka Pa kiangah ka paitou naikei hi, hinanleh ka sanggamte kiangah pai inla, akiang uah ka Pa, na Pa uh, tualeh ka Pasian, na Pasian uh kiangah paitou ding ka hi chi in vahilh in,” achi hi.

¹⁸Mari Magdalini a hungpai a, Toupa amuh thu leh hih silte akiang ah agen hi chih ahilhta hi.

¹⁹Tuachi`n tuani mah nipikal ni masapen nitak in Judate lau jiak a nungjuite omna kongte kikhak nungin Jesu ahung pai a, akiang uah, “Na kiang uah khamuanna om hen,” achi a.

²⁰Tuachia achih zoh in akhutte leh anak akiang uah alah a. Tuachi`n nungjuite`n Toupa amuh tak un a kipakta uhi.

²¹Tuachi`n Jesu`n akiang uah, “Na kiang uah khamuanna om hen. Ka Pa`n kei a hungsawl mahbang in ken zong nou kungsawl hi.”

²²Tuachi`n hih thu aman agen zoh in, atung uah ahu akhahkhum a, akiang uah, “Khasiangthou tangta un.

²³Kua khialhna zong na ngaihdam taphot uh ngaihdam ahi ding a, kua khialhna zong na ngaihdam louh taphot uh ngaihdam louh ahi ding,” achi hi.

²⁴Hinanleh Thoma, Didum a kichi, sawmlehnihte lak a khat, Jesu hungpai laiin akiang uah a om kei a; [8]

²⁵Tuajiakin nungjui dangten akiang ah, “Toupa ka muta uh!” achi ua. Hinanleh aman akiang uah, “Akhut a sikkilhna mapawnte ka muh a, sikkilhna sunga ka khutzung ka guan a, tualeh anak a ka khut ka guan keileh ka gingta kei ding,” achi hi.

²⁶Tualeh nigiat nungin nungjuite innsung ah aom kik ua, Thoma zong akiang uah a om a; kongkhakte khak hinapi`n Jesu a hungpai a, alai uah ahung ding a, “Na kiang uah khamuanna om hen,” achi a.

²⁷Tuachi`n aman Thoma kiangah, “Na khutzung in hungsawk inla, ka nak sawk in; gingta lou in om kenla, gingta mai in!” achi hi.

²⁸Thoma in adawng a akiang ah, “Ka Toupa leh ka Pasian!” achi a.

²⁹Jesu`n akiang ah, “Thoma, nang nungmuh jiak a na gintat ahi a; mulou a gingtate ahampha uhi!” achi hi.

³⁰Tualeh hih laibu a kigelhlou sillamdang tampi Jesu`n a nungjuite maiah abawl hi.

³¹Hinanleh hihte nou Jesu pen Krist, Pasian Tapa ahi chih na gintak na ding uleh na gintat jiak ua amin a hinna naneih na ding ua kigelh ahi.