Read Thangal Naga JOHAN 8 Bible Online

JOHAN 8 - Thangal Naga bible

JOHAN 8

²Tualeh jingsang matak in tempul ah a hungpai kik a, mipi jousiah akiang ah a hungpai ua, tualeh amauh atousak a, thu ahilh hi.

³Tuachi`n laigelhmite leh Pharisaite`n numei khat a angkawmlai a amat uh, akiang ah ahung paipih ua, alai ua adinsak zoh un.

⁴A kiangah, “Siapa, hih numeinu a angkawm laitak a kiman ahi a,

⁵Dan laibu ah Mosi-in hichibang mi suang a denlik ding thu a hungpia hi; hinanleh nang bang chiding nachi a?” achi ua.

⁶Hihpen amah mohmatna ding a muhtheihna ding ua a ze-etna a agen uh ahi a. Hinanleh Jesu akun a, amauh gen jalou hileh kilawm in, akhutmuk in leilak agelh a.

⁷Tuachi`n adok lailai jiak un a dingkhia a, akiang uah, “Na lak ua khialhna nei kingkeng lou penpen in amahnu deng masa hen,” achi a.

⁸Tualeh akun kik a, leilak agelh jel a.

⁹Tuachi`n amau`n hih thu ajak un asia leh pha theihna un siamlouh tangsak in, a upapen a pat in atawptan in khat khat in a paimangta ua; Jesu guak aom a, alai a ding numeinu tawh.

¹⁰Tualeh Jesu a dingkhia a, numeinu chihlouh kuamah amuhlouh takin akiang ah, “Numei nang hung hekte khoi a om ahita ua? Kuaman siamlouh hung tangsak lou umaw?” achi a.

¹¹Amahnu`n, “Kuaman hung tangsak lou, Toupa,” achi a. Jesu`n akiang ah, “Ken zong siamlouh kung tangsak kei hi. Pai inla, khialkik nawn ken,” achi hi.

¹²Tuachi`n Jesu`n akiang uah, “Kei leitung va`k ka hi, kuapeuh kei hungjui tuh mial ah akhuasa kei ding a, hinanleh hinna va`k aneijaw ding hi,” achi hi.

¹³Tuajiakin Pharisaite`n akiang ah, “Nangmah leh nangmah thu na kitheihpih hi, na thu theihpih adik kei,” achi ua.

¹⁴Jesu`n adawng a akiang uah, “Keimah leh keimah thu kitheihpih hinanleng zong ka thu theihpih adik hi; ajiak khoi a kipan a hungpai ka hih leh, khoi a pai ding ka hia chih ka thei hi; hinanleh nou khoi a kipan a hung pai ka hih leh khoi a pai ding ka hia chih nathei kei uhi.

¹⁵Nou taksa dan in vai nahawm uh; ken kuamah vai ka hawmsak kei.

¹⁶Tualeh vai hawmsak hitaleng zong ka vaihawm adik hi, ajiak kei guak ka hikei a, kei leh ka Pa, ahung sawlpa ka hijaw uhi.

¹⁷Na dan laibu uah zong minih thu theihpih pen adik ahi, chih gelh ahi.

¹⁸Keipen keima thu theihpih khat ka hi a, tualeh Pa ahung sawlpa`n ka thu ahung theihpih hi,” achi hi.

¹⁹Tuachi`n mau`n akiang ah, “Na pa khoi ah aom ei?” achi ua. Jesu`n adawng a, “Nou kei nung theikei ua, kapa zong nathei kei uh, kei hungthei hile uchin kapa zong nathei ding uh,” achi hi.

²⁰Hih thute Jesu`n tempul a thu ahilhlai in dangka koihna mun a agen ahi a; tualeh ahun atun nailouh jiakin kuaman atung ah khut akha kei uhi.

²¹Tuachi`n Jesu`n akiang uah, “Ka paimang ding a, nou nungzong ding uh. Ka paina ah nung paithei kei ding uh,” achi a.

²²Tualeh Judate`n, “Aman, kapaina ah nung paithei kei ding uh, achih jiakin amah leh amah kithat ding amaw le” achi ua.

²³Tualeh aman akiang uah, “Nou pen nuailam a kipan na hi ua, kei kahihleh tunglam a kipan ka hi, nou leitung a nahi ua, kei leitung a ka hikei hi.

²⁴Tuajiakin na kiang uah, na khialhna uah na si ding uh; ajiak ‘Kei Amah ka hi’,” chih nagintat kei uleh na khialhna uah na si ding uhi, kungchi ahi.

²⁵Tuachi`n amau`n akiang ah, “Nang kua na hia?” achi ua. Jesu`n akiang uah, “A tu`ng a kipat a na kiang ua ka gen huamah ka hi.

²⁶Na tung thu uah gen ding leh vaihawmsak ding tampi kanei hi; hinanleh ahung sawlpa adik hi; tualeh amah a pat a ka jakte pen leitung mite kiangah ka genjel hi,” achi hi.

²⁷Aman Pa thu akiang uah agen ahi chih amau`n athei kei uhi.

²⁸Tuachi`n Jesu`n akiang uah, “Mihing Tapa na khaikang zoh chiang un ‘Amah Ka hi’; chih leh keimah thu in bangmah ka bawlkei a, hinanleh ka Pa`n a hunghilh bangin hihthute ka genjaw ahi chih nathei ding uhi.

²⁹Amah ahung sawlpa ka kiangah aom hi; Pa in kei guakin ahung nusia kei; ajiak ama deihlam silte ka bawljing hi,” achi hi.

³⁰Hih thute aja mi tampite`n amah agingta uhi.

³¹Tuachi`n Jesu`n amah gingta Judate kiangah, “Ka thu a na omjing uleh ka nungjuite nahi taktak ding uhi;

³²tualeh thutak nathei ding ua, thutak in nou ahung suaktasak ding hi,” achi a.

³³Amau`n, “Abraham suante ka hi ua,” bangmah chik in kuamah sal-ah ka tangngai kei uh; “ ‘bang chidan a na suakta ding uh nachih ahia’?” chi`n adawng ua.

³⁴Jesu`n amauh adawng a, “Adiktak in adiktak in kung hilh ahi: kuahileh khialhna bawl tuh khialhna suak ahi.

³⁵Suak ahihleh tangtawn in inn ah aom ngaikei a, hinanleh Tapa ahihleh tangtawn in a omjing hi.

³⁶Tuajiakin Tapa in ahung suahtak sak leh na suakta taktak ding uhi.

³⁷Abraham suante nahi uh chih kungthei hi, hinanleh nou kei thah nung sawm uh, ka thu nou a aomlouh jiakin.

³⁸Ken kapa kiang a ka muhte ka gen a, nou napa kiang ua namuhte na bawl uhi,” achi hi.

³⁹Amau`n adawng ua, akiang ah, “Abraham kapa uh ahi,” achi ua. Jesu`n akiang uah, “Abraham tate hile uchin, Abraham nasepte nasem ding uhi.

⁴⁰Hinanleh tuin kei, Pasian kiang a pat a kajak thutak na kiang ua hunghilhpa thah nung sawm uh; Abraham in hichi bangin a bawlngai kei hi!

⁴¹Nou napa uh silbawlte nabawl uhi,” achi a. Tuachi`n amau`n akiang ah, “Ang kikawm a piang ka hikei uh, pa khat guak kanei uh, Pasian,” achi ua.

⁴²Jesu`n akiang uah, “Pasian napa uh hileh pen keimah nung it ding uhi; ajiak Pasian a kipan a hungpawt ka hi a, keimah thu in kung paikei a, aman a hungsawl ahijaw hi.

⁴³Bang chidan a ka ham omdan theisiam lou nahi ua? Ka thu na ngaihlouh jiak uh ahi.

⁴⁴Tualeh noupen napa uh dawi a hung kipan nahi ua, tualeh napa uh deihlam nabawl ut uhi. Amah ahihleh atung a kipan-a tualthat ahi a, tualeh thutak ah aom kei, amah ah thutak a omlouh jiakin. Juauthu agen in amah a kipan in ahi agen, ajiak amah mijuau ahi a, tualeh juaupa zong ahi.

⁴⁵Thutak ka gen jiakin nou nung gingta kei uhi.

⁴⁶Na lak uah kua nahi ua siamlouh hung tangsak? Thutak ka gen leh bangding a hung gingtalou nahi ua?

⁴⁷Mi Pasian a hung kipan in Pasian thu a ngaikhia; tuajiakin na ngaikhia kei uhi; Pasian a hung kipan na hihlouh jiak un.”

⁴⁸Tuachi`n Judate`n adawng ua, akiang ah, “Samariami nahi a, tualeh dawipai nahi kungchih uh ka chidik mahmah uh hilou maw?” achi ua.

⁴⁹Jesu`n adawng a, “Dawipai ka hikei a, Ka Pa ka pahtawi ahijaw hi, nou kei nung pahtawi kei uhi.

⁵⁰Keimah guak thupi na ding zong ka hikei a; azong leh vaihawmtu khat aom hi.

⁵¹Adiktak in, adiktak in kung hilh ahi: mi kuapeuh in ka thu azop leh sihna amu ngai mawng mawng kei ding,” achi a.

⁵²Tuachi`n Judate`n akiang ah, “Tuin dawipai nahi chih kung theita uhi! Abraham asita a, tualeh Jawlneite zong asita uhi; hinanleh nang mi kuapeuhin ka thu azop leh sihna amu ngai mawng mawng kei ding, nachi hi.

⁵³Ka pu uh Abraham sang a thupijaw nahi maw? Tualeh Jawlneite zong asita uh; nang leh nang kua a kibawl nahia?” achi ua.

⁵⁴Jesu`n, “Kei leh kei ka kipahtawi leh ka kipahtawina bangmah ahikei ding. Ahung pahtawitu ahihleh ka Pa, nou ka Pasian uh ahi nachih pen uh ahi.

⁵⁵Hinanleh nou amah na theikei uh; hinanleh ken amah ka thei hi; amah ka thei kei chileng nou bang a mi juau ka hi ding hi. Hinanleh amah ka thei a, tualeh athu zong kazop hi.

⁵⁶Na pa uh Abraham in ka ni muh ding a ut mahmah a, tualeh a mungei a, akipak mahmah hi,” achi hi.

⁵⁷Tuachi`n Judate`n akiang ah, “Nang kum sawmnga zong ching nailou chin a, Abraham na mukha a maw?” achi ua.

⁵⁸Jesu`n akiang uah, “Adiktak in, adiktak in kung hilh ahi, Abraham omma in, ‘Ka om hi,’ ” achi a.

⁵⁹Tuachi`n mau`n adenna ding suang ala ua, hinanleh Jesu akibu a, tempul a pat apawt a, alak uah paisuak in apaita hi.