Read Thangal Naga NASEPTE 18 Bible Online

NASEPTE 18 - Thangal Naga bible

NASEPTE 18

¹Hih silte zohin Paul Athen khua a pat apawt a, Korin khua ah apaita hi.

²Tualeh amin Aquila Judami khat amu a, a mah Pontas gam a piang ahi a, Klaudia in Judate jousiah pawt thu apiak jiak a azi Prisila tawh Itali gam a kipat hung tungpan phet ahi ua. Tualeh Paul akiang uah ahung pai a,

³tualeh a nasep uh a kibang ahihjiak in akiang uah atung a, a semkhawmta ua, a nasep uh ahihleh puan inn bawl ahi.

⁴Tualeh khawlni tengin kikhopna inn ah thu asutpih a, Judate leh Grikte agingta dingin achial jel hi.

⁵Tualeh Sila leh Timothi Masidonia gam a kipat a hungtun un, Paul pen kha phut in thu maimai gen in aomta a, Jesu hih Krist ahi chih Judate kiang ah ahilhchian jel hi.

⁶Hinanleh akalh un agensia ua, Paul in apuante athing a akiang uah, “Na mohna sisan uh natung uah kituk heh, kei kasiang ahi, tubansiah Jentelte kiang ah ka paita ding hi,” achi hi.

⁷Tualeh hua a pat in apai a, mikhat amin Tita Jasta achih uh inn ah alut a, huapan Pasian a biajel a, a inn zong kikhopna inn tawh kizom ahi.

⁸Tualeh Krispa, kikhopna inn vaihawmpa a innkuante jousiah tawh Toupa agingta ua, Korin khua a mi tamtak in zong ja in agingta ua, baptisma a tangta uhi.

⁹Tuachi`n janin Toupa`n Paul kiang ah mangmu bangin, “Laukenla, dailouin thu genjel in,

¹⁰kei na kiang ah ka om gige hi. Tualeh hihliam dingin kuaman natung ah khut akha kei ding hi, hih khua ah mi tampi kanei ngal a,” achi hi.

¹¹Tualeh Paul huasan ah, alak uah Pasian thu hilh in kumkhat leh akim a omta hi.

¹²Tualeh Gallio, Akhaia gam uktu ahihlai in, Judate`n ki thutuak takin Paul asual ua, vaihawmna touna mai ah atut ua.

¹³“Hihpa`n, dan kalh in Pasian biading in mi akhempuk jel hi!” achi ua.

¹⁴Tualeh Paul in dawng ding a akisak laitakin, Gallio in Judate kiang ah, “Aw nou Judate, hihte hih sil diklou thu hiam, sil bawlkhial thu hiam bek hileh pellouin kung ngaihsak ding a.

¹⁵Hinanleh, thute, minte nou dan tung thu lel ahihleh nou kingaih tuahjaw un, ajiak kenjaw hichibang thu ka ngaihtuah utkei hi!” achi a.

¹⁶Tualeh vaihawmna touna mai a pat amauh adelh mangta hi.

¹⁷Tuachi`n Grikmi jousiahin kikhopna inn vaihawmtu Sosthene aman ua, vaihawmna touna mai ah avua ua. Tualeh Gallio in tua asil bawlte uh khawk asa kei hi.

¹⁸Tualeh hua nungin Paul sawttak atam nalai a, tuazoh in unaute kampha in akhen a, huasan a kipan in Suria gamlam ah gunkuang in apaita a, Prisila leh Akuila tawh zong ajawk uhi. Kichiamna aneih jiakin Kendria khua ah Paul in asam aheu hi.

¹⁹Tuachi`n Ephesa khua atung a, amauh huasan ah anusiata a, hinanleh amah pen kikhopna inn ah alut a, Judate tawh thu a sutkhawmta ua.

²⁰Tualeh amau`n akiang ua sawtdeuh tam dingin akhouhta ua, amah a utkei hi.

²¹Hinanleh kampha in akhen a, Jerusalem a ankuang luina om ding ah jauh teitei kasawm a, “Pasian in pha asakleh na kiang uah kung paikik ding hi,” chi in. Tuachi`n Ephesa khua a pat in gunkuang in apaita hi.

²²Tualeh Kaisaria khua ah a hungtung a, Jerusalem khua ah apai tou a, saptuamte chibai abuk a, tuakhit in Antiok khua ah apaisukta hi.

²³Huasan a bangtan hiam aom nungin apaita a, nungjuite jousiah kipsak dingin Galatia gam leh Phrigia gam jousiah atuansuak hi.

²⁴Tualeh Judami khat amin Apollo, Aleksandria khua a piang, mipiltak Pasian Laisiangthou theisiammi Ephesa khua ah apai a.

²⁵Tuapa pen Pasian lampi thu jilsa ahi a, khalam ah lunglut takin Toupa tanchin pilvangtak a genin ahilhjel a, Johan baptis guak athei hi.

²⁶Tualeh kikhopna inn ah hangsan takin thu agen panta a, Prisila leh Akuila in a thugen ajak un a inn uah apaipih ua, akiang ah Pasian lampi kichian takin ahilhchianta uhi.

²⁷Tualeh aman Akhaia gam a paisuak atup takin, unaute`n a hasuan ua, amah ana kipahpih na ding un nungjuite kiang ah lai akhakta uhi. Amah atun takin Pasian khuatuahna jal a gingtate nasatakin apanpih hi. [6]

²⁸Ajiak, aman vanta`ng theih in Judate a selthal a, Pasian Laisiangthou zang in Jesu hih Krist ahi chih atheisak hi.