Read Thangal Naga NASEPTE 11 Bible Online

NASEPTE 11 - Thangal Naga bible

NASEPTE 11

¹Tualeh Judea gam a sawltakte leh gingtu omten Jentelte`n zong Pasian thu asangta uh chih, ajata ua.

²Tualeh Peter Jerusalem khua atuntouh takin teptanten akiang ah,

³“tep tanloute inn ah na lut a, akiang uah nane vial a chi`n akalh ua!”

⁴Hinanleh Peter in sil omdan abul a kipat in akizom jelin akiang uah a hilhchian a, hichi a chi in:

⁵“Joppa khua a thum a ka om laitak in, mangmu bangin ka om a. Bang hiam bawm liantak khat ningli a khih van a kipat a kikhaikhia ka mu a, ka kiang mahmah ah a hungtung a.

⁶Tuapen ka enkil kel a, ka ngaihtuah a, tualeh lei a gamsa kengli neite, gamsate, ganhing bawkvakte leh tungleng vasate kamu a.

⁷Tualeh aw in, ‘Peter, thou inla; that inla ne in!’ hungchi`n kaja a.

⁸Hinanleh ken, ‘Toupa! Hilou e, ajiak pen sianglou leh nin mawng mawng bangmah ka kam ah alut ngaikei,’ kachi a.

⁹Hinanleh van a kipanin aw in, ‘Pasian in a suksiangsa nang sianglou chiken,’ ahung chikik a.

¹⁰Tualeh hichi bang ngen in thumvei ahung om a, tuachi`n aun in van ah khaitouh in aom kikta hi.

¹¹Tualeh tuahun mahmah in mi thum Kaisaria a pat a ka kiang a ahung sawl uh ka omna inn ah ana tung uh a.

¹²Tuachi`n Kha in ginglahlou leh kuamah khentuam neilou a amauh jui dingin ahung sawl a, hih gingtu mi gukten zong ahung jui ua, ka un un Kolnelia inn ah kalut uhi.

¹³Tualeh aman ka kiang uah, a inn a vantungmi ding amuh dan leh vantungmi in akiang ah, ‘Joppa khua ah mi sawl inla, Simon, aminkhem Peter achih uh vasam sak in.

¹⁴Aman thu ahung hilh ding a, tua thu in nang leh na innkuanpihte hundam in na om ding uh, achih dan zong ahung hilh hi.’

¹⁵Tualeh thu ka gen pat leh Khasiangthou itung a ahung tunchil lai mahbang in katung uah a hungtungta a.

¹⁶Tuachi`n Toupa thu: ‘Johan in tui in mi a baptis jel a, hinanleh noujaw Khasiangthou in baptisma nungtang ding uh,’ achih pen kung theikhia kikta hi.

¹⁷Tuajiakin, ei Toupa Jesu gingtate kiang a Pasian in silpiak a hungpiak bang akiang ua a piaknung in keibang leltak Pasian nialgual ka hi ding maw!” achi hi.

¹⁸Huathu ajak tak un adaita ua, “Tuachi ahihleh Pasian in Jentelte zong hing dingin akisik uh phal ahita ve!” chi`n Pasian aphatta uhi.

¹⁹Tualeh Stephen jiak a a bawlgentheih uh, ataijakte pen Phoinisia gamte, Kupra gamte, Antiok khua tanpha in ajin ua, Judate kiang guak chihlouh kuamah kiang ah agen kei uhi.

²⁰Hinanleh alak ua khenkhat Kupra gam leh Kurini khua a mi ahi ua, tua mite`n Antiok khua atun un Grikte zong ahoupih ua, Toupa Jesu tangthupha ahilhta uhi.

²¹Tualeh Toupa khut in amauh apanpih a, mi tamtakin agingta ua, Toupa lam ahung ngata uhi.

²²Tuachi`n hihthute Jerusalem khua a saptuam omte bil ah alutta a, tualeh Antiok khua tung ding in Barnaba asawl khia ua.

²³Tualeh amah avatun a, Pasian hehpih dan avamuh in akipak mahmah a, phattuamngai tak a Toupa tujing dingin aun un a hanthawnta hi.

²⁴Amah pen mihoihtak ahihjisak in, Khasiangthou leh ginna adim ahi a, tualeh mi tamtak Toupa kiangah atelbehta uhi.

²⁵Tuachi`n Barnaba pen Saul zong ding in Tarsa khua ah apaita hi.

²⁶Tualeh amah amuhtakin Antiok khua ah ahung paipih a, tualeh hichi ahung hi a, kumkhat sung pumpi kikhopna ah ajau ua, mi tampi thu ahilh uhi. Tualeh Antiok khua ah nungjuite Kristian a kichi masapen uhi.

²⁷Tualeh tualaiin Jerusalem ah Jawlnei kuate hiam Jerusalem khua a kipat in Antiok khua ah a hungpai ua.

²⁸Tuachi`n alak ua mikhat amin Agaba, ading a, leitung pumpi ah kial thupitak tung ding ahi, chih Khasiangthou in amusak a. (Tua kial pen Klaudia Kaisar lallai in a hungtung hi.)

²⁹Tuachi`n nungjuite`n a ngap dan chiat un Judea gam a gingtu omte kiang ah panpihna khak asawm ua.

³⁰Tuapen abawlta ngei ua, Barnaba leh Saul khut ah upate kiang ah akhakta uhi.