Read Thangal Naga NASEPTE 22 Bible Online

NASEPTE 22 - Thangal Naga bible

NASEPTE 22

¹“Unaute leh pate aw, tuin na kiang uah ka dikna thu ka gen ding hi, ngaiun!” achi a.

²Tualeh akiang ua Hebrai ham a thu a gentakin adaisem ua, tuachi`n aman:

³“Kei Judami ka hi a, Silisia gam a Tarsa khua a piang ka hi. Hinanleh hih khua ah Gamaliel kengbul a khanglian a Ipu leh pate uh dan khauhtak dungjui a tunia noute bang a Pasian lam a kipumpiak ka nahi hi.

⁴Tualeh hih lampi a mite ka`n in sihtan in ka bawlgenthei jel a. Tualeh numei pasal in thong ah ka khum jel hi.

⁵Siampite leh upate jousiahin zong hua thu ahung theihpih uhi. Amauh kiang a pat unaute piak ding lai kamu a, Damaska khua a om jousiahte bawlgenthei dingin Jerusalem khua a ka`nsa a puiding in kapai hi.

⁶“Tualeh hichi ahung hi a, Ka pai a, Damaska khuagei katun in, sunkim laitak ahi a, thakhat in van a kipat vak thupitak ka kim ah ahung vakguih a.

⁷Tualeh kei, tual ah ka puksuk a, tualeh aw khat in, ‘Saul, Saul! Nang bangding a hung bawlgenthei na hia?’ chi in kaja hi.

⁸Tualeh ken, ‘Toupa, Nang kua na hia?’ chi`n ka dong a, tualeh aman ka kiangah, ‘Nazareth Jesu, na bawlgentheih ka hi,’ achi hi.

⁹Tualeh ka kiang a omten vak amu ua, alau ua, hinanleh ka kiang a thugentu aw ajakei uhi.

¹⁰Tualeh ken, ‘Bang ka bawldia Toupa?’ kachi a, tualeh Toupa`n ka kiang ah, ‘Thou inla Damaska khua ah lut in, huasan ah siljousiah na bawldingte ahung ki hilh ding hi,’ achi hi.

¹¹Tualeh hua vak thupi jiakin khua ka muthei nawn takei a, ka lawite`n khut in ahung kai ua, Damaska khua ah ka lutta hi.

¹²“Tuachi`n hua khuapi sung a mi khat Anania, dan lam a Pasian ngaihsak leh huasan a om Juda jousiahin agen phat uh.

¹³Ka kiang ah a hungpai a, ading a, ‘Sanggampa Saul, khua muta in!’ ahung chi a. Tuachi`n huahun mahmah in amah ka muta hi.

¹⁴Tuachi`n aman, ‘Ipu leh pate Pasian in nang adeihlam thei ding leh midiktat asila mu a, akam a aw suak ja ding a ahung guat na hita hi.

¹⁵Ajiak namuh leh najak thu ah mijousiah kiang ah amah thu theihpihtu na hi ding hi.

¹⁶Tualeh bangding a khuangai nalai na hia? Thou inla Toupa min loukawm in baptisma tang inla, na khialhna sawpsiang in,’ a hungchi hi.

¹⁷“Tualeh hichi ahung hi a, Jerusalem a ka paikik zoh in Pasian tempul a ka thumlaiin, mangmu bang in ka om a,

¹⁸‘kinoh inla Jerusalem khua a pat in pawt in, ajiak hihsan a mite`n ka tanchin nagen sanglou ding ahi uh,’ hungchi`n amah kamu hi.

¹⁹Tualeh, ken, ‘Toupa,’ amau`n, ‘Nang hung gingtate thong a ka khum a, kikhopna innchin a ka vuakjel athei uhi.

²⁰Tualeh na thu a lamkai Stephen sisan asuah laiun keizong akiang uah ka ding a, lem ka nasa a, athatte puante zong kana kem hi,’ kachi hi.

²¹Tuachi`n aman ka kiang ah, ‘Paiin,’ ‘hihsan a kipat gamlapi ah, Jentelte kiangah kung sawl ding hi, ahung chita a,’ ” achi a.

²²Tualeh amau`n hihtan chiang a ngaikhia ua, tuachi`n aw ngaihtak in, hichi bangmi! leitung a kipat in, “Hihmang un! Hingtak ahi kei!” achi ua.

²³Tualeh akikou ua, apuante uh a bawtkek ua, vanlam ah leivui atheh uhi.

²⁴Galkap lamkai lianpa in Paul kulhsung a puilut dingin thu apia a, atung a hizahta a kikouna jiak theihna dingin jep a dokchian ding, achi hi.

²⁵Hinanleh savun khau a ahenzoh un, Paul in akiang a ding galkap jalamkaipa kiang ah, “Rommi mawng mawng siamlouh tansakna bei a vuakna ding thu nanei uai le?” achi a.

²⁶Galkap jalamkaipa`n hih thu ajak takin, galkap lamkai lianpenpa kiangah apai a, “Na silbawl ding pilvang in, hihpa Rommi ahi!” chi`n ahilh a.

²⁷Tuachi`n galkap lianpenpa a hungpai a, akiang ah, “Rommi namaw? hunghilh in,” achi a, Tualeh aman, “Hi e,” achi hi.

²⁸Tualeh galkap lianpen in, “Hih khuami hihna ken sum tampi a kalei ahi,” chi`n adawng a. Hinanleh Paul in, “Kei Rommi a piang mawng ka hi,” achi hi.

²⁹Tuachi`n dokchian sawmten amah apaisan pai ua, tualeh galkap lianpenpa in zong Rommi ahi chih a theihchian takin amah mah in akansak ahihjiak in alauta hi.

³⁰Ajingni in Judate`n bang jiakin ahia Paul ahek uh chih theihchian atup jiak un galkap lamkai lianpen in amah aphel a, siampite leh vaihawmte jousiah kikhawm dingin thu apia a, Paul ahung paipih ua, amai uah adingsak ta uhi.