Read Thangal Naga NASEPTE 10 Bible Online

NASEPTE 10 - Thangal Naga bible

NASEPTE 10

¹Tualeh, Kaisaria khua ah amin Kolnelia kichi mi khat aom a, “Itali galkap pawl a jalamkai ahi a.”

²Pasian ngaihsakmi ahi a, a innkuante jousiah tawh Pasian laudan asiam ua, mi kiang ah sil tampi apia a, tualeh Pasian kiang ah zong a thum jing hi.

³Aman sun dakkua ding vel in mangmu bangin, chiantakin Pasian vantungmi khat akiang a lut a, “Kolnelia!” chi`n amu a.

⁴Tuachi`n Kolnelia in, amah a etleh, alau a, “Toupa, bang ahita a?” achi a. Tuachi`n vantungmi in akiang ah, “Na thumnate leh na silpiakte theihjing dingin Pasian maiah ahung tungtouta hi.

⁵Tualeh tuin Joppa khua ah mi sawl inla, mi khat amin Simon, amin khem Peter kichi va samsak in.

⁶Amah ahihleh tuipi gei a om, savun bawlpa Simon inn a tung ahi,” achi a.

⁷Tuachi`n vantungmi Kolnelia houpih pen apaikhit tak in Kolnelia in asilate lak a mi nih leh amah nna sepsak jingte lak a Pasian ngaihsak galkap mi khat asam a.

⁸Tuachia thu jousiah akiang ua a hilhkhit takin Joppa khua ah asawlta hi.

⁹Ajingni a apai laiun, tualeh khuapi atunkuan un, Peter thum dingin intung ah akahtou a, sun dakkal gukna ding vel ahi a.

¹⁰Tuachi`n agil ahung kial mahmah a, annek a ut a, hinanleh nek ding a bawllai un ana haitu man a. [3]

¹¹Tualeh, van kihong in, banghiam bawm liantak khat aningli a kikhih a, leia hung ki khaikhiasuk in amu a.

¹²Huasung ah leitung a kengli nei ganhing chichin teng leh gamsate leh ganhing bokvakte leh tungleng vasate aom a.

¹³Tualeh akiang ah aw khat in, “Peter thou inla, tualeh that inla ne in!” achi a.

¹⁴Hinanleh Peter in, hilou e, “Toupa! ajiak sil sianglou leh anin kichi mawng mawng ka nengai kei hi,” achi a.

¹⁵Tualeh aw in anihveina in, “Pasian in a suksiangthousa nang siangthoulou chiken,” achi hi.

¹⁶Tuachibang in thumvei ahung om a, tuachi`n asil bawm pen van ah khaitouh in aom kikta hi.

¹⁷Tualeh Peter in mangmu bang a asilmuh angaihna theilou a abuai laiin, ngaiin Kolnelia misawlte`n Simon inn a kankhiata ua, kelkot bul ah ana ding ua.

¹⁸Tualeh asam ua, “Simon, aminkhem Peter achih uh atun leh atun louh ana dong ua?”

¹⁹Peter in mangmu bang a asilmuh pen angaihtuah laiin, Khasiangthou in akiang ah, “Ngaiin! Mi thum in ahung zong uhi.

²⁰Thou inla, tualeh kumsuk inla, bangmah ginglah louin amauh juiin, amauh kasawl ahi uh,” achi hi.

²¹Tuachi`n Peter Kolnelia misawlte kiang ah apaisuk a, akiang uah, “Kei ka hi nazon uh. Bang jiak a hungpai nahi ua?” achi a.

²²Tualeh amau`n, Pasian a pat a vantungmi siangthou khat in, “Kolnelia galkap zalamkai midiktak, Pasian lauhdan siam, Judami jousiahin agenphat, kiang ah na thugen ajakna ding a a inn a nang samsak dingin ahilh hi,” achi ua.

²³Tuachi`n amauh asamlut a, agiak sakta a. Ajingni in Peter amauh tawh apai a, tualeh Joppa khua ah gingtu unau kuate hiam in amah a kitonpih uhi.

²⁴Tualeh ajingkik in Kaisaria khua ah alutta ua, tualeh Kolnelia in a sanggam ittakte leh alawm deihtakte samkhawm in amauh ana ngak jing a.

²⁵Tualeh Peter ahung lut kuan in Kolnelia in ana lamtuah a, akeng bul ah khupbok in Pasian biak bangin ana bia hi.

²⁶Hinanleh Peter in amah akaithou a, “Ding in, kei zong mihing ka hi,” achi hi.

²⁷Tualeh, amauh tawh kihoulim kawm in, innsung ah alut ua, mi tamtak omkhawm amuta a.

²⁸Tualeh akiang uah, “Judami nam dang tawh kipawl a, akiang ua pai asian louhdan nathei uh, hinanleh, kuamah sianglou leh nin kachih ding ahikei, chih Pasian in ahung theisak hi.

²⁹Tuajiakin nungsap tak un niallou in kungpai pai ahi. Tualeh nung sapna san uh bang ahiam?” achi hi.

³⁰Tuachi`n Kolnelia in, “Ka anngawlna nili ahita hi, tualeh ka inn ah dakkua ding vel in kathum a, tualeh ngaiin, mikhat puanngou silh kamai ah ahung ding a

³¹tualeh: ‘Kolnelia! Na thumna jak in a omta, tualeh mi kiang a na silpiak zong Pasian in atheijing hi.

³²Tuajiakin Joppa khua ah mi sawl inla Simon, amin khem Peter achih uh na kiangah sam in. Amah tuipi pang a savun bawlpa Simon inn a tung ahi,’ achi hi.

³³Tuajiakin na kiang ah mi kung sawl pai hi. Nung pai hi ahoih hi. Tuachi`n Pasian in na kiang a, ahung thupiak jousiah jading in tuin Pasian mitmuh in ka un un hihsan ah ka om uhi,” achi hi.

³⁴Tuachi`n Peter in agen a, “Pasian in mi deihsak tuam anei kei hi, chih diktakin ka thei hi.

³⁵Hinanleh, namchin lak ah kuapeuh Amah lauhdan siam a, diktattak a gamtang peuhmah apahtatmi ahi hi.

³⁶Pasian in, khamuanna thu Jesu Krist min in agen a, Israel suante kiang a akhak pen Jesu hih mijousiah Toupa ahi.

³⁷Johan in a tangkou pih baptisma nung in, thu Galili gam a panin ahung thang pan a, Judea gam jousiah ah a thangsuak a, nou nathei uhi.

³⁸Nazareth Jesu tungtang thu, Pasian in amah pen Khasiangthou leh silbawl theihna a athuam dan. Amah pen Pasian akiang a aom jiakin mi tung a silhoih bawl leh dawiin abawl gentheih jousiah damsak in avak kawikawi a.

³⁹Tualeh Judate gam leh Jerusalem khua a asil bawl jousiah theihpihtu ka hi uhi, Amah pen singdawn a khai in athat lum ta ua,

⁴⁰Amah pen Pasian in nithum nin a kaithou kik a, chiantak in amusak hi,

⁴¹mijousiah kiang ah ahikei a, hinanleh Pasian in theihpihtu aguatkholhte kiang guak ah ahi, kou misi lak a pat athohkik nung a, akiang a ne a dawnte kiang ah.

⁴²Tualeh amah pen mihing misite tung a vaihawm ding a Pasian guat ahi chih, mi kiang a tangkoupih ding leh theisak dingin Pasian in thu ahung pia hi.

⁴³Kuapeuh amah gingta in amin jal a khialhnate ngaihdamna amu ding uh chih a tanchin pen Jawlnei jousiahin ana theihsaksa uh ahi,” achi hi.

⁴⁴Peter in hih thute agen laitak in, athu jajousiah tung ah khasiangthou a hungtungta a.

⁴⁵Tualeh teptante lak a gingtute Peter tawh hung paite`n Khasiangthou piak pen Jentelte tung a zong buak ahih jiakin lamdang asa mahmah uhi.

⁴⁶Amau`n ham theihlouh a thu gen in Pasian phat in aja ua, tuachi`n Peter in,

⁴⁷“Hih mite eimah bang a Khasiangthou tang ve in baptisma atan louhna ding un mi`n tui zak akham thei ding uh maw?” achi a.

⁴⁸Tuachi`n Toupa Jesu min a baptisma tang dingin thu apia a, tuateh ni bangjah hiam ta`m ding in akhouhta uhi.