Read Thangal Naga JOHAN 3 Bible Online

JOHAN 3 - Thangal Naga bible

JOHAN 3

¹Pharisaite lak a mi amin Nikodem kichi Juda vaihawmtu khat a om a.

²Amah jan in Jesu kiangah a hungpai a, a kiangah, “Rabbi, Pasian akipan a siapa ding a hungpai nahi chih kung thei uhi. Ajiak Pasian akiang a aom keileh na sillamdang bawlte kuaman a bawlthei kei ding,” achi hi.

³Jesu`n adawng a akiang ah, “Adiktak in adiktak in, kung hilh ahi: mi kuapeuh apianthak keileh Pasian gam amukei ding hi,” achi a.

⁴Nikodem in a kiangah, “Mi atek nung in bangchi`n a piangthei dia? Anu sung ah nihvei lut in a piangthei ding maw!” achi a.

⁵“Adiktak in, kung hilh ahi, mi kuapeuh tui a leh kha a apianthak keileh Pasian gam alutkei ding hi.

⁶Sa-a piang taphot sa-a ahi a, Kha-a piang taphot Kha-a ahi.

⁷Na pianthak ngeingei ding ahi na kiang a kungchih lamdang saken.

⁸Huih a utna na ah alang a, agin naja hi, hinanleh khoia kipan a hungpai ahia, khoilam a pai ding ahia chih na theikei. Kuapeuh Kha-a piangte tuachi bang ahi,” achi hi.

⁹Nikodem in adawng a, akiang ah, “Hihsilte bangchi`n ahithei dia?” achi a.

¹⁰Jesu`n adawng a, akiang ah, “Israelte siapa nahi a hih silte theilou nave maw?

¹¹Adiktak in kung hilh ahi: kou ka theih uh ka gen ua ka muh uh ka theisak uhi; hinanleh ka thu theihsak uh nasang kei uhi.

¹²Leitung silte kung hilh bawn gingtalou nahih uleh van lam silte hung hilh leng bang chi`n na gingta ding ua?

¹³Van a pat a hung kumsuk mihing Tapa van a om chihlouh kuamah van ah akah ngai naikei hi.”

¹⁴Tualeh Mosi-in gamdai a gul akhai kang mahbang in mihing Tapa zong khaikang in aom ding hi,

¹⁵kuahileh amah gingta in mangthang lou a khantawn a hinna aneih jawkna ding un.

¹⁶Ajiak Pasian in hih leitung a it mahmah a, tuachi`n a Tapa tang neihsun apia hi, tuachia kuahileh amah gingtate mangthang lou a tangtawn hinna a neizawkna ding un.[2]

¹⁷Leitung siamlouh tangsak dingin Pasian in a Tapa a sawlkei, leitung amah jiak a hundam a hihtheihna dingin a sawljaw hi.

¹⁸Kuahileh amah gingtate siamlouh tansak in aom kei ding a, hinanleh a gingtaloute pen siamlouh tansak khit ahi ta, Pasian Tapa tangkhat min a gintatlouh jiak in.

¹⁹Tualeh hih siamlouh tanna ahi, vak leitung ah a hungpai a, hinanleh mi`n vak sang in mial a itjaw uh, a silbawlte uh agitlouh jiak in.

²⁰Ajiak kuahileh silgillou bawl in vak ahua ua, tualeh vak ah zong apai nuam kei uhi; atuachih keileh a silbawl uh alang kha ding.

²¹Hinanleh kuahileh sildik bawlte pen vak ah ahung pai ua, a silbawlte uh Pasian jiaka bawl ahi chih alattheihna ding in.

²²Hih silte zoh in Jesu a nungjuite tawh Judea gam ah a hungpai ua, huasan ah amauh tawh aom jing a, tualeh a baptis hi.

²³Tualeh Johan in zong Salim gei Ainon ah a baptis a, huasan a tui atamjiak in, tualeh amauh a hungpai ua, baptisma atang uhi.

²⁴Ajiak huahun laiin Johan thong ah aki khum naikei hi.

²⁵Tuachi`n Johan nungjuite leh Judate kikal ah ki siansuahna thu ah kinialna ahung omta a.

²⁶Tualeh amauhte Johan kiangah a hungpai ua, akiang ah, “Rabbi, Jordan gal a na kiang a om, a tanchin na theihpih pa`n, ngaiin, huapa`n baptisma a tangsak a, mijousiah a kiangah a hungpai uh!” achi ua.

²⁷Johan in adawng a, “Van a kipan a piak ahihkeileh mihing in bangmah a bawlthei kei.

²⁸‘Kei Krist ka hikei a, ama-a sawl ka hijaw chih nou mahmah in nung theihpih uhi.’

²⁹Mouneipa pen mou pasal ahi a, hinanleh mouneipa lawmpa, akiang a ding a athu ngaikhia tuh mouneipa aw jiakin akipak mahmah ding hi. Tuajiakin hih ka kipahna abukimta hi.

³⁰Amah akhangtou semsem ding a keipen ka kiamsuk semsem ding hi.”

³¹Tunglam a kipan a hungpaipa pen mi jousiah tung a ahi a; leia piangjaw leimi ahi, tualeh leithu agen hi, van a kipan a hungpaipa pen mijousiah tung a ahi.

³²Tualeh amuh leh ajakte aman a theisak jel hi, kuaman athu theihsak a taksan kei uhi.

³³Kuahileh athu theihsak taksan in Pasian midik ahi chih akipsak hi.

³⁴Ajiak Pasian sawl in Pasian thu agen hi; Pasian inlah a kiangah Kha teh sese in apia kei hi.

³⁵Pa in Tapa it a, akhut ah sil jousiah apiata hi.

³⁶Kuapeuh Tapa gingta in tangtawn hinna aneita, kuapeuh Tapa gingta lou in hinna amu kei ding a, Pasian hehna atung ah aom jing jaw ding hi, achi hi.