Read Thangal Naga NASEPTE 28 Bible Online

NASEPTE 28 - Thangal Naga bible

NASEPTE 28

¹Tualeh amauh asuahtak tak un, hua tuikulh gam pen Malta ahi chih atheita uhi.

²Agammite`n ahung na hehpih mahmah ua, guah ajuk jiak leh avot jiakin mei atawh ua, ka un un kipaktak in ahung na vaidawn uhi.

³Tualeh Paul in sing lomkhat atom a, mei a avakleh meisa hu jiakin gul khat ahung pawtkhia a akhut atu a, a kikhaidenta hi.

⁴Tualeh agammite`n gul akhut a kikhaiden amuh un, “Hihpa pen tualthat hiding ahi tuipi a pat suakta nanleh phuba latu in ahin ding phal nawnlou ahita,” achi ua.

⁵Hinanleh Paul in gul pen meilak ah athingkhia a, bangmah achi kei hi.

⁶Amau`n pen ahung pom hiam, ahihkeileh thakhat a puk a sipai ding a gingta in a ngak ua, hinanleh sawtpi a ngak ua bangmah achihlouh takin, alungsim uh akhek ua, “Amah pen pasian ahi!” a chijawta uhi.

⁷Huamun pen hua tuikulh hausapa amin Pablia achih uh gam ahi a, huapa in kipaktak in ahung vaidawn a, ngainatak in nithum ahung jintungsak hi.

⁸Tualeh hichi ahung hi a, Pablia pa pen nattun leh santen in ana lum a, Paul akiang ah avalut a, a thum a, atung ah akhut a nga a, a damsakta hi.

⁹Tuachibang a abawl zoh in hua tuikulh gam a midang natna nei jousiah zong ahung pai ua, adam chiatta uhi.

¹⁰Amau`n thupitak in ahung pahtawi ua, tualeh ka paiding un ka poimoh jousiah uh longah ahung koihsak uhi.

¹¹Tualeh khathum nungin Aleksandria long, phalbi sungteng tuikulh a tam alulam, “Unau peng,” lutang lim suang ah kapai uhi.

¹²Tualeh Siraka ah ka ki-nga ua, hua ah nithum ka ta`m uhi.

¹³Tualeh huasan a pat ka paikual ua, Rhegium katung ua. Tualeh nikhat zoh in simhuih ahung lang a, ajingkik in Puteoli katung uhi.

¹⁴Huasan ah unaute kamu ua, akiang uah ni sagih ta`m ding in ahung khouh ua, tuachi`n Rom. lam juanin kapaijel uhi.

¹⁵Tualeh unauten ka tanchin uh ajak tak un, huasan a kipan in Appia vanjuakna mun leh jinbuk thumte chiang a hungdawn ding in a hungpai ua, Paul in amauh amuh in, Pasian kiangah kipahthu agen a, a khamuangta hi.

¹⁶Tualeh Rom. khua katun un, galkap jalamkai in thong tangte pen avengtu galkap lamkaipa kiangah apiakhia a, hinanleh Paul pen avengtu galkap khat guak tawh a om aphalsak hi.

¹⁷Tualeh hichi ahung hi a, nithum nungin Paul in Juda lamkaite asam khawm a, amauh ahung kikhop tak un akiang uah, “Unaute aw, Juda nam leh Ipu leh pate uh dan tungah bangmah ka bawlsiat a omlouh hang in, Jerusalem a Rommite kiangah thong tang a piakkhiat ka hita hi.

¹⁸Ahung etdik zoh un sihnakhop hial katung a bangmah a omlouh jiakin khah ahung sawm ua.

¹⁹Hinanleh Judate`n hua anial jiak un Kaisar kiang a kathu tutlou theilou ka hitakei hi, ka chipihte hekna a bawl hilou in.

²⁰Hih thu jiak a nou tawh ki mutuah a ki houlim dingin kungsam ahi. Israelte kinepna jiak a hih sikkhau a kan a om ka hi,” achi hi.

²¹Tuachi`n amau`n akiang ah, “Na tanchin Judea gam a kipat laikhak in ka mukha kei uh, unaute kuamah in zong hihsan a hungpai in, natung thubuai bangmah ahung ensak kei ua, gen zong ahung gen ngai kei uhi.

²²Hinanleh nangaihdan nang a pat ka januam uhi, ajiak hihpawl pen gamchin a gensiat a aom uh ka thei uhi,” achi ua.

²³Tualeh ani aguat ua, aniguat uh a hungtun in mi tampi ahung pai ua. Jingsang a kipat nitaklam dongin Pasian gam thu ahilhchian in atheisak a, Mosi dan laibu leh Jawlneite laibu thu in Jesu lam ah amauh a jawljawl hi.

²⁴Tualeh khenkhat in thu kigen agingta ua, khenkhat in agingta kei uhi.

²⁵Tualeh amauh aki thulual theihlouh phet un, Paul in thukhat agen khit in a paikhiata uhi. A thugen ahihleh hih ahi: “Khasiangthou in Jawlnei Isaiah kam a, Ipu leh pate uh kiang a agen pen adik mahmah hi!

²⁶Aman hichi`n agen a, ‘Pai inla hih mite kiangah vagen in: jak pen na jading ua, hinanleh angaihna na theikei ding uhi; muhpen na mu ding ua, hinanleh na theikhia kei ding uhi,

²⁷ajiak hih namte a lungtang uh akhengta a, abil uh abingta a, amit uh asingta uhi. Atuachih keileh, amit un amukha ding ua, abil un ajakha ding uh, a lungsim un atheikha ding uh, tuachi`n a hung kiheikik kha ding ua, ken kana hihdam kha ding,’ ” achih pen.

²⁸Tuajiakin, “Pasian hundamna pen Jentelte kiang a sawl ahita chih thei un, amau`n pen ngaizong a ngaikhia ding uhi!” achi a.

²⁹Tualeh hihthu Paul in agenzoh in Judate apawtkhiata ua, amauh lak ah nasatak a kinialna anei uhi.

³⁰Tuachi`n Paul kumnih sung vingveng ama innluah ah aom a, akiang a pai taphot aki pakpih a.

³¹Pasian gam thu agen a, Toupa Jesu Krist thu hangsan takin ahilhjel a, kuaman amah akham kei uhi.