Read Thangal Naga JOHAN 7 Bible Online

JOHAN 7 - Thangal Naga bible

JOHAN 7

¹Hih silte khit in Jesu Galili gam ah avak a, Judate`n thah asawm jiak un Judea gam a phanuam takei hi.

²Tualeh Judate bawkta kut ahung naita a,

³tuajiakin a sanggamte`n akiang ah, “Hihsan a pat Judea gam ah paimang in, na nungjuite`n na nasep amuhtheih na ding un.

⁴A minthan na ding zong ngal in kuaman sil asimtham in [3] abawl ngaikei hi. Hih silte bawl nahihleh leitungmite kiangah kimusak in!” achi ua.

⁵Ajiak a sanggamte mahmah in zong agingta kei uhi.

⁶Tuachi`n Jesu`n akiang uah, “Ka hun atung naikei hi. Hinanleh nou hun ahihleh bangchiklai peuhin atung gige hi.

⁷Leitungmite`n nou ahung huakei a, hinanleh kei ahung hua uhi, a lampite uh ahoihkei chih ka theihsak jiakin.

⁸Nou ankuang luina ah na paitou un, kei pen ankuang luina ah kung paitou naikei ding hi. Ajiak ka hun atung bukim naikei hi,” achi hi.

⁹Hih thute agenkhit in amah Galili gam ah a omden lai hi.

¹⁰Hinanleh a sanggamte ankuang luina a apaitouh nung un, amah zong vantang theihlouh in, aguk a pai bangin ahawhtou hi.

¹¹Tuachi`n Judate`n ankuang luina ah amah azong ua, “Khoi a om ahia?” achi ua.

¹²Tuachi`n amah tungtang ah mipite lak ah phunna nasatak a omta a. “Ajiak khenkhat in mihoih ahi,” achi ua, khenkhat in, “Hilou, mikhem ahijaw,” achi ua.

¹³Hinanleh Judate alau jiak un kuaman a tungthu ahahgen ngam kei uhi.

¹⁴Tualeh ankuanglui kimlaitak in Jesu Pasian tempul ah apaitou a, thu ahilh a.

¹⁵Tualeh Judate`n lamdang asa ua, “Hihpa`n zilngailou pi a bang chidan a laithei ahia?” achi ua.

¹⁶Tuachi`n Jesu`n amauh adawng a, “Ka thuhilh hi keimah a hung kipan ahikei a, ahung sawlpa a hung kipan ahijaw hi.

¹⁷Kuahileh ama deihlam bawlnuam in thuhilhna pen Pasian a kipan ahia, ahihkeileh keima phuahtawm a ka gen, chih athei ding uhi.

¹⁸Kuahileh amah phuahtawm thu gen tuh amah kipahtawina ding zong ahi; hinanleh kuahileh asawlpa pahtawina ding zong tuh amah pen midik ahi a, amah ah diktatlouhna mawng mawng aom kei hi.

¹⁹Mosi-in nou dan hungpia hilou amaw? Hinanleh nalak uah kuaman dan najui kei uh, bangding a thah hung sawm na hi ua?” achi a.

²⁰Mipite`n adawng ua “Dawi pai nahi ve! Kuan ahia nang thah hung sawm?” achi ua.

²¹Jesu`n adawng a, akiang uah, “Nna lamdang khat kasem a, na un un lamdang nasa uhi.

²²Tualeh Mosi-in teptan thu nou a hungpia a, (Mosi a kipan ahi kei a, pulehpate a kipan ahijaw hi), khawlni in zong mi tep natan uhi.

²³Mosi dan bawhsiat louhna ding a mi`n khawlni a tep atan uleh, ken khawlni a mi khat ka damsiangsak jiakin katung ah naheh tuam umaw?

²⁴A kilang bangin thu khen kei unla, diktat takin thu khenjaw un,” achi hi.

²⁵Tualeh Jerusalem a pat mi khenkhat in, “Hihpa thah asawmpa uh hilou amaw le?

²⁶Hinanleh ensin ua! Hangsan takin thu agen a, amau`n lah akiang ah bangmah agen kei uh! Amah hi Krist ahi chih vaihawmtute`n athei taktak na uh adiam?

²⁷Hinanleh enlah hihpa khoi a hung kipan chih ithei ngal ua, hinanleh Krist a hungpai chiangin kuaman athei kei ding hi,” achi ua.

²⁸Tuachi`n Jesu Pasian tempul ah thu hilh in akikou a, “Nou kei nung thei ua, tualeh khoi a hung kipan chih zong nungthei uh, keimah thu a hungpai ka hikei a. Hinanleh ahung sawlpa adik ahi, nou amah na theikei uh,

²⁹hinanleh ken amah ka thei hi, ajiak amah a kipan ka hi a, tualeh ama hung sawl ka hi,” achi hi.

³⁰Tuajiakin amah mat asawm ua, hinanleh ahun atun nailouh jiakin kuaman atung ah khut akha kei uhi.

³¹Tualeh mipi tamtakin amah agingta ua, “Krist a hungpai chiangin, hihpa bawl sang a sillamdang abawl diam?” achi ua.

³²Pharisaite`n atung thu ah mipite huachi bang a aphun uh aja ua, tualeh Pharisaite leh siampite`n amah man dingin lamkaite asawl ua.

³³Jesu`n akiang uah, “Tomnou khat ka om ding a, tuazoh chiangin ahung sawlpa kiang ah ka pai ding hi.

³⁴Nou nung zong ding ua, nung mukei ding uh; tualeh ka omna ah nung paithei kei ding uh,” achi hi.

³⁵Tuachi`n Judate akihou ua, “I muhlouh ding ua khoi a pai ding adiam aw? Jentelte lak a i mi kithehthangte kiang a pai a Jentelte thu vahilh ding adiam?

³⁶Nung zong ding ua nung mukei ding uh, tualeh ka omna ah nung paithei kei ding uh, achih bang achihna adiam?” achi ua.

³⁷Tualeh ankuanglui nithupi ni nunung pen ah Jesu ading a, akikou a, “Kuapeuh adang atak leh ka kiangah hungpai henla, dawn hen,

³⁸kuapeuh kei hung gingta in Pasian Laisiangthou in agen mah bangin ‘Asung a kipan in tuihing luite a luangkhia ding,’ ” achi hi.

³⁹Hinanleh hihpen aman amah gingtate`n amuh ding uh Khasiangthou agenna ahi a; hua hun ah Jesu pahtawi a aom nailouh jiakin Khasiangthou piak ahi naikei hi.

⁴⁰Tuajiakin mipi tamtakte`n hihthu ajak tak un, “Hihpa Jawlnei taktak ahi!” achi ua.

⁴¹Khenkhatte`n “Krist ahi!” achi ua, hinanleh khenkhatte`n “Krist Galili gam ah ahung piang ngap ding amah!

⁴²Pasian Laisiangthou in, Krist ahihleh David suante lak a leh David tenna khua Bethlehem ah a hungpiang khia ding, chilou amaw?” achi ua.

⁴³Tuachi`n amah jiakin mipite lak ah kikhenna a omta hi.

⁴⁴Tualeh alak ua khenkhat in amah mat asawm ua, hinanleh kuaman atung ah khut akha kei uhi.

⁴⁵Tuachi`n lamkaite, siampite leh Pharisaite kiangah ahung pai ua, amau`n akiang uah, “Bangding a amah hung paipih lou anachi ua?”

⁴⁶“Lamkaite`n hihpa thugen bangin kuaman agenngai mawng mawng kei hi!” achi ua, adawng ua.

⁴⁷Tuachi`n Pharisaite`n “Nou zong khem a om na hita uh maw?”

⁴⁸“Vaihawmtute ahihkeh Pharisaite lak ah amah gingta aom khatai leh?

⁴⁹Hinanleh dan theilou hih mite ahihleh hamsia thuak ahi uh!” achi ua, adawng ua.

⁵⁰Nikodem, jan a Jesu kiang a hungpaipa alak uah aom a, akiang uah,

⁵¹“I danthu un mi amah kam a thu jak leh a silbawlte atheihma in siamlouh a tangsak ngai maw,” achi a.

⁵²Amau`n adawng a akiang ah, “Nang zong Galili mi na maw? Zong inla en in Galili gam ah Jawlnei mawng mawng apiang ngai kei hi,” achi ua.

⁵³Tuachi`n mi jousiah a innlam chiat uah apaita uhi.