Read Thangal Naga JOHAN 5 Bible Online

JOHAN 5 - Thangal Naga bible

JOHAN 5

¹Hih nungin Judate ankuang luina khat aom a, Jesu Jerusalem ah apaitou a.

²Tualeh Jerusalem ah belam kongkhak geiah dil khat Hebrai ham a Bethesda kichi inlim nga nei aom hi.

³Tuate ah damloute, mittawte, keng baite tualeh jengte tampitak alum ua, tui hungtak ngak in,

⁴ajiak, hun chih khat chiangin vantungmi hua dil ah ava paisuk a tui avatok jel a, tualeh kuapeuh tui kitok zoh a lut masa penpen bang chibang natna nei hinanleh zong, sukdam in aom jel hi.

⁵Tualeh huasan ah kum sawmthum leh giat damlou mi khat aom hi.

⁶Jesu`n amah huasan a lum amuh in, tualeh huachibang in hun sawtpi om ahita chih atheih in akiang ah, “Sukdam na ut hiam?” achi a.

⁷Damlou pa`n, “Pu, tui kitok chiang a dil a hungkoih ding mi kanei kei a, kapai chiangin mi`n ahung makhelh jel hi,” achi a.

⁸Jesu`n akiang ah thou inla, “Na netphah la inla nakeng in paita in,” achi a.

⁹Thakhat in amah ahung damta a, anetphah ala a, kengin apaita hi. Tualeh tuani khawlni ahi a,

¹⁰Tuajiakin Judate`n adampa kiangah, “Khawlni ahi a, na netphah na puak asiang kei,” achi ua.

¹¹Aman akiang uah, “A hung damsakpa in na netphah la inla, nakeng in paita in ahung chi hi,” achi a adawng a.

¹²Tuachi`n amau`n akiang ah, “Na netphah la inla paita in hungchi kua ahiam?” achi ua, adong ua.

¹³Hinanleh adampa in kua ahiam chih ka theikei a, huasan ah mi tampi a om a, Jesu lah apai mangta a.

¹⁴Tuakhit in, Jesu`n amah tempul ah amu a akiang ah, “Ngaiin, damsak in na omta hi, khialkik nawn ken, atuachih keileh sil hoihloujaw natung ah a hungtung kha ding,” achi hi.

¹⁵Tuachi`n huapa apaita a, a damsakpa Jesu ahi chih Judate ava hilhta hi.

¹⁶Tuajiakin Judate`n Jesu a gawtbawl ua, thah asawmta uhi, hih silte khawlni a abawl jiakin.

¹⁷Hinanleh Jesu`n amauh adawng a, “Ka Pa in tutan in nna asemjing a, tualeh ken zong nna kasem jing,” achi hi.

¹⁸Tuajiakin Judate`n amah thah asawm semsem ua, aman khawlni asuksiat guak hilou a, Pasian ka pa ahi achih a, Pasian tawh kibang a akibawl man in.

¹⁹Tuachi`n Jesu`n adawng a akiang uah, “Adiktak in kung hilh ahi: Tapa in amah thu in bangmah a bawlthei kei, Pa in abawl amuhte loungal, ajiak Aman abawl jousiah, huate Tapa in zong a bawljel hi.

²⁰Ajiak Pa in Tapa a it a, a silbawl jousiah akiang ah a musakjel hi, tualeh lamdang nasak ding uh hihte sang a thupijaw a musak ding hi.

²¹Pa in misite akaihthawh a, ahinsak mahbang in, Tapa in zong a ut jousiah a hingsak jel hi.

²²Pa in kuamah vai ahawmsak ngai kei a, hinanleh vaihawmna jousiah Tapa kiangah apiata hi.

²³Mi tengteng in Pa azah bang ua, Tapa zong azah ding uh ahi. Kuapeuh Tapa zahlou in Pa asawlpa zong azah kei uhi.

²⁴“Adiktak in kung hilh ahi: kuahileh ka thu ja a ahung sawlpa gingta in tangtawn hinna aneita; siamlouh tansakin a omnawn kei ding a, hinanleh sihna a pat hinna ah alutjawta hi.

²⁵Adiktak in adiktak in kung hilh ahi: misite`n Pasian Tapa aw ajakna ding uh hun hungtung ding ahita, tu leh tu in zong a hungtung hi, tualeh aja jousiah ahing ding uhi.

²⁶Ajiak Pa in amah a hinna akineih mahbang in Tapa in zong amah a hinna akineih na dingin apiata hi.

²⁷Tualeh Mihing Tapa ahihman in kiangah vaihawmna apiata hi.

²⁸Hih lamdang sakei un, ajiak ahun tung ding ahita, huahun chiangin hankhuk a om jousiahin a aw aja ding ua.

²⁹Tualeh ahung pawtdok ding ua, silhoih bawlte tangtawn hinna tang dingin a thoukhia ding ua; tualeh silgilou bawlte siamlouh tang dingin a thoukik ding uhi.

³⁰“Ken kathu in bangmah ka bawlthei kei a; ka ja`k bangin vai ka hawmjel hi, tualeh ka vaihawm adik hi, ajiak keima deihdan zonglou in, Pa ahung sawlpa deihdan ka zongjaw hi.

³¹“Keimah tanchin ki theihpih hitaleng, ka thu theihpih adik ahikei ding.

³²Ka tanchin theihpih khat a om, tualeh aman ka tanchin atheihpih pen adik ahi, chih ka thei hi.

³³Nou Johan kiangah mi nasawl uh, aman thutak tanchin atheihpih hi.

³⁴Tua theihsak kasa`n pen mihing a kipan ahi kei a; hinanleh hundam a na omtheihna ding un hih silte ka gen ahi.

³⁵Johan amah ahihleh meivak kuangtak leh va`ktak ahi a, tualeh nou avak ah tomkhat nopsak tadih na ut uhi.

³⁶Hinanleh Johan a sang a theihpihna lianjaw ka nei hi: ka Pa`n ka sepjawh ding a ahungpiak ka nasepte amah in, Pa in ahungsawl chih ka tanchin ahung theihpih hi.

³⁷Tualeh Pa, ahung sawlpa, mah in zong ka tanchin ahung theihpih hi. Nou bangchiklai in zong a aw na jangai kei ua, amel zong na mungaikei uhi,

³⁸hinanleh athu nasung uah aom kei a, amah ahung sawlpa na gintatlouh jiak un.

³⁹Laisiangthou na hoihsim ngel ua, ajiak asung ah tangtawn hinna neiin na kingaihsun ua. Huate ahihleh ka tanchin theihsakna ahi!

⁴⁰Hinanleh hinna naneih na ding un ka kiangah nung painuam kei uhi.

⁴¹“Mihingte pahtawina ka zongkei hi.

⁴²Hinanleh Pasian hehpihna na kiang uah a om kei chih kung thei hi.

⁴³Ka Pa min in kungpai a, hinanleh nou nung ki pahpih kei uhi; adang khat, amah min in hungpai lehlah, na kipahpih ding uhi.

⁴⁴Nou khat leh khat kipahtawi tuahna ngaina a, Pasian guak; a kipan a hungpawt pahtawina zongloute`n, bangchi`n, na gingtathei ding ua?

⁴⁵Pa kiang a nou hunghek dingin hung ngaihtuah kei un. Nou hunghektu khat aom, amah nataksan uh Mosi ahi.

⁴⁶Bang jiakin ahia achihleh Mosi ana gingta hile uchin kei zong nung gingta ding uhi, ajiak aman ka tanchin ahi ana gelh.

⁴⁷Hinanleh amah thugelh nagintat kei uleh bangchi`n kei thute na gingta ding ua?” achi hi.