Read Thangal Naga NASEPTE 3 Bible Online

NASEPTE 3 - Thangal Naga bible

NASEPTE 3

¹Tualeh Peter leh Johan dakkua in thumna hun ahih in tempul ah apaitou ua.

²Tualeh kuahiam pasal khat apianchil a pat kengbai khat ahung jawng ua, tuapa pen tempul a lutte kiang a silpiak ngen dingin tempul kongkhak kilawm achih uh bul ah niteng in a lumsak jel uhi.

³Tuachi`n Peter leh Johan tempul a lutding amu a, silpiak ana ngen a

⁴Tualeh Peter in Johan tawh tangtakin amah a en ua, “Kou hung en in!” achi a.

⁵Tuachi`n aman amauh a enpai a, tualeh amauh a pan bang hiam khat muh aki lam-en a.

⁶Tuachiah Peter in, “Dangka leh kham bangmah ka neikei a, hinanleh ka neihsun kung pia ding; Nazareth Jesu min in thou inla vakta in!” achi a.

⁷Tuachi`n akhut jiatlam a tu-in a kaitou a, thakhat in akeng leh a siatmit guhte ahung hatta a;

⁸tuachi`n amah a tawmdok a, ading a, akeng in apaita a, amauh toh tempul sung ah alutta hi.

⁹Tualeh keng a apai leh Pasian aphat mi jousiahin amu ua,

¹⁰tuachi`n amau`n, tempul kongkhak kilawm bul a mikiang a silpiak ngen a toujelpa ahi chih athei ua, tualeh atung a siltung lamdang asa mahmah uhi.

¹¹Tualeh kengbai hung dampa in Solomon innlim a Peter leh Johan atuklai in, mi jousiahin lamdang asa mahmah ua, akiang uah ahung taikhawm uhi.

¹²Tuachi`n Peter in hua amuh in, mipite kiang ah, “Israel mite aw, bangding a hih lamdang sa nahi ua? Ahihkeileh, kou silbawl theihna leh Pasian ka ngaihsak jiak ua amah ka paisak bang hial a kou hung guh-et nahi ua?

¹³Abrahamte, Isakte, Jakobte Pasian, ipu leh pate Pasian in a sila Jesu a tawisangta ahi, amah na mansak ua, Pilat in khah atup in zong na awikei uhi.

¹⁴Hinanleh misiangthou leh mi diktat pen na deih kei ua, tualthatpa pen na kiang ua piak na ngenjawta uhi.

¹⁵Tualeh hinna lengpa na that ua, hinanleh Pasian in amah sihna a pan a kaithou kik a, tua theihpihtute ka hi uhi.

¹⁶Tualeh amah min gintat jiakin, ama min in hihpa na muh uleh natheih uh pen a hatsakta hi; ahi amah jiak a ginna hung om in, na un ua mitmuh in adamsak sitsetta hi. [1]

¹⁷“Tuin sanggamte aw, na lamkaite un zong ana bawl bangin, na theihlouh jiak un hih nabawl uh chih ka thei hi.

¹⁸Hinanleh Pasian in a Jawlnei jousiah kam a, Krist in a thuak ding ahi chih ana genkholhsa pen tuachibang in a tungsakta hi.

¹⁹Tuajiakin, kisik unla, na khialhnate uh nawtmang ahihtheihna ding in. Ki heikik un, tuachi`n Toupa kiang a pat halhthakna hunte ahung tungthei ding a,

²⁰tualeh Jesu Krist nou a ding a aguatsa pen ahung sawl ding hi.

²¹Bangkim bawlhoih hun a hungtun masiah amahpen van in akem tadih ding hi, tua bawlhoih ding pen Pasian in leitung pianchil a pat a Jawlnei siangthou jousiah kam in a genkhinta hi.

²²Ajiak, diktakin Mosi-in ipu leh pate kiangah, ‘Toupa na Pasian in keimah ahung siam bangin na sanggamte lak ah Jawlnei khat ahung siamsak ding; aman na kiang ua thu agen na ngaihkhiat sak ding uhi.

²³Tualeh hichi ahung hiding a, mi kuapeuh tua Jawlnei thu ngaihsak lou pen mipi lak a kipan suk mangthang ahi ding uh,’ achi hi.

²⁴Ahi, Samuel om a kipat Jawlnei jousiah, tualeh anung uate tawh thu anagen taphot in tuachi bangin tulai tanchin ana genkholh uhi.

²⁵Nou, Jawlneite leh thukhun tate na hi uhi. Pasian in Abraham kiangah, ‘Nasuan nakhak jalin leitung a nam jousiah ka gualjawl ding hi,’ chi`n Ipu leh pate kiangah achiam hi.

²⁶Pasian in a Tapa Jesu kaithou in, na khialhnate uh kiheisan sak ding leh vang hungpia ding in nou kiangah ahung sawl masapen hi,” achi hi.