Read Thangal Naga NASEPTE 27 Bible Online

NASEPTE 27 - Thangal Naga bible

NASEPTE 27

¹Tualeh Itali gam a long a kapai ding uh thupukna a om takin, Paul leh thong tang dang kuate hiam pen, “Augasta pawl a mi galkap jalamkai amin Julia kichi akemsak ua.”

²Tualeh Asia gam tuipi geia khua omte tawn ding Adramitim long ah ka tuang ua, ka kitawlta ua. Thessalonika khua a om Mesidonia gammi Aristarkha ka kitonpih uhi.

³Ajingni in Sidon katung uhi. Tualeh Julia in Paul a hoihbawl a, ki hihhalh dingin alawite kiang ah apawtsak hi.

⁴Hua a pat in ka paikik ua, huih alehlan jiakin Kupra gam liahlam ah ka kitawl uhi.

⁵Tualeh, Silisia gam leh Pamphilia gamjul tuipi kakhen nung un, Lisia gam a Mira khuapi katung ua.

⁶Huasan ah galkap jalamkai in Itali gam juan ding Aleksandria long amu a, hua ah ahung tuangsak hi.

⁷Tualeh awl awl in mi tampi ka kitawl ua, haksatak in Knida lak katung hamham ua, huih in ahung nan jiakin Salmoni juanin Krit gam liah ah ka kitawl ua.

⁸Tualeh haksatak a paisuak in long khawlna kilawm achih mun uh katung ta ua, huasan ah Lasia khua aom hi.

⁹Tuachi`n ni tampi apaitak jiakin leh long a pai alauhuai jiakin an ngawlni abeita a, Paul in amauh a thuhilh a:

¹⁰akiang uah, “Pute aw, hih long a paina ah tuahsiatna manna thupitak tung ding ahi chih ka thei a, van puakte leh along guak hilou in, i hinna uh nasan in alauhhuai hi,” achi hi.

¹¹Hinanleh galkap jalamkai pa`n Paul gen sangin longpute leh long neipa thugen agingtajaw hi.

¹²Tualeh phalbi hun a omna ding long khawlna mun akijenlouh jiakin atamjaw in huapan a kitawlkhiat a Phoinik tun teitei a, huasan a phalbi sung om asawm ua, Phinisi ahihleh Krit gam a long khawlmun khat ahi a, mal tumlam leh sim tumlam ngattuah ahi.

¹³Tualeh simlam huih awl awl a ahung lan tak in, adeihdan uh mu kisa in long asut ua, Krit gamning juljul ah akitawl uhi.

¹⁴Hinanleh tomkhat zoh in hua a pat in “Euroklidon” achih uh huihpi hattak ahung langsukta hi.

¹⁵Tualeh long ahung phukhata a, tualeh huihlam a ngattheih louh tak in ka khahta ua, ahung lam lehlehta hi.

¹⁶Tualeh Klauda achih uh tuikulh gam khat ah katai ua, haksatak in longneu pen ka bitsak hamham uhi.

¹⁷Akaihkhiat zoh un apanpihna khaute azang ua, long nuailam ah avial ua, tuachi`n denchiah sirti sehnel lak ah kileng lutkha inteh chi`n puanjakna jousiah apuksak ua, tuachi`n ahung mawk toh kawikawita hi.

¹⁸Tualeh tui kinawk in ahung hahphuk jiakin ajingni in long a avanpuakte tui ah apaikhia uhi,

¹⁹tualeh a nithumni in ka khut ngei un long vante ka paikhia uhi.

²⁰Tualeh ni tampi ni leh aksi a kilang kei a, huihpi nadan maimai in ahung nuai ahikei a, hing dingin ka kinem nawn kei uhi.

²¹Tualeh sawttak an nelou a aom nung un, Paul alak uah ading a, “Pute aw, Krit tuikulh a ka thu man a long sutlou a, hihbang siatna leh manna tuahlouh ding hinapi a.

²²Hinanleh tuin lungmuang tak a om dingin kung ngen hi, ajiak nalak ua kuamah in hinna ata`n kei ding ua, long pen sia ding ahi.

²³Ajiak amah a ka hih a, a nna zong kasep Pasian vantungmi tujanin ka kiang ah hung ding a

²⁴‘Lauken, Paul! Kaisar maiah nading ngei ding hi. Tualeh ngaiin, long a natuanpihte jousiah zong Pasian in a hungpiak ahita,’ ahung chi hi.

²⁵Tuajiakin, pute aw, lungmuangtak in om un! Pasian ka gingta a ahunghilh bangin a om ding hi.

²⁶Bangteng hileh tuikulh gam khat ah ahung lekdok ngei ding hi,” achi hi.

²⁷Hinanleh Adria tuipi a huih in adung avai a ahung mutleng uh ajan sawm leh li janin jankim lai dingin longmiten gamkhat tung ding bangin a kitheita ua.

²⁸Tualeh tui litdan ateh ua, lam sawmnih hi in athei ua, tualeh themkhat kitawl gamla deuh in atehkik ua, lam sawm leh nga hi in athei ua.

²⁹Tuachi`n suanglak ah lenglutkha inteh chih alau ua, long nunglam ah sikka li akhia ua khuavak angakta uhi.

³⁰Tualeh long mite`n long mailam ah sikkate khia kipang in long neupen tuipi ah akaikhia ua, long taisan asawm uhi.

³¹Tualeh Paul in, galkap jalamkai leh galkapte kiangah, “Hihte long a aom kei uleh nabit kei ding uhi,” achi hi.

³²Tuachi`n galkapte`n longneu khaute a sattan ua, akhahta uhi.

³³Tualeh khua vak kuan in, Paul in aun un an neding in asawl a, “Tuni, anngawl a na-ngak ua, bangmah nelou a na omna uh ni sawmlehli ni ahita.

³⁴Tuajiakin, an neding in kung sawl ahi; hihpen na damna ding uh ahi. Na lak ua kuamah a samjang khat zong a mang kei ding,” achi hi.

³⁵Tualeh, hua thu agenzoh in, tanghou ala a, amai uah Pasian kiang ah kipahthu agen a, tualeh abalkek zoh in a nepanta hi.

³⁶Tuachi`n, aun un lungmuang tak in aom ua, tualeh anzong aneta uhi.

³⁷Tualeh longsung a om mi ka un un zanih leh sawmsagih leh guk ka hi uhi.

³⁸Tualeh an anekkham zoh un buhpen tuilak ah apai ua, long ajangsakta uhi.

³⁹Tualeh khuavak takin khoigam ahia chih atheikei ua, hinanleh long khawlna piautak neukhat amu ua, huasan ah ahihtheihleh chi`n long tawllut asawm uhi.

⁴⁰Tualeh sikkate akhahkhia ua, tuipi ah anusia ua, long kanna aphel ua, tualeh long puanjak huih lanna lam ngat in akaitou ua, piautak ajuanta uhi.

⁴¹Hinanleh tuipi nih kisuktuahna mun ah ka lutkha ua, long lei asunsakta ua, tuachi`n long mailam akiphutdetta a, hihling zohlouh in omta a, anunglam tui kihot ahatjiakin akekta hi.

⁴²Tualeh galkapte`n thong tangte tuipek a taimang khat omkha unteh achi ua, thah asawmta ua.

⁴³Hinanleh galkap lamkaipa`n Paul hutkhiat a utta a, asiltup uh akham a, tuipeksiam jousiah tui napek a gam nakai masa ding leh;

⁴⁴midang khenkhat long tung ah, khenkhat long phelkek tung bang a galkai ding thu apia hi. Tuachi`n a un un gam ah bittak in agalkai siangta uhi.