Read Thangal Naga NASEPTE 23 Bible Online

NASEPTE 23 - Thangal Naga bible

NASEPTE 23

¹Tuachi`n Paul in vaihawmtute tangtak in a en a, “Ka chipih Israelmite aw! Tuni chiangdong in Pasian mitmuh a hoih a katheih taphot bawl in ka omjing hi,” achi hi.

²Tualeh siampi Anania in, Paul geia dingte kiangah akam beksak dingin thu apia a.

³Tuachi`n Paul in akiang ah, Nang bang kinuhkangpa, “Pasian in nang ahung bengjaw ding hi, nang dan bang a ka thu ngaihtuah dingin natou a, danlou bang a kei bek ding nungchih maw!” achi a.

⁴Tualeh akiang a dingte`n, “Nang Pasian siampi na housia vial a!” achi ua.

⁵Tuachi`n Paul in, “Ka chipih Israelmite aw, siampi ahih ka theikei a ahi. ‘Na chihpihte lamkai tung ah thuhoihlou genken,’ ” chih gelh ahi, achi hi.

⁶Hinanleh Paul in khenkhat Sadukaite ahi ua, adangte Pharisaite ahih uh atheih takin, vaihawmtute lak ah a kikou a, “Unaute! Kei pen Pharisai tapa Pharisai ka hi. Kinepna leh misi thohkikna ah vaihawmsak a om ka hi!”

⁷Tualeh aman hichi a agen zohzoh in Pharisaite leh Sadukaite kal ah kiselna ahung om a, tualeh mipi aki langkhenta uhi.

⁸Ajiak Sadukaite`n misi thohkikna a om kei, vantungmi zong a om mawng mawng kei, achi ua, hinanleh Pharisaite`n huategel a om hi chi`n agum uhi.

⁹Tuachi`n hahbuai in ahung buaita ua, “Hihmipa ah gitlouhna bangmah ka mukei uh! Kha in hiam, vantungmi in hiam akiang a thu gen ahihleh idou kei ding uh!” achi ua.

¹⁰Tualeh ahung kiselsang deuhdeuh tak un, galkap lianpenpan Paul abohtel uh alau a, galkapte vapaisuk a, alak ua pan a Paul vapum mat a, kulhsung a hung paipih dingin thu apia hi.

¹¹Tualeh tuajan in Toupa Paul kiangah ahung ding a, “Paul, lauken! Khamuang takin om in, Jerusalem a ka thu na theihsak bangin Rom khua ah zong na theihsak ding ahi,” achi hi.

¹²Tualeh khua ahung vak takin, Judate lawikhat a kithukim ua. Paul athah masiah ua bangmah nelou dawnlou dingin aki chiamta uhi.

¹³Tualeh mi thahsawm a kithukimte mi sawmli sang a tamjaw ahi ua.

¹⁴Tuachi`n amauh siampite leh upate kiangah apai ua, “Paul ka thah masiah ua bangmah nelou dingin nasatakin ka kichiam uhi.

¹⁵Tuajiakin nou vaihawmte tawh athu kichian jawsem a ngaihtuah ding kipang in na kiang uah puikhia dingin galkap lamkai lianpen kiangah va ngen un. Tualeh aman na kiang uh ahung phak masanga na that ding a mansa ka hi uhi,” achi ua.

¹⁶Hinanleh Paul sanggamnu tapa in, aguk a ata`ng thu uh anaja a, kulh ah avalut a, Paul ahilhta hi.

¹⁷Tuachi`n Paul in, galkap jalamkai khat akiang ah asam a, “Hih tangvalnou galkap lianpenpa kiangah paipih in, akiang ah gen ut anei hi,” achi hi.

¹⁸Tuatakin aman galkap lianpenpa kiang ah apaipih a, “Paul thong ngakpa`n akiang ah ahung sam a, hih tangvalnou in na kiangah banghiam gen ut aneih jiakin na kiang a hungpaipih dingin ahung sawl hi,” achi hi.

¹⁹Tuachi`n galkap lianpenpa`n akhut in atu a, atuam in apaikhiat pih a, “Ka kiang a nagen ut bang ahiam?” chi`n agu`k in adong hi.

²⁰Tualeh aman, “Paul thu kichian sem a ngaihtuah sawm bangin, jingchiang a vaihawmtute kiang a puisuk dingin Judate`n hungnget lem asata uhi.

²¹Hinanleh athu uh na gingta ken, ajiak alak ua mi sawmli sang a tamjaw in agu`k in ata`ng uhi. Huamite`n amah athah masiah ua bangmah nelou ding leh dawnlou dingin a kichiam uhi,” achi hi.

²²Tuatakin galkap lianpenpa`n tangvalnou apaisak a, “Hihthu nung theisakta chih kuamah hilhken,” chi`n thu apia hi.

²³Tualeh aman galkap jalamkai nih asam a, “Jan dakkua chiang a Kaisaria khua a paiding in galkap zanih tawh, sakawl tungtuangmi sawmsagih tawh, tei tawimi zanih tawh kimansa in koih un, achi a.

²⁴Tualeh gam ukpa Felik kiang a bittak a tuttheihna dingin Paul tuanna ding sakol zong guatsak un,” achi hi.

²⁵Tuachi`n galkap lianpenpa in hichibang in laikhak agelh hi:

²⁶“Klaudia Lisia in, gam uktu hoihpen Felik: Chibai abuk hi.

²⁷Hihpa Judate`n amat ua athah ding kuan un, kei galkapte tawh kava pai a, amah pen Rommi ahih ka thei a, ka hunkhiata hi.

²⁸Tualeh ahekna pen uh theih ka ut a, vaihawmtute kiang ah kapaipih a.

²⁹Amah pen adanthu uh bang ahiam a kihek ahi chih ka thei a, hinanleh ahekna uh thu ah sihna ding leh kol bulhna ding hial bangmah a om kei hi.

³⁰Tualeh Judate`n amah atang uh chih mi`n a hunghilh takin na kiang ah amah kintakin kung sawlta hi. Tualeh ahektute`n atung a thubuai aneih jousiah uh namai a gen ding in thu kapia hi,” Mangpha, chi in.

³¹Tuachi`n galkapte`n athupiak bangin Paul pen jan in apaipih ua, antipatri atunpih ua.

³²Ajingni in sakol tung tuangmite amah tawh akitonsak ua, amauh kulh ah ahung kilehkikta uhi.

³³Amauh Kaisaria atung ua, gam ukpa kiangah laikhakpen apia ua, Paul zong amai uah a dingsak uhi.

³⁴Tualeh gam ukpa`n laikhak asim zoh in Paul omna gam adong a, tualeh Silisia gam ahi chih a theihtak in,

³⁵“Nang hung hekte a hungtun chiang un, na thu ka ngaikhia ding,” achi a. Tualeh Herod vaihawmna innsung a koihding in thu apia hi.