Read Thangal Naga NASEPTE 2 Bible Online

NASEPTE 2 - Thangal Naga bible

NASEPTE 2

¹Tualeh Pentikos ni a hungtun in, a unpi un munkhat ah a omkhawm ua.

²Tualeh thakhat in van a kipan in thawmging, huihpi lang bangin ahung om a, tuachi`n a touna inn uh ahung luahdim siang a.

³Tuachi`n leite amah leh amah kihawm in mei bangin akiang uah ahung kilang a, tualeh atungchiat uah ahung omta hi.

⁴Tuachi`n aun un Khasiangthou in adimta ua, Kha in ahamsak bang jelin hamdang in ahung hamta uhi.

⁵Tualeh vannuai a nam jousiah lak a kipan Pasian ngaihsak Judate Jerusalem khua ah a om ua.

⁶Tualeh hua thawmging ahung om takin mipi ahung kikhawm ua, tualeh aham uh mi jousiahin amauh ham chiat a ajak jiak un ahung buaita ua.

⁷Tuachi`n aun un lamdang saseng sengin, “Ensin ua hia hamte jousiah Galili gam a mi ngen hilou ahi umaw!

⁸Bang chidan ahia i un ua ipianpih ham ua ijakchiat uh?

⁹Khenkhatte Parthiate, Medeste, Elammite tualeh khenkhat Mesopotamia gam a teng, Kappadosia gam a teng, Judea gam a teng, Pontas gam a teng, Asia gam a teng,

¹⁰Phrigia gam a teng, Izipt gam a teng tualeh Kurini khuagei lak Libia gam a teng ihi ua; tualeh khenkhat Rom khua a mikhual, Judate leh abiak dan uh juite ihi ua,

¹¹khenkhat Krit gam leh Arab gammi bang ihi ua, hinanleh Pasian silbawl thupite agen uh eima ham chiat in ija uh!” achi ua.

¹²Tuachi`n aun un lamdang sa sengseng in abuaita ua, “Hih bang chidan ahia le?” chi`n khat leh khat aki hou ua.

¹³Khenkhat in anuihsan ua, “Uain thak kham ahi uh!” achi uhi.

¹⁴Hinanleh Peter sawm leh khatte tawh ading khawm a, aw ngaihtakin akiang uah agen a, “Nou Judea gam a tengte leh Jerusalem khua a teng jousiahte aw, hihthu thei unla ka thu zong ngai un.

¹⁵Hihte nagintat bang un akham kei uh, tu in jingsang dakkua tuam ahi pan hi.

¹⁶Hinanleh hihte Jawlnei Joel in ana gen ahi hi:

¹⁷‘Pasian in, ni nunungte ah hichi ahung hi ding: Mi jousiah tungah ka kha ka buakkhum ding a. Na tapa na tanute un ka thu agen ding ua, Na khanglaite un kilakna amu ding ua, Na teksiate un mang aman ding uh.

¹⁸Tualeh tuani chiangin ka silapate ka silanute tung ah, Ka kha kabuak ding a, Ka thu agen ding uh.

¹⁹Tualeh tunglam van ah sillamdangte tualeh nuailam leiah chiamtehnate ka musak ding. Sisan leh mei tawh meikhu tawh;

²⁰Toupa ni thupi leh minthang tak ahung tunma in Ni mial asuak ding a, Kha sisan asuak ding.

²¹Tualeh hichi ahung hiding a, kuahileh Toupa min lou taphot hundam in a om ding uh,’ achi hi, achih.

²²“Nou Israelte, hihthute ngaiun! Nazareth Jesu Pasian in amah jang a nalak ua sillamdangte, sil thupite leh chiamtehnate abawlte a pat in zong nathei uhi.

²³Amah pen Pasian lemguat mawng leh theihkholh bangin piakkhiat a om in na paipih ua, migilou khut in kross ah na kilhden ua, na thatlumta uhi.

²⁴Amah Pasian in sihna gaknate a phelsak a; a kaithouta hi; sihna tukdet gual ahihlouh jiakin.

²⁵Ajiak David in atung thu agen a: ‘Kamai ah bangchiklai peuhin Toupa ka mujing a; Hihli`ng a ka om louhna dingin ka jiatlam ah a om hi.

²⁶Tuajiakin ka lungtang anuam a, Ka lei zong a kipak a. Ka taksa zong kinem takin, a om nalai ding hi.

²⁷Ka kha misikhua ah na nusia kei ding a; Na misiangthou zong muatna na musak kei ding hi.

²⁸Nangman hinna lampi nung theisak a, Nangman namel in kipahna in nung dimsak ding,’ chi in.

²⁹“Sanggamte aw, chisuangtu David thu pen laulouin na kiang uah ka gen thei hi, amah pen asi a, vuizong avuita ua, a han zong ikiang uah aom nalai hi.

³⁰Tuajiakin amah Jawlnei ahi a, sa dan a akhal a kipanin a Laltouna a tou ding, Krist kung tungdok ding chih, Pasian in kichiam in agen hi chih athei a.

³¹Aman hihpen ana theihkholhsa ahih jiakin, Krist thohkik ding thu agen hi, ‘Amah misikhua ah nutsiat in aom kei a; Aluang zong amuat kei hi,’ chi in.

³²Hih Jesu Pasian in a kaithou ta-ngut a, hih thudik i un ua theihpihtute ihi uhi.

³³Tuajiakin Pasian khut jiatlam ah pahtawiin aom a, tualeh Khasiangthou chiampen Pasian kiang a pat in amu a, namuh uleh najak uh a hungbuak ahi.

³⁴David van ah a kahtou kei a; hinanleh a mahmah in, ‘Toupa`n ka Toupa kiangah: Ka jiatlam ah tou gige in

³⁵Na galte na kengphang ngakna a ka bawl masiah achi hi,’ a chijaw hi.

³⁶“Tuajiakin Jesu na kilhdenpa uh pen Pasian in Toupa leh Krist hikhawm in a bawlta hi chih, Israel nam jousiahin chiantakin thei uhen!” achi hi.

³⁷Tualeh hih thu ajak tak un a lungtang uah sut bang ahung hita ua, tualeh Peter leh sawltak dangte kiangah, sanggamte aw, “Bang ahia ka bawl ding uh?” achi ua.

³⁸Tuachi`n Peter in akiang uah, “Kisik unla, na khialhna uh ngaihdam ahihtheihna dingin Jesu Krist min in baptisma tangchiat un, tuachi`n Khasiangthou piak na tang ding uhi.

³⁹Achiam pen nou a ding zong, na tate ua ding zong, gamlatak a om jousiah a dingin zong Toupa I Pasian in asap taphot a dingin zong ahi,” achi hi.

⁴⁰Tualeh thudang tamtakin a hilhchian a, “Tulai khangthak giloute lak ah ki humbit un!” chi`n a hanthawn hi.

⁴¹Tuachi`n athu pom jousiahin baptisma a tang ua; tuani in mi sangthum vel behlap in aom uhi.

⁴²Tualeh sawltakte thugin ah leh kipawlna ah, tanghou balkham in thum in phattuam ngaitakin a omjing uhi.

⁴³Tuachi`n lauhna mi jousiah tung ah ahung omta a, sawltakte`n sillamdang leh chiamtehnate tamtak a bawl uhi.

⁴⁴Tualeh a gingta jousiah aki punkhawm ua, sil bangkim aki kopkhawmta uhi.

⁴⁵Tualeh a silneih jousiah uh a juak ua, a kisapna bangin aun ua lak ah a hawm jel uhi.

⁴⁶Tuachi`n niteng in lungsim munkhat in tempul ah phattuam ngaitakin aom jel ua, a inn a inn a kipan in tanghou balkham in kipaktak leh lungkim takin a ante uh anejel uhi.

⁴⁷Pasian aphat ua, mi jousiah deihsakna bangin a omjel ua; tualeh hundamna hungmu taphot Toupa`n niteng in akiang uah a behlap sakjel hi.