Read Thangal Naga NASEPTE 17 Bible Online

NASEPTE 17 - Thangal Naga bible

NASEPTE 17

¹Tualeh Amphipoli khua leh Apollonia khua tuan in apai suak ua, Thessalonika khua atung ua, huasan ah Judate kikhopna inn a om hi.

²Tuachi`n Paul in amau dan ngaina bangin akiang uah a lut a. Khawlni thumvei Pasian Laisiangthou a pat kichiantak in asutpih a

³Krist pen gimthuak ding mawng ahihdan, tualeh misi lak a pat thoukik ding ahihdan bang leh, “Hih na kiang ua ka gen Jesu pen, Krist ahi, chih ahilhchian a,” alangsak hi.

⁴Tuachi`n alak ua khenkhat in agingta ua, Paul leh Sila ajuita ua, Pasian ngaihsak Grik mipi thupitak leh numei lamkai tamtakte tawh.

⁵Hinanleh ginglou Judate`n a huphulh ua, van juakna mun a migilou thadah kuate hiam akiang uah apaipih ua, mipi asam khawm ua, khuapi sung teng atokbuaita uhi. Tualeh Jason inn aluh ua, amauh mipi lak ah puikhiat a sawm uhi.

⁶Tualeh amauh amuhlouh tak un, Jason leh unau dang kuate hiam khuapi sung lamkaite kiang ah akai lut ua, a kikou ua, “Hih leitung hihbuaitute! Hihsan ah zong ahung pai ua,

⁷Jason in ana jintun sak a, hihte jousiahin amin Jesu kumpipa dang aom hi chi`n Kaisar thu kalh in aom uhi,” achi ua.

⁸Tualeh mipite leh khuapi sung a lamkaite`n hua thu ajaktak un abuaita ua.

⁹Tualeh amau`n Jason leh midangte kiang a pat in atang ua hen ding bang ahiam ala ua, amauh akhahta uhi.

¹⁰Tualeh amauhte`n Paul leh Sila ajan ajan in Beria khua ah asawlkhia pai ua, huasan avatun un Judate kikhopna inn ah avalut ua.

¹¹Huasan a mite Thessalonika khua a mite sang in ana hoihjaw ua. Lungsim kipaktakin thu ana pom ua, athugen uh adik leh diklouh theihna dingin niteng in Pasian Laisiangthou sung ah azong jel uhi.

¹²Tuajiakin alak ua mi tamtakin agingta ua, Grik numei zah omte leh pasalten zong agingta uhi.

¹³Hinanleh Thessalonika khua a Judate`n Paul in Beria khua ah Pasian thu a genta chih atheihtak un huasan ah zong a hungpai ua, mipite ahung tokbuaita uhi.

¹⁴Tuachi`n kintakin unauten Paul pen tuipi lam a paiding in a sawlkhia ua, hinanleh Sila leh Timothi pen huasan ah a omdenta uhi.

¹⁵Tualeh Paul paipihtute`n Athen tanin apaipih ua, tualeh Sila leh Timothi pen akinthei lam a akiang a paiding a athukhak pen puain apaita uhi.

¹⁶Tualeh Paul in Athen khua a amauh ana ngak laiin, hua khua pen milim pasian lim a dim in amu a, tuachi`n ahehta hi.

¹⁷Tuajiakin kikhopna inn ah Judate leh Pasian ngaihsakte anial jel a, a van juakna mun ua ana omte niteng in anialjel hi.

¹⁸Tuachi`n Epikuriamite leh Stoikmite lak a mipil kuate hiam in zong amah ahung nial a. Tualeh khenkhat in, “Hih mikamtam in bang ahia agen sawm?” achi ua. Adangte`n, “Jesu thu leh thohkikna thu agen jiakin gamdang pasiante thu gen ahihtuak hi,” achi uhi.

¹⁹Tualeh amauh apaipih ua Areopaga ah atut ua, akiang ah, “Hih thuhilhna thak nagen pen nung theisak thei diai.

²⁰Sillamdang banghiam khat kabil uah nung tut hi, tuajiakin hih sil omjia ka thei ut uhi.”

²¹Ajiak Athen mite jousiah leh akhua ua inn omte zong amankal sung in thuthak genin hiam ahihkeileh a ngaikhia in hiam aom jel uhi.

²²Tuachi`n Paul Areopaga laitak ah ading a, agen a, “Nou, Athen khua a mite aw, bangkim ah sahkhua ngaihsaktak nahi uh chih kungthei hi.

²³Ajiak kavak kawm a na biakte uh ka et leh maitam khat atung a, ‘THEIHLOUH PASIAN A DIING,’ chia kigelh kamu hi. Tuajiakin theilou pia nabiak uh tuapen kung hilh ahi.

²⁴Pasian leitung leh asung a sil jousiah siamtu pen, van leh lei Toupa ahihjiak in khut abawl inn ah aom ngai kei hi.

²⁵Sil tasam bangin mihing khut a nna sepsak in zong aom ngai kei, amahmah tuh bangkim kiang a hinna, nakna leh siljousiah piapa ahijaw hi.

²⁶Tualeh leitung pumpi luahsuak a om dingin sisan bul munkhat a pat in namchin mi asiam a, amauh dingin hun aguat a, a tenna gii uh zong a khunsak hi.

²⁷Amau`n Toupa azong ua, kinemtak in amai amai ua amuh teitei na ding un, hinanleh aman eite ahung gamlat kei hi;

²⁸midang khenkhat in, ‘Ajiak amah ah ihing ua, i om uh ahi ngal a.’ Nou mauh laphuak siam kuate hiam in zong, ‘Ei zong asuante ihi ua,’ chia agen bang un.

²⁹Tuajiakin, Pasian suante ihih jiak un, mihing khutsiam leh suktuah a khen milim tawh kibang ahi, ichih ding uh ahikei hi.

³⁰Adiktak in, Pasian in itheihlouh laite uh aki theihmoh bawl a, hinanleh tuin gamchin a mijousiah kisik dingin thu apiata hi.

³¹Ni achiam jiakin, tuani chiangin amiguat pen lei a mite diktat takin angaihtuah sak ding, huapen Pasian in amah misi lak a kipat a kaithou in, mijousiah kiang ah atheisakta hi!” chi in.

³²Tualeh, amau`n misi lak a kipat a thohkik na thu ajaktak un, kimkhat in anuihsan ua, adangte`n, “Hih thu na kiang ah kung ngaikhia kik ding uh,” achi ua.

³³Tuachi`n Paul alak ua kipat in a pawtkhiata hi.

³⁴Hinanleh mi kuate hiam amah lam ah abelh tinten ua, agingta ta ua, tualeh akhen khat ahihleh Areopagami Dionisia leh numei khat amin Damari leh akiang ua midangte tawh ahi uhi.