Read Thangal Naga NASEPTE 15 Bible Online

NASEPTE 15 - Thangal Naga bible

NASEPTE 15

¹Tualeh mi kuate hiam Judea gam a pat Antiok ah ahung paisuk ua, “Mosi dan bang a tep natan kei uleh hundam na hithei kei ding uh,” chi`n unaute ahunghilh ua.

²Tualeh Paul leh Barnaba amauh tawh hahsel in akisel ua, a kikhing jiak un, Paul leh Barnaba pen alak ua kuate hiam tawh hua thubuai tungah Jerusalem khua a sawltakte leh upate kiang a hawhtou dingin asawl ua. [5]

³Tuachi`n saptuamte`n avakha ua, amau`n Jentelte lunghei kik dan thu genjel in Phoinisia leh Samaria gam a tawnsuak ua, tuachi`n unaute nasatak in a kipaksak uhi.

⁴Tualeh Jerusalem khua atun un saptuamte leh sawltakte leh upate`n ana kipahpih ua, tualeh Pasian in amauh zang a a silbawlte jousiah agen uhi.

⁵Hinanleh Pharisai pawl a gingtu kuate hiam akipan ua, “Jentelte`n tep atan ua, tualeh Mosi dan zong hilh ding mah ahi,” achi uhi.

⁶Tuachi`n sawltakte leh upate huathu ngaihtuah dingin akikawm ua.

⁷Tualeh hahnial a akinial nung un Peter akipan a, akiang uah, “Unaute aw, Jentelte`n keimah kam a tangthupha ja a, agintat na ding ua, Pasian in nidanglai a ilak uapat ahung guatdan nathei uhi.

⁸Tualeh lungsim theitu Pasian in eite ahung piak bang mah in Khasiangthou akiang uah apia a, atheihpihta hi.

⁹Tualeh eite leh amauh khentuam neilou in, ginna in alungsim ahih siangthou hi.

¹⁰Tualeh Ipu leh pate leh eite`n zong izohlouh sa uh hakkol pen tuin nungjuite ngawng a bat tum a bangdin Pasian ze-et sawm na hi ua?

¹¹Hinanleh amauhte bangin eite zong Toupa Jesu Krist hehpihna jiak a hundam ding hi in iki gingta uhi,” achi hi.

¹²Tuachi`n mipi jousiah adaita ua, Barnaba leh Paul in, Pasian in amauh zang a, Jentelte lak a chiamtehna leh sillamdang abawl thu agen uh a ngaikhia uhi.

¹³Tualeh agenzoh un Jakob in agen a, “Unaute aw, ka thu ngai un!

¹⁴Pasian in Amah min puading a alak ua honkhat lakhia dingin amasa in Jentelte aveh chih thu Simon in a genta hi.

¹⁵Tualeh hih thu leh Jawlneite thu aki tuak hi,

¹⁶‘Hih zoh chiangin kung paikik ding a, David biak inn puksa ka bawl kik ding. Asiatnate ka bawlkik ding a tuachi`n ka tungding ding hi.

¹⁷tuachia midangten Toupa a zontheihna ding un, Jentel ka min a kisam jousiahte nangawn in zong, hih silte jousiah bawlpa Toupa`n achi hi, chih gelh bang in.

¹⁸A silbawlte jousiah pen tanglai a pat in Pasian theihpih ahi.’

¹⁹“Tuajiakin, Jentelte lak a Pasian lam a kiheinate pen sukbuai dahlei chih ka ngaihdan ahi.

²⁰Milim biakna; silnin nekte, kingaihte; sa heklup leh sisan nekte tawpsan dingin akiang uah gelhlei ka chijaw hi.

²¹Ajiak nidanglai a pat in Mosi in khuachin ah athuhilhtu anei a, kikhopna inn ah khawlni tengin athu sim jeljel ahi,” achi hi.

²²Tuachi`n sawltakte leh upate, saptuamte jousiah tawh, alak ua mi tel a, Paul leh Barnaba tawh Antiok khua a paisak hoih asa ua. Atelte uh min ahihleh Juda, amindang Barsaba, leh Sila ahi ua, amauh unaute lak a lamkai ahi uhi.

²³Hih laikhak pen hihbang in a gelh uhi: “Sawltakte, upate leh unaute`n, Antiok khua leh Suria leh Silisia gam a om Jentel unaute chibai abuk uhi.

²⁴Kalak ua mi kuate hiam in tep natan ua tualeh dan zong najuih ding uh ahi chia thu genin nou ahung buaisak ua, na lungsim uh a mangbang sak uh chih ka thei ua, akiang uah lah thu bangmah kapia ngal kei ua.

²⁵Tuajiakin lungsim munkhat pua a ka kikhop un, mi telkhia a ka deihtak uh Barnaba leh Paul,

²⁶Toupa Jesu Krist jiak a sih khawk salou a, om tegel tawh na kiang ua hungsawl dingin hoih kasa uhi.

²⁷Tuachi`n Juda leh Sila kung sawl uhi, amau`n zong hihthu kam in a hunghilh ding uhi.

²⁸Ajiak Khasiangthou leh kou, hih thupoimohte chihlouh puakgik dang bangmah na tung uah ka ngaklouh uh hoih kasa uhi.

²⁹Milim biakna sanekte; sa heklup nekte, sisan nekte leh kingaih hatnate hihte natan uleh na bawlhoih ding uhi; mangpha chi in.”

³⁰Tuachi`n a sawlkhiata ua, Antiok khua atung ua, tualeh mipi asam khawm ua, laikhak pen apiata uhi.

³¹Hua asim zoh un khamuanna thu ajak jiak un akipak mahmahta uhi.

³²Tualeh Juda leh Sila zong Jawlnei ahi ua, tuamun a sanggamte thu tamtak in a hanthawn ua ahahkip sem uhi.

³³Tualeh huasan a sawttak aom nung un amauh khamuang takin unaute lak a pat sawltakte kiang ah apaisakta uhi.

³⁴Sila in huasan a om takdih hoih asa hi.

³⁵Paul leh Barnaba pen Antiok khua ah midang tamtakte tawh Toupa thu hilh leh gen in aom jing uhi.

³⁶Tualeh nibang jah hiam nungin Paul in Barnaba kiang ah, “Ipai kik ding a khuachin a Toupa thu igenna jousiah a unaute vavehni, bangchi`n aom uai chih iva en ding,” achi a.

³⁷Tualeh Barnaba in Johan, aminkhem Marka pen akiang ua tonpih atum a,

³⁸hinanleh amah, Pamphilia gam a amauh kiksan a, a nasepna a amauh tawh pailoupi akiang ua tonpih ding pen Paul in hoih asakei hi.

³⁹Tuachi`n hahnial in akinialta ua, tualeh akikhen ua: Barnaba in Marka apui a, Kupra gam ah gunkuangin apaita hi,

⁴⁰tualeh Paul in Sila atel a, unaute`n Pasian hehpihna akepsak nung un a paikhiata uhi.

⁴¹Tualeh saptuam detsakjel in Suria leh Silisia gam atawnsuak uhi.