Read Thangal Naga NASEPTE 4 Bible Online

NASEPTE 4 - Thangal Naga bible

NASEPTE 4

¹Tualeh Peter leh Johan in mi kiang a thu agen laiin, siampite, tempul lamkaite leh Sadukaite a hungpai ua.

²Mi ahilh uleh Jesu jiak a misi lak a kipan a thohkikna thu a tangkoupih jiak un buaina thupitak apiangta a.

³Tualeh atung uah khut akha ua, ajingni matan thong sungah akhumta uhi.

⁴Hinanleh, thu ngaikhia lak a tamtak in ataksan ua; atam dan uh pasal ngen zong sangnga bang ahi uhi.

⁵Tualeh hichi ahung hi a, ajingni in a lamkaite uleh a upate leh laigelhmite.

⁶Tualeh siampi Anna leh Kaiapha leh Johan leh Aleksander leh siampi chipih jousiahte Jerusalem ah aki khawm ua.

⁷Tualeh Peter leh Johan alai uah a dingsak ua, “Bang thuneihna in ahia, ahihkeileh kua min in ahia hihbang nabawl uh?” chi in adong ua.

⁸Tuachi`n Peterpen, Khasiangthou in ahung dimta a, akiang uah, “Nou mipi lamkaite leh Israel upate aw:

⁹Kou tunia mi hatlou khat hatsakna thu ah, amah bangchi a hungdam ahi hiam, chi a nung phul uleh,

¹⁰na-unpi un thei un, tualeh Israelmi jousiahin zong thei un, Nazareth Jesu kross a na kilhlup uh, Pasian in misi lak a pat akaithou kik a, amah min in hihpa na-un ua mai ah dam in adingta ahi.

¹¹Hih suang ahi, ‘Nou inn bawlten na suang deihlouh uh, aning a suang poimoh pen ahung hita hi.’

¹²Midang kuamah kiangah hundamna a om kei; vannuai a mihingte kiang a kipia min lak ah hung hundam ding min dang mawng mawng aom kei hi,” achi hi.

¹³Tualeh Peter leh Johan hangsan dan amu ua, tualeh laisiam lou leh mimawltak ahi uh chih atheih un, lamdang asa mahmah ua. Jesu kiangah a omta uh chih a theichianta uhi.

¹⁴Tualeh a mi damsakpa uh akiang ua ding amuh un, bangmah agenthei takei uhi.

¹⁵Hinanleh, a vaihawmna pat ua paituam ding a thu apiak nung un aki hou ua.

¹⁶“Hih mite bang ilawh ding ua le? Sillamdang kithang tak abawl uh Jerusalem khua a om jousiahin kichiantak in athei ua; enzong inial thei tuan kei uhi.

¹⁷Hinanleh, mi kiang a aki thangsem louhna dingin tubansiah hih min a kuamah kiang a thu agen nawnlouh na ding un khauhtakin ivau ding uh,” achi ua.

¹⁸Tuachi`n amauh asam ua, Jesu min a thu genkik nawnlou leh hilhkik nawn mawng mawng lou dingin thu apia uhi.

¹⁹Hinanleh Peter leh Johan in akiang uah, “Pasian mitmuh in Pasian thu man sangin nou thu man ahoihjaw diai le, ngaihtuah un.

²⁰Koujaw ka silmuh uleh kajakte uh genlouin ka omthei kei ding uh,” achi ua.

²¹Tuachi`n amauh ahah vau semsem ua, a paisakta uhi. Ajiak asil bawlte uh jiakin mi jousiahin Pasian apahtawi man un, mipi jiakin gawtna lemtang amukei uhi.

²²Sillamdang a adamsakpa uh kum sawmli sang a tamjaw ahi.

²³Tualeh Peter leh Johan apawt un alawite uh kiangah apai ua, siampite leh upate`n agen jousiah uh ahilh uhi.

²⁴Tualeh amau`n ajaktak un, kituaktak leh aw ngaihtak in, Pasian kiangah, “Toupa, Nang van leh leite, tualeh tuipi leh asung a om jousiahte siamtu Pasian na hi!

²⁵Nang na silapa David kam in hih thu na gen hi, ‘Bang chidan a Jentelte heh uh ahia; tualeh miten bang chidan ahia sil phatuam lou a ngaihtuah uh?

²⁶Leitung kumpipate ading ua, vaihawmte zong a kikhawm uh Toupa leh Krist kalh in,’ chi in.

²⁷Na sila, na thaunuh Jesu tung ah, Herod leh Pontia Pilat tawh Jentelte leh Israelmite aki khawm takpi uhi.

²⁸Na khut leh na lungsim ahung tung ding a na guatkholh taphot bawl dingin.

²⁹Tualeh, tuin, Toupa, ahung galgik dan uh en in; tualeh na silate`n hangsan tak a na thu agentheihna ding un pia in.

³⁰Mite damsak ding a nakhut jan in; na sila siangthou Jesu min jal a chiamtehnate leh sillamdangte bawl in,” achi ua.

³¹Tualeh, athum zoh un a omkhawmna mun uh ahung kiling a; tualeh aunpi un Khasiangthou in ahung dimsiangta ua, tuachi`n Pasian thu hangsan takin a genta uhi.

³²Tualeh agingta mipite lungsim khat leh ngaihtuah mun khat in a om ua; alak ua khat in zong a silneih pen kei a tuam ahi achi kei ua; a silneih jousiah a kikopjel uhi.

³³Tualeh Sawltakte`n sil bawltheihna thupi tak tawh Toupa Jesu thohkikna thu ahilh ua, a un ua tungah hehpihna thupitak aom hi.

³⁴Alak uah zong tasam kuamah aom kei uhi. Gamte ahihkeileh inn neite`n ajuak ua, a siljuakte uh man a hungtawi ua,

³⁵sawltakte kengbul ah a koihjel uhi; tualeh michih kiangah apoimoh uh ching hun chiat in a hawm jel uhi.

³⁶Tualeh, Jos, sawltakte`n Barnabas achih uh (hua min omdan pen, “Khamuanna ta chihna ahi”), Levi chi Kupra gammi ahi a,

³⁷agam neihpen ajuak a, aman ahung tawi a, sawltakte kiangah akoihta hi.