Read Thangal Naga NASEPTE 16 Bible Online

NASEPTE 16 - Thangal Naga bible

NASEPTE 16

¹Tuachi`n amah Derbe leh Listra khua a hungtung a, tualeh ngaiin, huasan ah Timothi kichi nungjui khat aom a. Amahpen gingtu Juda numei kuahiam tapa ahi a, hinanleh apa Grikmi ahi.

²Amah pen Listra leh Ikonium khua a om gingtute`n agen phat mahmah uh ahi.

³Paul in amah tonpih dingin adeih a, tualeh apaipih a hualak a Juda omte jiakin atep atansak a, amau`n apa Grikmi ahi chih atheih jiak un.

⁴Tualeh khuapite tawn a apaikawm un amau`n Jerusalem khua a om sawltakte leh upaten juihding a anamdet uh thupuknate akiang uah apiakhia uhi.

⁵Tuachi`n saptuamte ginna ah adetta ua, niteng in apung deuh deuhta uhi.

⁶Tualeh, amau`n Phrigia gam leh Galatia gam atotsuak zoh un Khasiangthou in Asia gam a thugen akham a.

⁷Misia gam kiang atun un, Bithinia gam ah lut atum ua, hinanleh Khasiangthou in aphal kei hi.

⁸Tuachi`n Misia gam akhen ua Troas khua ah apaita uhi.

⁹Tualeh janlai in Paul in mangmu bangin Mesidonia gam a mikhat dingin, “Mesidonia gam ah hung galkai inla, hung panpih in!” chia genin amu a.

¹⁰Tualeh Paul in mangmu bang a sil amuh zoh in Mesidonia gam a pai ka sawmpai ua, akiang ua tangthupha gen dingin Pasian in ahung sap ahi chih chiantak in kathei uhi.

¹¹Tuachi`n Troas khua a pat gunkuang in kapai ua, tangtakin Samothrakia ah kapai ua, ajingin Neapoli ah kapai jel uhi.

¹²Tualeh hua khua a pat Philippi khua ah kapai ua, huapen Mesidonia gam a khua poimoh pen khat ahi a, Rom khua a mipemte khua ahi. Hua khua ah ni tamdeuh katam uhi.

¹³Tualeh khawlni in khuapi pualam ah luipang ah thumna mun hi a ka gintatna mun uah kapai ua, ka tou ua, numei hung paikhawmte kiang ah thu ka gen ua.

¹⁴Tualeh numei khat amin Lidia, puan sandup juak Thiatira khua a om Pasian biami in ka thu uh aja a, Paul thugen juiding in Pasian in a lungtang ahonsak a.

¹⁵Tualeh amah leh a innkuanten baptisma atanzoh un, “Toupa a gin-om a nungseh uleh, ka inn ah hungpai unla hungtung un,” chi`n ahung ngen a. Tuachi`n ahung khouhtang teitei ta hi.

¹⁶Tualeh hichi ahung hi a, thumna mun a ka pailai un, sila nungak kuahiam dawi aisan siam khat in ahung kituah pih a. Aman a aisan jiakin apute sum tamtak amuhsak jel hi.

¹⁷Hihnu`n Paul leh kei ahung jui a, kikou in, “Hih mite hundamna lampi hunghilhte ahi! Tungnung pen Pasian silate ahi uh!” achi a.

¹⁸Tualeh hichi`n ni sawttak abawl a, tuachi`n Paul a lunghimoh a, akihei a dawi kiang ah, “Jesu Krist min in asung a kipat pawt thu kungpia ahi!” achi a. Tualeh amah hualaitak in apawtpai hi.

¹⁹Hinanleh, apute`n asum muhna uh abei chih atheihtak un, Paul leh Sila aman ua, mipilak a lamkaite mai ah akailut uh a.

²⁰Tualeh thukhentute kiang ah apaipih ua, “Hihte Judami ahi ua, ka khua uh ahah sukbuai mahmah uhi.

²¹Tualeh ei Rommi in ilak leh izop sianglou dante juihsak ahung sawm uhi,” achi ua.

²²Tuachi`n mipite amauh vuading in ahung kisa ua. Tualeh thukhentute`n apuan uh a bohkeksak ua, chiang a jepding in thu apia uhi.

²³Tualeh tamveipi ajep zoh un thong ah akhum ua, avengtu kiang ah bittak a veng dingin thu apia a.

²⁴Huachitak a thu apiak jiak un aman tanna inn sungnungjaw ah akhum a akengte uah sikkol a bulhsak hi.

²⁵Hinanleh jankhang laiin Paul leh Sila in thumna anei ua, Pasian kiang ah phatna la asa ua, tualeh midangte in angaikhia uhi.

²⁶Thakhat in jin thupitak ahung kiling a, tuachi`n thong khuambulte akiling jak a, tualeh kongkhak jousiah aki hawng a, kol kibulh jousiah akiphel siangta hi.

²⁷Tuachi`n thong vengtu ihmu ahung halh a, tualeh thong kot kihong amuh in thong a tangte taimangta uh asa a, a namsau adok a akithah sawmta hi.

²⁸Hinanleh Paul aw ngaihtakin akikou a, “Bangmah kilawh ken ka un un hiah ka om uhi!” achi hi.

²⁹Tuachi`n avengtu in mei tangin ajong a, atawmlut a, kithing kawm a hungpaiin, Paul leh Sila kiang ah a khupbokta hi.

³⁰Tualeh amauh ahung paikhiatpih a, “Siate, hutdam a ka om nangin bang ka bawl diam?” achi a.

³¹Tuachi`n amau`n, “Toupa Jesu gingta in, tuachi`n hundamin na om ding nang leh na innkuante tawh,” achi ua.

³²Tuachi`n amau`n akiang leh a inn a om jousiahte kiang ah Toupa thu a genta uhi.

³³Tualeh aman amauh tuajan in, huahun laitak mahmah in apaipih a, ajepna maliamte asilsiang sak a, tualeh amah leh a innkuante jousiahin baptisma atang paingal uhi.

³⁴Tualeh amauh a innsung ah apaipih a, amai uah an alui a, Pasian agintat jiak un a innkuante utawh akipak uhi.

³⁵Tualeh nisuah in, thukhentute`n, “Hua mite khah in,” chi`n mimantute asawl ua.

³⁶Tualeh thong vengtu in Paul kiang ah huathu ahilh a, “Thukhentute`n nou khah ding in mi ahungsawl uhi. Tuajiakin, tu in pawt unla, khamuang takin pai un,” achi a.

³⁷Hinanleh Paul in akiang uah, “Rommite ka hi ngal ua, kasiam na uh leh kasiam louhna uh theilou in vantang mitmuh in a hungsat ua, thong ah ahung khum ua! Tualeh tu in aguk a hung hawlkhiat sawm uh ahi uh maw? Hithei ngailou di! Amauh mahmah hungpai uh henla, hung puidok uhen,” achi hi.

³⁸Tualeh mi mantute`n hua thu thukhentute kiang ah ahilh ua, tualeh Rommite ahi uh chih ajaktak un, alau mahmah ta ua.

³⁹Tuachi`n amauh ahung paikhiatpih ua, ajawl ua, apaikhiat pih ua, khuapi pualam a paimang dingin a ngen uhi.

⁴⁰Tualeh amauh thong a pat apawt ua, Lidia inn ah alut ua, unaute amuhtak un a hanthawn ua, a pawtta uhi.