Read Thangal Naga JOHAN 4 Bible Online

JOHAN 4 - Thangal Naga bible

JOHAN 4

¹Tuajiakin Jesu`n Johan sang in nungjui asiam tamjaw a, a baptis chih Pharisaite`n aja uh chih Toupa`n atheihtak in.

²(Hinanleh Jesu hial in a baptis kei, a nungjuite`n a baptis jawjel uhi).

³Judea gam nusia in Galili gam ah a paikikta hi;

⁴hinanleh Samaria gam tuan a apaingai ahi a.

⁵Tuachi`n Samaria khuapi khat Saikar achih uh, Jakob in atapa Joseph kiang a mun apiakna gei a hungtungta hi.

⁶Huasan ah Jakob tuikul aom a, Jesu a khualzinna agim jiakin tuikul geiah atouta a, huahi dakguk tuamlak ding ahi a.

⁷Tualeh Samaria numei khat tuitawi dingin a hungpai a, Jesu`n a kiangah “Dawn ding tui hungpia in,” achi hi.

⁸Anungjuite lah nek ding leiin khuapi ah a paikhinta ua.

⁹Tuachi`n Samaria numeinu in a kiangah, “Bangchi dan a nang Judami in kei Samaria numei kiang a dawn ding nungnget ahia?” Juda mite`n lah Samariamite bangmah in asim ngal kei ua, achi hi.

¹⁰Jesu`n adawng a akiang ah, “Pasian silthawn piak leh na kiang a dawn ding tui hungpia in chipa kua ahiam chih theilechin jaw nang a kiang ah ngen ding chin a, aman tuihing hungpia ding hiven,” achi hi.

¹¹Numeinu`n a kiangah, “Pu, asawkna ding bangmah lah na neikei a, tuikul lah athuk ngal a, khoia kipan in ahia tuihing nalak ding?

¹²Ka pu uh Jakob sang a lianjaw nahi maw? Aman hih tuikul a hungpia a, tualeh amah mah in zong adawn a, a tate leh agan hawn in zong adawn uh,” achi hi.

¹³Jesu`n adawng a akiang ah, “Kuapeuh hih tuikul a dawn tuh adangtak kik ding,

¹⁴hinanleh ken akiang a kapiak ding tui dawn jousiah adangtak ngai nawn kei ding. Hinanleh ken akiang a tui kapiak ding pen amah ah tuinak ahung hi ding a, tangtawn hinna dawngin aki khohkhia ding,” achi hi.

¹⁵Numeinu`n akiang ah, “Pu, hua tui hungpia ve! Ka dang atak nawnlouh na ding leh tuitawi a hihsan a kungpai louhna dingin,” achi hi.

¹⁶Jesu`n akiang ah, “Na pasal vasam inla, hihsan ah hung paikik in,” achi hi.

¹⁷Numeinu`n adawng a, “Pasal ka neikei,” achi hi. Jesu`n akiang ah, “Pasal ka neikei nachih na chidik mahmah hi.

¹⁸Ajiak pasal nga naneita a, tu a naneih zong na pasal ahi kei. Hua thu nagen dik achi hi.”

¹⁹Numeinu`n akiang ah, “Pu, Jawlnei nahi chih ka thei.”

²⁰“Ka pu leh pate un hih mual ah Pasian abia jel ua, hinanleh nou, mi`n Pasian abiakna mun ding ahihleh Jerusalem ahi, nachi uh,” achi hi.

²¹Jesu`n akiang ah, “Numei hung gingta in, hih mual sese lou ah zong ahihkeileh Jerusalem sese lou ah zong Pa nabiak hun uh hungtung ding ahita.

²²Nou na theihlouh uh nabia uh, kou katheih uh kabia uh; ajiak hundamna Judate a hung kipan ahi.

²³Hinanleh ahun tung ding ahita, tu mahmah in zong atung hi, hua hun chiangin abia taktak ten Pa tuh Kha leh thutakin abia ding uhi, ajiak Pa in huachibang mi amah bia dingin azong hi.

²⁴Pasian ahihleh kha ahi a, abia miten Kha leh thutak a abiak ding uh ahi,” achi hi.

²⁵Numeinu`n akiang ah, “Krist kichi, Messiah hungpai ding ka thei, amah a hungpai chiangin sil bangkim ahung hilhsiang ding,” achi hi.

²⁶Jesu`n akiang ah, “Kei, na kiang a thugenpa, amah ka hi,” achi hi.

²⁷Tualeh huahun laitakin a nungjuite a hungtung ua, numeinu a kihoupih lamdang asa mahmah ua, hinanleh kuaman, “Bang ding a numeinu na kihoupih?” achi kei uhi.

²⁸Numeinu`n atuibel ataisan a, khuapi ah apai a, mi kiangah,

²⁹“Ka silbawl jousiah hunghilh mikhat aom, hungpai unla, hung en-un, Krist ahithei diam ah?” achi a.

³⁰Tuachi`n amauh khuapi a pat ahung paikhia ua, akiang ah ahung paita uhi.

³¹Tuachih laiin a nungjuite`n, “Siapa an ne in!” chi`n asawl ua.

³²Hinanleh aman aking uah, “Nou theihlouh nek ding an kanei,” achi hi.

³³Tuajiakin a nungjuite a kihou ua, “Kuahiam in anek ding ahung tawisak adiam?” achi ua.

³⁴Jesu`n akiang uah, “Ka an,” ahihleh, “a hungsawlpa deihlam bawl leh a nna sepzoh ahi.

³⁵Nou, ‘Khali zoh chiangin buhlak hun a hungtung ding na chikei uh amah,’ ngaiun kung hilh ahi, dak unla, loujaute en-un, lak hun in aminsiangta hi!

³⁶Tualeh kuahileh ala in thaman amu ding a, tangtawn hinna tan om ding in gah akikhol jel hi; atuhpa leh alapa a kipakkhawm theihna ding un.

³⁷‘Ajiak khat in atuh a, adang in ala hi,’ chih hihsan ah adik ngel hi.

³⁸Na sepgimlouh uh lading in kung sawl ahi, midangte`n anasem ua, nou asepsa uh na sunjom uh ahi,” achi hi.

³⁹Tualeh, ka bawl jousiah hih numeinu thugen jiakin hua khuapi a Samaria mi tampi in amah agingta ta uhi.

⁴⁰Tuachi`n Samariamite Jesu kiang a hungtun tak un akiang ua om dingin akhouh ua; tualeh amah huasan ah ninih atam hi.

⁴¹Tualeh ama thugen jiakin mi tampi in agintat beh uhi,

⁴²tuachi`n numeinu kiangah, “Tu injaw nang gen jiak a gingta ka hikei ua, kou mahmah in a thugen kaja ua, tualeh hihpa pen leitung hundampa, Krist ahi chih kathei uhi,” achi ua.

⁴³Tualeh ninih zoh in hua-a kipan in apawt a Galili gam ah apaita hi.

⁴⁴Ajiak amah Jesu ngeiin, “Jawlnei amah gam lam ah pahtawiin aom ngaikei chih a theisakta hi.”

⁴⁵Tuachi`n Galili gam a hungtun in, Jerusalem a ankuang luilai a a silbawl jousiah amuh jiak un Galili mite`n ana kipahpih ua; amauh zong hua ankuang luina ah avapai uhi.

⁴⁶Tuachi`n Jesu tui uain a suahsakna Galili gam a Kana khua a hungtung kik a; tualeh huatak ah mithupi khat a tapa Kapernaum khua a china khat aom hi.

⁴⁷Jesu Judea gam a pat Galili gam a hungtungta chih azaktak in, akiang ah apai a, tualeh hung paisuk a a tapa damsak dingin a ngen a, si dekdek a china ahihjiak in.

⁴⁸Tuachi`n Jesu`n akiang ah, “Chiamtehnate leh sillamdangte namuh kei uleh na gingta kei ding uh,” achi hi.

⁴⁹Mithupipa in a kiang ah, “Pu, ka tapa sihma in hung paisuk in,” achi a.

⁵⁰Jesu`n akiang ah, “Paita in, na tapa adamta hi,” achi a. Tualeh huapa`n Jesu thugen agingta a, apaita hi.

⁵¹Tualeh apaisuk laiin asilate`n ana kituahpih ua, “Na tapa adamta!” chi`n ana hilh ua.

⁵²Tuachi`n aman ahung dampat lai hun akiang uah adong a, mau`n, “Jani dakkal sagih hunin anattun in amah a nusiata hi,” achi ua.

⁵³Tuachi`n apa`n Jesu`n akiang a, “Na tapa adamta,” achih hun laitak ahi chih atheita a; tualeh amah leh a innkuanpih teng in agingta ta uhi.

⁵⁴Hih pen Jesu`n Judea gam a pat ahung pawt a, Galili gam a ahung pai lai a, a sillamdang bawl nihna ahi.