Read Thangal Naga JOHAN 9 Bible Online

JOHAN 9 - Thangal Naga bible

JOHAN 9

¹Tualeh Jesu a paikawm in apian a pat mittaw khat amu a.

²A nungjuite`n akiang ah, “Rabbi, hihpa mittaw a apian kuan ahia sil a bawlkhialh? Hihpa`n maw, ahihkeileh anu leh apa`n?” chi`n adong ua.

³Jesu`n adawng a, “Hihpa`n zong a bawlkhial kei, anu leh apa`n zong a bawlkhial kei uh, hinanleh Pasian nasepte atung a a kilattheihna dingin ahijaw hi.

⁴Sun ahihlai in a hungsawlpa nna kasep ngeingei ding ahi; jan hungtung ding ahita, hua hun chiangin kuaman nna asemthei nawn kei ding uhi.

⁵Kei leitung a ka om sungteng leitung va`k ka hi,” achi a.

⁶Tuachia agenzoh in lei ah chil asia a, tua chil in tungman abawl a, tua tungman mittawpa mit ah anuh a

⁷tualeh akiang ah, “Pai inla Siloam dil ah vasil in,” achi a. (Siloam ahihleh “Sawl” chihna ahi.) Tuachi`n amah apai a, asil a, muthei in ahung paikikta hi.

⁸Tuajiakin a innvengte leh ama a amittawt lai a amusate`n, “Hihpa khut doh a toujelpa hilou amaw le?” achi ua.

⁹Khenkhatte`n, “Amah ahi,” achi ua, “khenkhatte`n a kibakpih ahi,” achi uhi. Hinanleh aman, “Keimah ka hi,” achi hi.

¹⁰Tuajiakin amau`n akiang ah, “Bangchi`n ahia namit ahungvak?” achi ua.

¹¹Aman adawng a, “Jesu kichi mi khat in tungman abawl a, ka mit ahung nuhsak a, tualeh ka kiangah, Siloam dil ah pai inla, vasil in, a hungchi a. Tuachi`n kapai a, kasil a, tuachi`n ka mutheita hi,” achi a.

¹²Tuatakin amau`n akiang ah, “Amah khoitak ah aom ta?” achi ua. Aman, “Ka theihkei,” achi hi.

¹³Tuachi`n amau`n mittawsa a piangpa pen Pharisaite kiangah ahung paipih ua.

¹⁴Jesu`n tungman bawl a amit avaksakni pen khawlni ahi hi.

¹⁵Tuachi`n Pharisaite`n zong amit ahung vakdan akiang ah adong kik ua. Aman akiang uah, “Ka mit ah tungman akoih a; ka vasil a, tuachi`n ka muta hi,” achi hi.

¹⁶Tuajiakin Pharisaite khenkhat in, “Hihpa Pasian a hungkipan ahi kei, ajiak khawlni atangkei,” achi ua. Adangte`n, “Bang chi`n mikhial in hichibang sillamdang a bawlthei dia?” achi ua. Tuachi`n alak uah kikhenna ahung omta hi.

¹⁷Amau`n mittawpa kiangah, “Na mit ahung sukvak sakpa, amah tungtang nang bang nachi ngaihtuah ei?” achi ua, aman Jawlnei ahi achi hi.

¹⁸Hinanleh Judate`n amit hungvakpa nu leh pa asap masiah uh mittaw ana hi a, ahung vakta ahi chih a tungtang thu agingta kei uhi.

¹⁹Tualeh amau`n anu leh pa kiangah, “Hihpa na tapa uh mittaw a piang achihpa uh ahi maw; bangchi`n ahia tua ahung muhtheih?” achi ua.

²⁰Anu leh apa`n amauh adawng ua, “Hih ka tapa uh ahi a, tualeh mittaw in apiang chih ka thei uhi.

²¹Hinanleh bangchi`n ahia tua ahung muhtheihtak chih ka theikei uh, tualeh kua`n amit abawl vaksak ahia chihzong ka theikei uhi. Mi piching ahina; amah dong un, ama thu aman akigen na ding;” chi`n adawng ua.

²²Hihthu anu leh apa`n Judate alaujiak ua agen uh ahi, ajiak Judate`n masang a pat in amah Krist ahi chia phuang aom leh kikhopna inn a pat nohkhiat ding chi`n lem ana sakhinta uhi.

²³Tuajiakin ahi anu leh pa`n, “Mi piching ahina, amah dong un achih uh!”

²⁴Tuachi`n Judate`n mittawpa a samkik ua akiang ah, “Pasian pahtawi in! Hihpa pen mikhial ahi chih ka thei uh,” achi ua.

²⁵Aman adawng a, “Mikhial ahihleh hihlouh ka theikei, silkhat ka thei hi: Mittaw ka hi a, tuin ka mutheita hi,” achi hi.

²⁶Tuachi`n amau`n akiang ah, “Aman natung ah bang ahia abawl? Na mit bang ahung chibawl vaksak ahia?” chi`n adong kik ua.

²⁷Aman, “Kunghilhta a, hinanleh na januam kei uh. Bang ding a januam kik nahi ua? Nou zong a nungjui hih ut nahi uh maw?” chi`n adawng hi.

²⁸Tuachi`n amah atai ua, “Nang amah nungjui nahi a; kou Mosi nungjui ka hi uh, achi uhi.

²⁹Pasian in Mosi kiangah thu agen chih ka thei uh; hihpa ahihleh khoi a kipan a hungpai ahia chih ka theikei uh!” achi ua.

³⁰Amahpa`n adawng a akiang uah, “Ahuachih natak mah ahi a lamdanna! Khoi a kipan a hungpai ahih na theihlouh uh! Amanlah ka mit a hungbawl vaksak ngal a.

³¹Pasian in mikhialte thu a ngaikhia ngaikei chih ithei uhi; hinanleh mi kuahileh Pasian ngaihsak a, adeihlam bawlte Pasian in a ngaikhiajel hi.

³²Leitung pianchil a kipan kuaman mittaw apiang mit abawl vaksak chih ka ja ngai kei.

³³Hihpa Pasian a kipan ahihkeileh bangmah a bawlthei kei ding,” achi hi.

³⁴Amau`n adawng ua akiang ah, “Nang mikhialsa a piang in kou nung hilhvial maw?” achi ua. Tuachi`n amah kikhopna inn a pat a notdokta uhi.

³⁵Jesu`n amah anotdok uh chih ajak in, tualeh amah amuh in akiang ah, “Pasian Tapa na gingta hiam?” achi a.

³⁶Aman adawng a, akiang ah, “Toupa, amah kua ahia, hunghilh in ka gintat theihna dingin!” achi a.

³⁷Jesu`n akiang ah, “Amah na muta a, tualeh nang hung houpihpa ahi,” achi a.

³⁸Tuachi`n aman, “Toupa, ka gingta hi,” achi a, tuachi`n amah abiata hi.

³⁹Tualeh Jesu`n, “Mutheiloute`n ahung muhtheihna dingin leh mit vakte mit ahung tawtna dingin leitung ah hungpai ka hi,” achi hi.

⁴⁰Akiang a om Pharisai khenkhatte`n hihthute ajak un, akiang ah, “Kou zong mittaw ka hi uh hiam?” achi ua.

⁴¹Jesu`n akiang uah, “Mittaw hile uchin khialhna neilou ding hi uchin a; hinanleh tuin ka muthei uh, nachi ua; tuajiakin na khialhna uh a omjing hi,” achi hi.