Read Thangal Naga JOHAN 6 Bible Online

JOHAN 6 - Thangal Naga bible

JOHAN 6

¹Hih silte khit in Jesu Galili dil, (Tiberia dil zong kichi) gal lam ah apaita a.

²Tualeh natna neite tung a sillamdang abawlte amuh man un mipi tampi`n amah ajui ua.

³Jesu mual ah apaitou a, huasan ah a nungjuite tawh atou a.

⁴Tualeh paikan kut ankuang luina ahung naita hi.

⁵Tuachi`n Jesu adak a, mi tampi akiang lam juan a hungpai amuh in Philip kiangah, “Hihte nek ding tanghou khoiah ahia ilei ding uh?” achi a.

⁶Hinanleh aman Philip ze-etna ding a agen ahi a, ataktak in bang ahia abawl ding chih aman atheikhin hi.

⁷Philip in akiang ah, “Michih in themkhat chiat a atan ding uh zong makhai zanih man tanghou in achin kei ding,” achi hi.

⁸A nungjuite lak a khat Simon Peter sanggampa Andru in akiang ah,

⁹“Hihsan ah barli buh tanghou phelnga leh nga gaw nih nei naupang khat aom hi. Hinanleh mi hizahpi lak ah bantham ahi dia,” achi hi.

¹⁰Jesu`n, “Mipite tousak un,” achi a. (Tualeh huasan ah loupa tampi aom a.) Tuachi`n mipite atou ua, atam lam uh sangnga bang ahi.

¹¹Tualeh Jesu`n tanghoute ala a, a gualjawl zoh in a nungjuite kiangah ahawm a, a nungjuite`n atoute kiangah, tuamah bangin ngate zong adeihzah un a hawm uhi.

¹²Tualeh akham nung un aman a nungjuite kiangah, “Bangmah manglou dingin anengthem in luak un,” achi hi.

¹³Tuajiakin aluak khawm ua barli buh tanghou phelnga nete nekval lawh sawmlehnih aluak dim uhi.

¹⁴Tuachi`n Jesu sillamdang bawl amuh un, “Hih mipite`n hihpa leitung a Jawlnei hung paidingpa ahi taktak hi!” achi uhi.

¹⁵Jesu`n amah kumpipa a bawl ding a mat teitei tum in a hungpai ding uh chih atheih jiakin amahtang in a paituamta hi.

¹⁶Tualeh nitak lam a hunghih in a nungjuite dil lam ah apaisuk ua,

¹⁷gunkuang khat ah atuang ua, Kapernaum lam juan in dil tung ah apai ua. Tualeh khua amialta a, Jesu lah akiang uah ahung painai kei a.

¹⁸Huihpi hattak alan jiakin tuipi akihawt sang hulhul hi.

¹⁹Tualeh mel thum hiam mel li hiam ajap nung un Jesu dil tung a paia gunkuang lam hungnaih in amu ua, alauta uhi.

²⁰Hinanleh aman akiang uah, “Keimah ka hi! Laukei un,” achi hi.

²¹Tuachi`n amau`n kilawptak in gunkuang ah a tuangsakta ua, tualeh a gunkuang uh zong apai nang uh a hungtung paita hi.

²²Ajingni-in dil galkhat lam a ding mipite`n a nungjuite tuanna loungal gunkuang dang a omkei chihleh, Jesu a nungjuite tawh gunkuang ah a paikei a, a nungjuite amauh guak apai uh chih atheita ua.

²³Hinanleh Tiberia a kipan in Toupa`n a gualjawl nung a tanghou anekna mun gei ah gunkuang dang ahung tungpai a.

²⁴Tuachi`n mipite`n Jesu hileh, a nungjuite hileh a om nawn kei uh chih atheihtak un amauh zong gunkuang neute a tuang in Jesu zong in Kapernaum a hungtung ua.

²⁵Tualeh amah dil gal langkhat lam a amuhtak un akiang ah, “Rabbi, bangchik a hihtak natung na hia?” achi ua.

²⁶Jesu`n adawng a akiang uah, “Adiktak in kung hilh ahi: sillamdangte na muh jiak ua hung zong na hikei ua, tanghou nanek ua navah jiak un nung zong uh ahijaw hi.

²⁷An mangthang ding leltak zong in nna semkei un, tangtawn hinna dong a omjing ding an mihing Tapa in a hungpiak ding zong in semjaw un; ajiak Pa Pasian in amah a chiamtehta hi,” achi hi.

²⁸Tuachi`n amau`n akiang ah, “Pasian nna ka septheihna ding un bang ahia ka bawl ding uh?” achi ua,

²⁹Jesu`n adawng a akiang uah, “Amah a hungsawlpa na gintat uh, tua ahi Pasian nasep,” achi hi.

³⁰Tuajiakin amau`n akiang ah, “Ahihleh ka muh ua kung gintat theihna ding un bang chiamtehna nung ensak thei dia?

³¹Ka pu leh pate un gamdai ah Manna ane uh; ‘Aman van a kipan in nek ding apia,’ ” chia kigelh bangin, achi ua.

³²Tuachi`n Jesu`n akiang uah, “Adiktak in adiktak in kung hilh ahi, Mosi in hua tanghou van a pan in a hungpia kei a, hinanleh ka Pa in van a kipan in tanghou diktak ahung piajaw hi.

³³Pasian tanghou van a kipan a hung kumsuk leitung mite kiang a hinna piapa ahi,” achi hi.

³⁴Tuachi`n amau`n akiang ah, “Toupa, hua tanghou hungpia gige in,” achi ua.

³⁵Jesu`n akiang uah, “Kei hinna tanghou ka hi, kuapeuh ka kiang a hungpai a gilkialngai nawn kei ding; tualeh kuapeuh kei hung gingta tuh a dangtakngai nawn kei ding.

³⁶Hinanleh kung hilh ahi, nou nung muh un zong nung gingta kei uhi.

³⁷Ka Pa`n a hungpiak jousiah ka kiangah a hungpai ding; tualeh ka kiang a hungpai jousiah bangchileh zong ka nawtdok kei ding hi.

³⁸Ajiak kei deihlam bawl ding a van a pan a hung paisuk ka hikei a, ahung sawlpa deihlam bawl ding a hung paisuk ka hijaw hi.

³⁹Tualeh Pa ahung sawlpa deihlam hih ahi, aman a hungpiak jousiah khatbek mansaklou a, hinanleh nitawpni chiangin ka kaihthou jawk ding.

⁴⁰Tualeh hih ahung sawlpa deihlam ahi, kuapeuh Tapa mu a gingta in tangtawn hinna aneih a, tualeh ken nitawpni chiangin ka kaithou ding,” achi hi.

⁴¹Tuachi`n Judate atung ah aphun ua, “Kei van a pan a tanghou hung kumsuk ka hi,” a kichih jiakin.

⁴²Tualeh amau`n, “Hihpa hi Jesu, Joseph tapa, apa leh anu zong itheih uh hilou ahi maw? Van a pan a hung kumsuk ka hi, bang chidan a achih ahia?” achi ua.

⁴³Tuajiakin Jesu`n adawng a, akiang uah, “Phun phun kei un.

⁴⁴Pa ahung sawlpa`n a hungpiak kei leh kuamah ka kiangah ahung paithei kei; tualeh ken amah nitawpni chiangin ka kaithou ding hi.

⁴⁵Jawlneite laibu ah; Pasian hilh in a omsiang ding uh, chih gelh ahi. Tuajiakin Pa thu ja a thei jousiah ka kiangah ahung paijel uhi.

⁴⁶Mi kuamah in Pa amu ngaikei, Pasian a kipan a hungpaipa loungal; aman ahihleh Pa amuta hi.

⁴⁷Adiktak in, adiktak in kung hilh ahi, kuapeuh kei hung gingta in tangtawn hinna aneita.

⁴⁸Keimah hinna tanghou tuh ka hi.

⁴⁹Na pu leh pate un gamdai ah manna ane ua, asi uhi.

⁵⁰Hih ahihleh van a pat a hung kumsuk tanghou, mi`n anek a asih louhna ding uh ahi.

⁵¹Kei van a pat a tanghou hing hung kumsuk pen ka hi, mi kuapeuhin hih tanghou anek uleh tangtawn in ahing ding uh; tualeh ka tanghou piak ding ahihleh leitung mite hinna ding a ka piak ding ka taksa ahi,” achi hi.

⁵²Tuajiakin Judate akisel ua, “Bang chidan a hihpan a taksa nek ding a piathei ding adiam?” achi ua.

⁵³Tuachi`n Jesu`n akiang uah, “Adiktak in, adiktak in kung hilh ahi: mihing Tapa taksa na nek ua tualeh a sisan na dawn kei ua ahihleh noumauh in hinna neilou hive uchin.

⁵⁴Kuapeuh ka taksa ne a, tualeh ka sisan dawn in tangtawn hinna aneita; tualeh ken nitawpni chiangin ka kaithou ding hi.

⁵⁵Ajiak ka taksa hi an taktak ahi a, ka sisan zong dawn ding taktak ahi.

⁵⁶Kuapeuh ka taksa ne a ka sisan dawn tuh, kei ah aom jing a, tualeh kei amah ah ka omjing hi.

⁵⁷Pa hing in a hungsawl a, Pa jiak a ka hin mahbang in, kuahileh kei hung ne tuh kei jiakin amah zong ahing ding.

⁵⁸Hihpen van a kipan a tanghou hing hung kumsuk pen ahi. Na pu leh napate un manna anek ua asih bang uh ahikei, kuapeuh hih tanghou ne in tangtawn in ahing ding hi,” achi hi.

⁵⁹Hih thute aman Kapernaum khua a aom laia kikhopna inn a agen ahi.

⁶⁰Tuajiakin a nungjuite tampi in hihthu ajak un, “Hihpen thu haksa ahi, kuan ahia ngaithei ding?” achi ua.

⁶¹Tualeh Jesu`n hih thu ah a nungjuite aphun uh chih alungsim a atheih in akiang uah, “Hih thu in nou ahung lunghimoh sak maw?

⁶²Mihing Tapa tu-ma a aom na ngai a kahtou mule uchin bang nalawh ding ua?

⁶³Hinna piajaw kha ahi a, taksajaw bangmah a phatuam kei, na kiang ua ka thugente kha ahi a, tualeh hinna zong ahi.

⁶⁴Hinanleh nalak uah gingta lou khenkhat na om uh,” achi a, (ajiak Jesu`n atung a pat a agingta loute leh amah mansak dingpa atheihsa ahi.)

⁶⁵Tualeh aman, “Tuajiakin ahi, ka Pa`n ahung piak kei leh kuamah ka kiangah ahung paithei kei, chia na kiang ua ka gen ding,” achi hi.

⁶⁶Hua hun a kipan a nungjuite tampi anung paita ua, amah ajui nawn kei uhi.

⁶⁷Tuachi`n Jesu`n sawmlehnihte kiangah, “Nou zong na paimang mai ding uh maw?” achi a.

⁶⁸Simon Peter in adawng a akiang ah, “Toupa, kua kiangah ahia ka pai ding uh? Nang tangtawn hinna thute nanei hi.

⁶⁹Tualeh nang nahihleh hua Pasian hing Tapa Krist tuh na hi chih ka gingta ua, thei zong kathei uhi,” achi hi.

⁷⁰Jesu`n amauh adawng a, “Nou sawmlehnihte kungtel hilou nahi uh maw? Tualeh nalak ua khat dawimangpa ahi!” achi hi.

⁷¹Aman Simon tapa Juda Iskariot thu gen ahi; amah zong sawmlehnihte lak a pang, amah mansak dingpa ahihman in.