Read Thangal Naga NASEPTE 20 Bible Online

NASEPTE 20 - Thangal Naga bible

NASEPTE 20

¹Tualeh buaina adaih nungin Paul in nungjuite akiang ah asam a, amauh ahasawt a, kampha in akha a, Mesidonia gam a dingin apaita hi.

²Tualeh hua gam teng atotsuak a, akiang ua hanthawnna thu tampi agen zoh in Grik gam a hungtungta a,

³tualeh huasan ah khathum atam a, tualeh Judate`n amah atangdap jiak un Suria gam lam a gunkuang a apai ding laiin Mesidonia gam lehphak kik atumta hi.

⁴Tualeh Beria khua a Sopater, Thessalonika khuate; Aristarkha leh Sakundate; Derbe khua a Gaia leh Timothi; tualeh Asia gam a Takika leh Trophima in Asia gam dongin atonpih uhi.

⁵Hihte kamai uah anapai ua, Troas khua ah ahung nangak uhi.

⁶Hinanleh kou, tanghou tol sawhlouh nite zoh in Philippi khua a pat gunkuang in kapai ua, ninga nin akiang uah, Troas khua ah ka tung ua, huasan ah ni sagih katam uhi.

⁷Tualeh nipi kal ni masa ni in nungjuite tanghou balkek ding a ahung kikhop laiun, Paul in ajingni a pai asawm jiakin akiang uah thu agen a, tualeh jankim dongin agen jawm hi.

⁸Tualeh inndan tungnung a akikhopna uah meivak tampi aom a.

⁹Tualeh amin Eutika kichi tangvalnou khat kotta ah atou a, a ihmut asuak sengseng a, Paul in thu asawt gen jiakin a ihmutsan a, Innsawng thumna a pat akiasuk a, asisa in atawm uhi.

¹⁰Hinanleh Paul akumsuk a, atung ah abok a, apom a, “Patau kei un, ahinna amah ah a om nalai hi!” achi hi.

¹¹Tuachi`n pindan tungnung a akahtouh kik khit in, tanghou abalkkek a, ane a, sawtpi khuavak dongin akiang uah thu genin ahoulim a, tuachi`n apaita hi.

¹²Tualeh amau`n tangvalpa pen ahing in ahung paitouhpih ua, alung muang mahmah uhi.

¹³Tuachi`n kou gunkuang lam ah kanapai masa ua, Assos juanin gunkuang in kapaita ua, Paul tuansak kasawm ua, aman keng a pai asawm jiakin, hichibang dingin agen mawng hi.

¹⁴Tualeh Assos khua a ahung kituahpih takin ka tuangsakta ua, Mitilene khua ka tungta uhi.

¹⁵Tualeh hua a pat in gunkuang in ka paikik ua, ajingni in Khios ka tung ua, ajing kik in Samos ka tung ua, Trogiliam ah ka ta`m ua, ajingni in Mileta ka tung uhi.

¹⁶Ajiak Paul in Asia gam a omsawt a utlouh man in, Ephesa khua gunkuang a paikhensuak atup mawng ahi a, ahihtheihleh Jerusalem khua ah pentikos ni a om atum a, akinpai hi.

¹⁷Tualeh Mileta khua a pat Ephesa khua ah mi asawl a, saptuam upate asamsak hi.

¹⁸Tualeh amauh ahungtun un aman akiang uah, “Asia gam a kungpai masakni a pat na kiang ua ka om sungteng ka omdan nathei uhi.

¹⁹Kingiamkhiat tak leh Judate`n ahung tup jiak ua mittui tampi leh sil haksa ka tung a hungtungte thuak kawm in Toupa nna kasem hi.

²⁰Tualeh nou phattuamna ding sil bangmah ka im kei a, kung theisak siang a, vantang leh inchin ah kung hilh jel hi.

²¹Judate leh Grikte kiang ah zong Pasian lam a lungsim kisik thu leh I Toupa Jesu Krist lam a ginna thu ka theisak jel hi.

²²Tualeh tuin, ngaiun, Khasiangthou thununna pailou theilou a ka kitheih jiakin Jerusalem khua a pai ding kisa ka hi, hua mun a ka tung a sil hung tungdingte ka theikei hi.

²³Khasiangthou in henna leh haksatna a ahung gak ahi chia khuachin a ahung theihsakte guak ka thei hi.

²⁴Hinanleh ka taidemna kipak tak a ka taitung theihna ding leh Toupa Jesu a pat a ka muh Pasian hehpihna tangthupha theihsak ding nasepna ka sepzoh theihna dingin hih silte khat bek in ahung lingsak kei a, ka hinna zong itta`k in kasim kei hi.

²⁵“Tualeh tuin, Ngaiun, noute jousiah Pasian gam thu gen a ka vaklehnate`n kamel namu nawn kei ding uh chih ka thei hi.

²⁶Tuajiakin mijousiah sisan ah ka siang ahi chih tuni in kung theisak hi.

²⁷Ajiak Pasian in thu a hunghilhte jousiah na kiang ua phuankhiat louh a im kanei kei hi.

²⁸Tuajiakin, Pasian saptuam ama sisan a aleite vak dingin Khasiangthou in lamkai a ahung bawlna pawlte jousiah leh noumauh tung ah pilvang un.

²⁹Ajiak ka painung chiangin ngia gilou nalak uah ahung vaklut ding a, pawlpite akhawi kei ding uh chih ka thei hi.

³⁰Noumauh lak mahmah ah zong nungjuite amauh lam a kaimang dingin thutuam gen nung om ding uhi.

³¹Tuajiakin kiveng un, kum thum sung hial mittui luangpum a sun leh jan a miteng taihilh ka tawplouh dan theijing un.

³²“Tualeh tuin, unaute hung khangsakthei a, tualeh, mi siangthousate lak a agoutan piathei Pasian leh a hehpihna thu kiang ah nou kung kemsak hi.

³³Kuamah dangka, kham, silh leh ten ka eng ngaikei hi.

³⁴Hih khutten keimah leh kalawite taksapte asemkhia jel chih nou mahmah in nathei uhi.

³⁵Bangkim ka bawl taphot na juihding un kung ensakta hi, huachibang a semgim leh Toupa Jesu thu theijing kawm in mi hatloute na panpih ding uh ahi. ‘Amah mah in lak sangin piakna in gualjawlna ahaujaw hi,’ ” achi hi.

³⁶Tualeh hichibang thu agen zoh in, akhupdin a, aun un athum khawm uhi.

³⁷Tualeh aun un hahkah in akap ua, Paul a ngawngkawi ua, atawp ua,

³⁸amel amuh nawn louh ding uh thu agenpen a lungkhampih diak uhi. Tualeh longkhawlna mun tanpha in avakhata uhi.