Read Thangal Naga NASEPTE 19 Bible Online

NASEPTE 19 - Thangal Naga bible

NASEPTE 19

¹Tualeh hichi ahung hi a, Apollo Korin khua a aom sungin Paul in khuasak lam tuansuak jouin Ephesa khua a hungtung a, tualeh nungjui kuate hiam amu a

²aman akiang uah, “Na gintat tu`nglai un Khasiangthou natang uai?” achi a. Amau`n akiang ah, “Khasiangthou aom chih zong ka jakha ngai mawng mawng kei uhi,” achi ua.

³Tuachi`n, aman akiang uah, “Ahihleh nou bang baptisma ahia natan uh?” achi a, Amau`n, “Johan baptisma,” achi uhi.

⁴Tuachi`n Paul in, “Johan in mi kiang ah anung a hungpai ding Jesu Krist na gintat ding uh ahi, chi`n kisikna baptisma in a baptis jel hi,” achi hi.

⁵Amau`n hih thu ajaktak un, Toupa Jesu min in baptisma atangta uhi.

⁶Tualeh Paul in atung uah akhut a nga a, Khasiangthou atung uah a hungtungta a, ham theihlouh in ahung hamta ua, thu a genta uhi.

⁷Tualeh aun un mi sawm leh nih ahi uhi.

⁸Tualeh Paul kikhopna inn ah alut a, khathum sung ding hangsan takin thu agen a, Pasian gam lam thu ngaihsun in, mi kun in athuzohjel hi. [7]

⁹Hinanleh khenkhat aphengphi ua, agingta ut kei ua, mipi mai a hua lam agensiat tak un, amauh apaisan a, nungjuite apaipih tuam a, Tairanna kichi siamsinna inn ah niteng in a houlim pihta hi.

¹⁰Tualeh hichi bangin kumnih sung a om a, tuachi`n Asia gam a om jousiah Judate leh Grikte`n zong Toupa Jesu thu ajata uhi.

¹¹Tualeh Pasian in Paul khut in sillamdang taktakte abawlsak a.

¹²Tuachi`n a satung a kipat in kinawtna puan hiam, puantualte hiam damloute kiang ah ahung tawi ua, a natnate uh adam jel a, tualeh asung ua dawite zong apawt jel hi.

¹³Tuachi`n Judami khualjin kawikawi dawithu thei kuate hiam in, “Paul in athu atang koupihjel Jesu min in kung vau uhi, chi`n dawipaite tungah Toupa Jesu min alou vial ua.”

¹⁴Tualeh Judami siampi khat Skeva in huachibang bawl tapa sagih anei hi.

¹⁵Hinanleh dawiin adawng a, “Jesu ka thei hi, Paul zong ka thei hi, hinanleh nou kuate nahi ua?” achi hi.

¹⁶Tuachi`n dawipaiin amauh ahung bawh a, ajou a, anuaisiahta a, tuachi`n hua inn a pat guaktang leh liam in a taikhiata hi.

¹⁷Tualeh hihthu Ephesa khua a teng jousiah, Judate leh Grikte kiangah zong athangta a, tualeh aun un alau ua, Toupa Jesu min alianta hi.

¹⁸Tualeh agingtate zong tamtak a hungpai ua, a silbawlte uh thupha atawi ua, aki phuangta uhi.

¹⁹Mitphial dawi tawi tampi`n zong alaibute uh ahung tawikhawm ua, mijousiah mitmuh in ahalta ua, tualeh aman atuat ua, daan dangka tang sang sawmnga bang a phasak uhi.

²⁰Tuachi`n thupitakin Toupa thu ajaakta a, agualjou jel hi.

²¹Hua silte nungin Paul in a lungsim in, Mesidonia gam leh Akhaia gam a tawtsuak zoh chiang a Jerusalem khua a pai asawm a, “Huasan a ka paizoh chiangin, Rom khua zong kava mu teitei ding,” achi hi.

²²Tuachi`n a sepkhawmpih minih Timothi leh Erasta pen Mesidonia gam ah asawl a, hinanleh amah Asia gam ah hun tomkhat aom tadih hi.

²³Tualeh hualai velin Toupa lampi thu in mi ahahbuai mahmah ua.

²⁴Ajiak mikhat amin Demetria, dangka sik khengtu, daan dangka sik a Diana lim bawltu in khutsiamte kiang ah kilawhna tampi apiajel hi.

²⁵Huapa`n amauh asam khawm a, anasep bang uh semte tawh, tuachi`n akiang uah, “Pute aw hih nasepna pen ihauhna uh ahi, chih nathei uhi.

²⁶Hih Ephesa khua guak ah hilou in, Asia gam pumpi ah zong hih Paul in khut a bawlte pen Pasian ahi kei uh chi`n mi tampi athuzoh a, aki heisak jouta hi chih noumah ngeiin na mu un na ja uhi.

²⁷Tuachi`n, ikivaina uh bang mahlou ahung suak ding guak lauhuai hilou in, pasiannu thupi diana biak inn zong ahung ki ngaineu ding a. Tualeh Asia gam pumpi leh leitung pumpi a mi`n abiak uh amahnu ngei zong athupina suksiat in ahung om kha ding chih alauhhuai hi!” achi hi.

²⁸Tualeh hua thute ajaktak un aheh mahmah ua. “Ephesamite diana athupi hi!” chi`n aki kou uhi. [8]

²⁹Tuachi`n akhua pumpi in a buaisiangta ua, Gaia leh Aristarkha, Mesidonia gam a mi, Paul in a khualzinna a azohpih tegel aman ua, kituak takin etnop bawlna inn ah atai lutpihta uhi.

³⁰Tuachi`n Paul in mipi lak a lut atup leh a nungjuite`n aphal kei ua.

³¹Tualeh Asia gam lamkai liante lak a Paul lawmte khenkhat in akiang ah mi asawl a, etnawp inn a lut mawng mawng lou dingin a ngen ngen uhi.

³²Khenkhat thukhat in aki kou ua, khenkhat thudang in aki kou ua, kikhawmte abuai ua, mi tamjaw in aki khopna san uh zong athei kei uhi.

³³Tualeh mipi lak a pat Aleksander akai khia ua, Judate`n amah mi mailam ah asawn ua, tualeh Aleksander in akhut in ajap a, mi jousiah kiang ah adikna thu gen asawm hi.

³⁴Hinanleh amah Judami ahi chih atheihtak un, dakkal nih sung ding bang aw kituak takin, “Ephesamite diana thupi hi!” chi`n aki koukou uhi.

³⁵Tualeh khuasung laigelhtu in mipi adaihsak zoh in, “Nou Ephesa khua a mite!” “Ephesate hih pasiannu diana thupi leh jupiter a pat hung kia milim bia ahi uh, chih theilou kua aom a.

³⁶Tuachi`n hihthu nialgual ahihlouh nungin, nadaih khinkhian ding uh ahi, kinoh hehu a bangmah na bawllouh ding uh ahi.

³⁷Ajiak hih nung mipuite uh biak inn luhmi lah ahi kei ua, na pasiante uh gensiate zong ahi kei uhi.

³⁸Demetria leh azohpih khutsiamten mi kua tung hiam a thubuai aneih uleh, thubuai genna inn honsa in a om hi, tualeh gam uktute zong aom uhi, kihek uh hen.

³⁹Hinanleh, sildang buaina naneih mawng uh ahihleh dan bang a kikhopna inn ah lepding ahi.

⁴⁰Tunia buaina jiakin itung ua thu ahung om ding lauhuai hi, i kikhopna san pen lah hih ahi chihding lah aom ngal kei a,” achi hi.

⁴¹Tualeh aman huachi a thu agen zoh in kikhawmte atawpsakta hi.