Read Thangal Naga NASEPTE 25 Bible Online

NASEPTE 25 - Thangal Naga bible

NASEPTE 25

¹Tuachi`n Festa in gam pen a ukta a, Kaisaria a pat Jerusalem ah apaitou a,

²tuachi`n siampite leh Juda lamkaite`n akiang ah, Paul tungtang thu ahilou lam in atheisak ua.

³Tualeh lampi ah ana tangdap ua, ana thahtheihna ding un akiang ah, Paul Jerusalem a vapuitou sak dingin a ngen uhi.

⁴Hinanleh Festa in, “Paul pen Kaisaria a koihding ahi, keizong tomkhat zoh chiangin hualam ah kapai ding hi.

⁵Tuajiakin, hihpa in gitlouhna nei ahihleh, nalak ua thuneithei jousiahin hung juisuk uhenla, hek uh heh,” chi`n adawng a.

⁶Tualeh alak ua nisawm val a om nung in Kaisaria khua ah apaisuk a, tualeh ajingni in vaihawmna touna ah a tou a, Paul hung paipih dingin thu apia hi.

⁷Tualeh Paul ahung tuntak in Jerusalem a kipan a hung paisuk Judate akim ah ading ua, atung ah thubuai tampitak gen in, siatakin ahek ua, a thudiktak a ensakthei tuan kei uhi.

⁸Paul in adikna thu agen a: “Judate danthu ah hi in, tempul thu hitaleh, tualeh Kaisar thu hitaleh sil mawng mawng ka bawlkhial kei hi,” achi hi.

⁹Hinanleh Festa in Judate deihlam bawl aut a, Paul kiangah, “Jerusalem paitouh a kamai a hihthute ngaihtuah hileh na ut ei?” chi`n adong a.

¹⁰Tuachi`n Paul in, “Kaisar vaihawmna touna mai ah vaihawmsak a om dingin ka ding hi, Judate tung ah bangmah ka bawlkhial kei hi, nang chiantak in nathei hi.

¹¹Migilou ka hih a, sihna khop hial sil bawlkhial ka hihleh sihzong kanial kei hi. Hinanleh hihten ahung hekna uh adiktak aom kei leh kuaman akiang uah ahung piakhia thei kei ding uhi, Kaisar kiangah ka tutding,” achi hi.

¹²Tuachi`n Festa in vaihawmtute a houpih kawikawi zoh in, “Kaisar kiang a tut na ut maw, Kaisar kiang natung ngut ding hi,” chi`n adawng hi.

¹³Tualeh ni bangzah hiam nungin, kumpipa Agrippa leh Bernisi Kaisaria ah Festa chibai buk dingin ahung pai ua.

¹⁴Amauh huasan a ni tampi atam nung un, Festa in Paul tungthu kumpipa kiang ah agen a, “Felik in mi thongtang khat anusia a,

¹⁵Jerusalem a ka om lai in siampite leh Juda upate`n athu ahung theisak ua, siamlouh tangsak dingin ahung ngen uhi.

¹⁶Hinanleh ken akiang uah, ahekpa uh leh ahekte a kimaituah ua, ahekna thu ua aman adikna thu agenna lemtang aneih ma in, mi kuamah gawt ding a piakkhiat Rommite dan ahi kei hi chi`n ka dawng hi.

¹⁷Tuajiakin, amauh hihsan a hungtun un sawt hallou in ajingni in vaihawmna touna ah ka tou a, hua mipa hung paipih dingin thu kapia hi.

¹⁸Tualeh ahektute adinlai un kagintat bangtak in atung ah gitlouhna thubuai bangmah lah agen kei ua.

¹⁹Hinanleh amauh biak dante leh mi khat, Jesu, asisa, Paul in ahing kik chia agen, thu a kinialna nei ahijaw uhi.

²⁰Tualeh ken, hua chibang kinialna thute khendan ka theihlouh jiakin Jerusalem a pai a huasan a hihthu khen a ut leh a utlouh ka dong hi.

²¹Hinanleh Paul in Augasta khen ding a koihphot ding a angetzawk jiakin Kaisar kiang a ka sawltheih masiah veng dingin thu kapia hi,” achi hi.

²²Tuachi`n Agrippa in Festa kiang ah, “Ken zong huapa thugen ka ngaikhia ding,” achi a, “Aman jingchiang in na ngaikhia ding,” achi hi.

²³Tuachi`n ajingni in Agrippa leh Bernisi pen thupitak in a hungpai ua, galkap liante leh khuasung a miliante tawh mipi kikhopna inn ah a hunglut ua. Festa thu in Paul ahung paipih ua.

²⁴Tualeh, Festa in, “Kumpipa Agrippa leh hihsan a ka kiang a om jousiahte`n hihpa na mu uhi, amah ahihleh Judate mipi jousiahin Jerusalem leh hihsan ah ka kiangah ahek ua. Hingtak ahikei chi`n a kikou uhi.

²⁵Hinanleh sihna ding khop bangmah a bawlkei chih ka thei a. Tualeh aman Augasta kiang a thu tut asawm jiakin sawl kasawm ahita.

²⁶Hinanleh, athu gina bangmah ka toupa kiang a gelh ding lah kanei kei a, tuajiakin namai uah kung puikhia a, kumpipa Agrippa aw, nang mai a kung puikhiat ahi deuh hi, ajiak athu dokchian nung a gelhding themkhat bek ka muhtheih na ding in.

²⁷Thong tang khat atung a ahekna thu uh theihkham louh khat tawh kumpipa kiang a sawlpen sil mot-huai a katheih jiakin,” achi hi.