Read Thangal Naga NASEPTE 21 Bible Online

NASEPTE 21 - Thangal Naga bible

NASEPTE 21

¹Tualeh hichi ahung hi a, amauh tawh ka kikhennung un gunkuang in kapai ua tangtak in Kos katung ua, tualeh ajingni in Rhode katung ua, hua a pat in Patara katung uhi.

²Tualeh Phoinisia gam a paiding long khat kamu ua, katuang ua, kapai jel uhi.

³Tualeh Kupra gam ka muh un veilam pangah ka pel ua, Suria gam lam ah kapai jel ua, Tura khua ah ka ki-nga uhi, huamun a long van suahkhiat ding ahihjiak in.

⁴Tualeh nungjuite ka zongkhia ua, huasan ah nisagih ka ta`m uhi, amau`n kha hilh in Paul Jerusalem a apailouh ding ahi, chih agen uhi.

⁵Tualeh anitawp lam ka hungtun un ka kipankhia ua, kapaina ding uh kajuanta ua, tualeh amau`n aun un azite atatte utawh khuagei dongin ahung kha ua, tuachi`n tuipi piau ah kathum uhi.

⁶Tualeh mangpha ka kikhak zoh un kou longah katuangta ua, amauh innlam ah apaikikta uhi.

⁷Tualeh Tura khua a pat long a tuangin Tolemai khua katung ua, unaute chibai kabuk ua, akiang uah nikhat ka om uhi.

⁸Tualeh ajingni in kou Paul lawite ka kipankhia ua, Kaisaria katung ua, sagihte lak a khat Philip inn ah ka lut ua, amah tawh ka om uhi.

⁹Tualeh hihpa`n tanu nungak siangthou li anei a, Pasian thu agen jel uhi.

¹⁰Tualeh huasan a ni tampi katam laiun, Judea gam a kipan amin Agabas kichi Jawlnei khat ahung paisuk hi.

¹¹Tuachi`n amah ka kiang uah a hungpai a, Paul kawnggak ala a, akhutte leh akengte akikan a: “Tualeh hih kawnggak neitu pen Jerusalem khua a Judate`n hichibang in akan ding ua, Jentelte khut ah apiakhia ding uhi, Khasiangthou in achi hi,” achi a.

¹²Tualeh, hihthu ka jaktak un, kou leh huasan a omten Paul pen Jerusalem a pailou dingin ka ngen ua.

¹³Tuachi`n Paul in, “Bangchi nahi ua, na kahkah ua, nung khasiat sak uh? Ajiak Jerusalem khua a akan guak hilou in, Toupa Jesu min dingin sihzong ka ngap hi,” chi`n adawng hi.

¹⁴Tualeh khouhzoh gual ahihlouh takin katawp ua, “Toupa thuthu hihen,” ka chita uhi.

¹⁵Tualeh huanite nungin ka vante uh kakan ua Jerusalem ah ka paitouta uhi.

¹⁶Kaisaria a pat in nungjui kuate hiam in ahungjui ua, amauh amin Mnason, Kupra khua a nungjui masa khat tunna a kaneih dingpa uh ahung paipih uhi.

¹⁷Tualeh Jerusalem khua kungtun tak un unaute`n kipak takin ahung nadawn uhi.

¹⁸Ajingni in Paul kou tawh Jakob kiang ah alut a, huasan ah saptuam upate jousiah aom uhi.

¹⁹Tualeh Paul in amauh chibai abuk zoh in, a nasepna zang a Pasian in Jentelte lak a sil abawlsak jousiah abanban in agen hi.

²⁰Tualeh amau`n huathu a jaktak un Toupa apahtawi ua, tuachi`n Paul kiang ah, “Sanggampa Judate kiang ah gingtu tamtak namu a, tualeh aun un dan angai poimoh mahmah uhi.

²¹Tualeh nang, Jentelte lak a Juda omte jousiah kiang a atate uh tep tanlouh ding leh dan bang a omlouh ding chi`n Mosi paihkhiat na ding na thuhilh jel chih mi tampi kam a kipan in na thu athei uhi.

²²Bang chihding ata le? Mipi ahung paikhawm ngeingei ding uhi, nang hungpai chihlah ja ngeingei ding ahi ua.

²³Tuajiakin, na kiang a ka genbang un bawl in, kichiamna nei pasal li kanei uh.

²⁴Tua mipite paipih inla, asam uh aheunang uh sum pia in, tuachi`n mijousiahin mi kam a nathu ajakteng uh bangmahlou ahi chih athei ding ua, nang pen dan juiin kichian takin na omjaw chih athei ding uhi.

²⁵Hinanleh Jentelte lak a gingtute tungtang thu pen milim biakna silnek lam ah, sa heklup nek lam ah, kingaih lam a aki hepkhiat uh chihlouh ngal sildang atangkei uhi,” achi ua.

²⁶Tuachi`n Paul in pasalte apaipih a mauhte tawh aki siansuah a. Pasian tempul ah alut a, ki siansuahna ni abei hun ding leh amauhchiat a ding a asillat hun ding uh siampu kiang ah avahilh hi.

²⁷Tualeh ni sagih achin ding kuan takin, Asia gam a Judate`n tempul sung a Paul amuh tak un, mipi jousiah atok thou ua, atung ah khut akha ua.

²⁸A kikou ua, “Israelmite! Hung panpih un! Hih mipa ahi gamchin a mi jousiah kiang a, Judamite, dante tualeh hihmun gensia, tuaban ah Pasian tempul ah Grikte alutpih a, hih inn siangthou abuahsak jouta hi!” achi ua.

²⁹Ajiak hua masang in khuapi ah Ephesa khua a mi Trophima, a kiang ah amu ua, Paul in amah Pasian tempul a ahung paipih takin agingta uhi.

³⁰Tuachi`n khuapi sung jousiah abuaita a, mipite ahung taikhawm ua, Paul aman ua, Pasian tempul a pat akaikhia ua, kotte akhak pai uhi.

³¹Tualeh amah thah asawm laitak un Jerusalem khua a mi jousiah abuai uh chih thu galkap lamkai lian kiang atung a.

³²Aman galkapte leh galkap jalamkai apaipih pai a, akiang uah ataisuk a, tuachi`n amau`n lamkai lianpen leh galkapte amuh tak un, Paul avuak uh atawpta uhi.

³³Tuachi`n lamkai lianpen pan ahung naih a, Paul atu a sikkol nih khih ding thu a pia a; “Tualeh kua hi ahia, bang bawlsiat nei ahia?” chih adong hi.

³⁴Tualeh mipi lak ah akhen thu khat in a kikou ua, akhen thudang in a kikou uhi, tualeh buaijiakin thuchian bangmah atheikei ua, kulh sung a puilut dingin thu apia hi.

³⁵Tualeh Paul kalbi atun laiin mipi`n aholhseng jiak un galkapte`n amah adomkang uhi.

³⁶Mipi jousiahin, “That un!” chia kikou in anung ajui huthut ua.

³⁷Tualeh Paul giahbuk a apuilut ding kuan un, aman galkap lianpenpa kiangah, “Na kiang ah thu themkhat ka genthei diai?” achi a. Tualeh aman, “Grik ham nathei ei?”

³⁸“Tu ma a mite buaina bawl a hasuan a mithatte sangli gamdaia puikhiatu Izipt gammi hilou na maw?” achi a.

³⁹Hinanleh Paul in, “Kei Judami, Silisia gam a Tarsa khua a mi ka hi, khua na dan maimai a om hilou ka hi. Hung hehpih inla mipite kiangah thu hung gensak in,” achi hi.

⁴⁰Tualeh aman a phalsak takin Paul kalbi tung ah ading a, mipi lam akhut in ajap a, tualeh amauh adaihsiang tak un Hebrai ham in thu agen hi: