Read Thangal Naga NASEPTE 13 Bible Online

NASEPTE 13 - Thangal Naga bible

NASEPTE 13

¹Tualeh Antiok khua a saptuam omte lak a Jawlnei leh siate aom ua: tuate ahihleh Barnaba, Simeon, (Nigar kichipa,) (Kurini khua a om Lusia kumpipa Herod tawh khangkhawm) Manaen, leh Saulte ahi uhi.

²Tualeh Toupa nna sem a an a ngawl laiun, Khasianthou in, “Barnaba leh Saul keima nna sem dingin hung khenkhiat sak un,” achi hi.

³Tuachi`n an a ngawl ua, athum zoh un, atung uah khut anga ua, a paisakta uhi.

⁴Tuachi`n Khasiangthou sawlkhiat in Seleusia khua ah apaisuk ua, hua a kipan in Kupra lam juanin gunkuang in apaita uhi.

⁵Tualeh Salami khua a aom laiun, Judate kikhopna innte ah Pasian thu agen ua, tualeh Johan zong a nna uh semsak dingin azoh pih uhi.

⁶Tualeh Kupra tuikulh gam tawnsuak in Paphos khua ah atung ua, huasan ah mitphial dawisiam, jawlnei taklou Juda mikhat amu ua, amin Bar-Jesu ahi.

⁷Hihpa pen gam uktu Sergia Paulas mipiltak kiang a om ahi a. Tua gam uktu in Saul leh Barnaba a sam a, Pasian thu jak a ut jiakin.

⁸Hinanleh Elima ( grik ham a Bar-Jesu min dang khat ahi ) dawisiam pa`n ginglouh sak teitei sawm in amauh ana khak hi.

⁹Tuachi`n Saul, Paul zong a kichi- pen Khasiangthou in adim a, amah a ensaal a

¹⁰tuachi`n, aw nang mikhem leh hoihlouhna chinteng a dimpa, “Nang dawi tapa! Nang diktatna jousiah melmapa. Toupa lam diktakte suksiat tawplou ding nahi maw!

¹¹Tuin ngaiin, Toupa khut na tungah atu hi, namit ahung taw ding a, bangtan hiam nisa vak mulou in na om ding,” achi hi. Tuachi`n thakhat in tuimei mial khat a tungah ahung kia a, khut a kaitu ding zongin avak kawikawita hi.

¹²Tuachi`n gam uktu in tua sil kibawl pen amu a, Toupa thuhilh lamdang asa mahmah a, agingta ta hi.

¹³Tuachi`n Paul pen alawite tawh Paphos khua a pat in apai ua, Pamphilia gam a Gerga khua atung ua, tualeh Johan in amauh paisan in Jerusalem khua ah a kikta hi.

¹⁴Hinanleh amauh Perga khua a pat apaijel ua Pisidia gam a Antiok khua atung ua, tualeh khawlni-in kikhopna inn ah alut ua, avatou ua.

¹⁵Tualeh dan laibu leh Jawlneite laibu asim zoh un kikhopna inn upate`n akiang uah mi asawl ua: “Unaute aw, mi hasotna thu gen ding naneih uleh gen un,” achi ua.

¹⁶Tuachi`n Paul ading a, khut jap in agen a: “Israel mite leh Pasian lauhdan siam mite aw: ngaiun!

¹⁷Hih Israel namte Pasian in Ipu leh pate uh atel a, Izipt gam a gamdangmi bang a aomlai un abawl thupi a, tualeh asil bawltheihna thupitak tawh huasan a kipan in apuikhiata hi,

¹⁸tualeh kum sawmli sung vel gamdai a asil bawlte uh athuak teitei a.

¹⁹Tualeh Kanan gam a Nam sagihte asukmang zoh in agam uh akiang uah ahawmsak hi.

²⁰Huanung in kum zali leh kum sawmnga vaihawmtute apia a, “Jawlnei Samuel tan chiang in.

²¹Tualeh hua nungin kumpi a ngen ua, tuachi`n Pasian in Saul, Kis tapa Benjamin phung a mi amauh apia a, kum sawmli sung ding in.

²²Tualeh amah a suanmang nung in a kumpipa ua pang dingin David atung khia kikta a. Pasian in huapa thu theisak in, ‘David, Jessai tapa, Ka lungtang bang pua mi ka mukhiata hi,’ aman ka deihlam abawl ding hi, achi hi.

²³Hih mipa suante lak ah Pasian in achiam dungjuiin Israelte kiang ah hundampa Jesu ahung dingkhia sakta hi.

²⁴A hung paima in Johan in kisikna baptisma thu Israel mi jousiah kiang ah anahilh masa hi.

²⁵Tualeh Johan in a nasep azohkuan in, ‘Nou kua hiding in nung gingta ua? amah tuh hilou ka hi. Hinanleh ngaiun, ka nung ah mi khat hungpai ding ahi, kei pen a khedap khau sut ding a zong chinglou ka hi,’ achi hi.

²⁶“Unaute aw, Abraham suan a tate aw, nalak ua Pasian laudan siamte tengteng aw: na kiang uah hih hundamna thu hung kikhak ahi!

²⁷Jerusalem khua a omte leh a lamkaite un ana theihlouh jiak un. Tualeh khawlni teng a kisim Jawlneite thu ana theihlouh jiak un amah siamlouh tangsak in hua thute ana tangtung sakta uhi.

²⁸Asihna ding khop atung a bangmah amuhlouh un zong, Pilat kiang ah hihlum dingin a ngen ua.

²⁹Tualeh a tungtang thu a kigelhsa jousiah asuk tangtung zoh un, sing a kipan in a lakhia ua han ah asialta uhi.

³⁰Hinanleh amah pen Pasian in misi lak a kipat akaithou kikta a.

³¹Tualeh amah tawh Galili gam a kipat a Jerusalem khua a paitoute kiang ah ni tampi sung akilak a. Hua mite pen tuin mi kiang a athu theihpihtute ahi uhi.

³²Tualeh kouzong Ipu leh pate kiang a chiamsa: hua thuchiam tanchin kipahpih huai kung hilh uhi.

³³Pasian in Jesu akaihthoh kikna ah, tuapen ei atate kiangah a tangtungsak hi. Psam, nihna a, ‘Nang, ka Tapa na hi a; tuni a kung hin na hi,’ chih gelh bang in.

³⁴Tualeh muatna mun a paikik talou ding a Pasian in amah misi lak a kipat akaihthoh ding dan thu hichin a gen hi: ‘David kiang a om hehpihna thawnloute Nangmah kung pia ding hi,’ chi in.

³⁵Tuajiakin aman psam dang ah, ‘Na misiangthou muatmang naphal kei ding hi,’ a chihbeh lai hi.

³⁶Ajiak David in Pasian vaihawmsak bang a amah khang a mite nna asepsak zoh in, a ihmu a, tualeh Ipu leh pate kiang ah asialta ua, amuat mangta hi.

³⁷Hinanleh Pasian kaihthohte injaw muatna amu kei ding uhi.

³⁸Tuajiakin hihthu theiun unaute aw, amah jiakin khialh ngaihdamna thu na kiang ua kigen ahi hi.

³⁹Tualeh kuapeuh agingta jousiah Mosi dan a siam natan zohlouhna uh sil jousiah ah siamtansak in aom hi.

⁴⁰Tuajiakin pilvang un, atuachih keileh Jawlneite laibu a kigen natung uah a hungtung kha ding hi.

⁴¹‘Nou, simmohtute! En un, tualeh lamdang sa unla, mangthang un! Ajiak na damsung un nna khat kasem hi, tua nna pen mi`n nou hunghilh nanleh na gingtabaih kei ding uhi!’ ” chih achi hi.

⁴²Tualeh Judate kikhopna inn a pat apawt un, Jentelte`n khawlni kik chiang a huathu gen dingin a ngen ua.

⁴³Tualeh kikhawmte a kikhenjak tak un Judate tamtak leh Judate biak dan jui Pasian ngaihsak lak a mi tamtak in Paul leh Barnaba ajui ua, amau`n amauh ana houpih ua, Pasian hehpihna a om gige dingin ana hasuan uhi.

⁴⁴Khawlni kik in a khuajang phial un Pasian thu ngaiding in ahung kikhawm ua.

⁴⁵Hinanleh Judate`n mipite amuh tak un, a thangsia mahmah ua, Paul thugen akalh ua, agensia uhi.

⁴⁶Tuachi`n Paul leh Barnaba in hangsan takin agen ua: “Pasian thu pen nou kiang a gen masak ding mawng ahi a, hinanleh na nial ua, tangtawn a hingtaklou a na kibawl jiak un, Jentelte lam ka ngata uhi.

⁴⁷Ajiak Toupa`n kou hichibang in thu ahung pia hi: ‘Jentelte vak hi dingin kungguat ahi, leitawp tanpha a hundamna hi dingin, chih gelh bangin,’ ” achi hi.

⁴⁸Tualeh Jentelte`n huathu ajak un akipak ua, Toupa thu apahtawi ua, tualeh tangtawn a hingding a seh leh guat taphot in agingta uhi.

⁴⁹Tualeh Toupa thu tuagam pumpi ah a kithehjakta hi.

⁵⁰Hinanleh Judate`n Pasian ngaihsak numei zahtak huaite leh khuasung upate achial ua. Paul leh Barnaba a thuaksak ua, agam ua pat a delhmangta uhi.

⁵¹Tuachi`n amaute mohsakna in a kengphang ua leivuite athinkhum ua, Ikonium khua ah apaita uhi.

⁵²Tualeh nungjuite kipakna leh Khasiangthou in a dimta uhi.