Read Thangal Naga NASEPTE 5 Bible Online

NASEPTE 5 - Thangal Naga bible

NASEPTE 5

¹Hinanleh mikhat amin Anania in azi Saphira tawh aneih uh ajuak ua.

²Tualeh azi theihpih in aman kimkhat a imta a, tualeh, akimkhat hung tawiin sawltakte kengbul ah akoih a.

³Hinanleh Peter in, “Anania, Khasiangthou khem ding leh gam man kimkhat koihkhen dingin bangding a setan in na lungsim dimsak ahiam?

⁴A om sungteng nang a hijinglou amaw? Na juak nungin zong na thuthu in a omkei ama? Bangding a hih thute na lungsim a ngaihtuah? Mihing khem na hikei a Pasian khem nahijaw hi!” achi hi.

⁵Tualeh Anania in hihthu ajaktakin, apuk a, asita a, tualeh huathu jajousiah alau mahmahta uhi.

⁶Tualeh tangvalte ahung pai ua atuam ua, azawngkhia ua, avuita uhi.

⁷Tualeh dakkal thum ding vel zoh in azi, sil omdan theilou pi-in a hung lut a,

⁸Tualeh Peter in akiang ah; “Hung hilhin, gam hihzah in ahi maw najuak uh?” achi a. Tualeh amah nu`n, “Hi, hihzah in ahi,” achi a.

⁹Tuachi`n, Peter in amahnu kiangah, “Bangding a Toupa Khasiangthou ze-et ding a ki thutuak na hi ua? Ngaiin na pasal vuite keng kongkhak ahung geita, nang zong ahung jongkhia ding uh!” achi a.

¹⁰Tuachi`n thakhat in akengbul ah apuk pai a, asita hi; tuachi`n tangvalte ahung lut ua, amahnupen si-in ahung mu ua, azawngkhia ua, a pasal kiangah avuita uhi.

¹¹Tuachi`n saptuam jousiah leh huathu zakha jousiahte kiangah launa thupitak ahung omta hi.

¹²Tualeh sawltakte khut in mi lak ah chiamtehna leh sillamdang tamtak abawl jel hi. Tualeh amauh aun un lungsim munkhat in Solomon innlim ah a om uhi.

¹³Midang kuamah alak uah ajaungam takei uhi, hinanleh mi`n amauh a ngaisang mahmah uhi.

¹⁴Tualeh gingthak numei leh pasal tampi tak Toupa kiangah ahung ki behlap deuh deuh uhi.

¹⁵Tuachi`n mi damloute kongjing ahung paipih in lupnate, phekte ah alumsak ua, Peter apaikawm a alimbek in, khenkhat bek aliah theihna dingin, achi ua.

¹⁶Tualeh Jerusalem kim a khuate a kipan mipite zong damloute leh dawinin bawlgimte hung paipih in ahung kikhawm ua; huate zong ahung damsiangta uhi.

¹⁷Tuachi`n siampite leh alawite jousiah ading ua, tua alawite pen Sadukai pawl a ahi uhi. A thangsia mahmah ua.

¹⁸Tualeh sawltakte aman ua, vantang khumna thong ah akhumta uhi.

¹⁹Hinanleh Toupa vantungmi in janin thong kongkhakte hung hong in amauhte apaikhiat pih a,

²⁰“Pai unla, tempul ah ding unla, mikiang ah hih hinna thu jousiah vagen un,” achi a.

²¹Tualeh huathu ajak un jingsang matakin tempul ah ava lut ua, thu ava hilh ua. Hinanleh siampite leh alawite ahung pai ua; vaihawmte leh Israel suan upate tengteng asam khawm ua, sawltakte vapui dingin thong ah asawl uhi.

²²Hinanleh lamkaite avapai ua, thong ah amauh ava muta kei ua, ahung ki nungleh kik ua,

²³“Thong bittak a kikhak in leh avengtute zong a pualam ah kongkhak bul ah dingin kamu ua, hinanleh kahon uleh asung ah kuamah kamu kei uhi!” chi`n agen ua.

²⁴Tempul lamkai leh siampite`n hua thu atheih un hih bangzah takin ahung thang tazen diam aw, chi`n lamdang asa uhi.

²⁵Tuachi`n, mi khat ahung pai a akiang uah, “En un! Thong a na mi khumte un tempul ah dingin mi thu ahilh uh!” chi`n ahung gen a.

²⁶Tuachi`n lamkaipa upate tawh avapai ua, mipite alau jiak un bawlsialou in ahung paipih ua, atuachilou hileh suang a den in aom ding uhi.

²⁷Tualeh amauh ahung puitung tak un, vaihawmte maiah thusit ding in a dingsak ua, tuatak in siampi in a kiang uah.

²⁸“Hih min a thu hilhkik nawnlou dingin thu kungpiata uh hilou maw,” tualeh “En un na thugin un Jerusalem khua na dimsuak sakta uh, tualeh hihpa sisan ka tung ua hung khusak tum na hi uh hiam, chi`n adong ua!”

²⁹Hinanleh Peter leh sawltak dangte`n, mihing thu sangin Pasian thu kaman jawk ding uh ahi.

³⁰Jesu, nou singdawn a khai a na thahpa uh, Ipu leh pate Pasian in a kaithouta hi.

³¹Amah Pasian in kumpipa leh hundampa a om dingin a jiatlam ah a tawisangta a, Israelte kiang a kisikna leh khial ngaihdamna pia ding in.

³²Tualeh, kou hih thute theihpihtute ka hi uhi; tuachimah bangin Khasiangthou, Pasian in athujui jousiahte kiang a apiak zong theihpihtu ahi nalai hi, achi ua, adawng ua.

³³Tualeh amau`n hihthu ajaktak un aheh mahmah ua, thah asawmta uhi.

³⁴Tuachi`n vaihawmmite lak a mi khat amin Gamaliel, Pharisai, dan lam a siapa a minthang tak khat ahung ding a, hua sawltakte paikhiat pih phot dingin thu apia a.

³⁵Tuachi`n akiang uah, “Nou Israelmite aw, hih mite tung a na silbawl sawm uh pilvang un.

³⁶Tuma in zong Theoda, milian ka hi chi`n ahung om a, mi tamtak zali vel bangin amah anazom ua, amah thahlup in a omta a, tualeh amah zomteng zong a ki thehthangta ua, bangmah ahita kei uhi.

³⁷Hihpa nungin minkhum laiin, Galili gammi Juda ahung om kik a, a kiang ah mi tamtak ala a, hinanleh amah zong asita a, tualeh athu juite jousiah zong aki thehjakta uhi.

³⁸Tualeh tuin kung hilh ahi, hih mite khoihdah unla, hichi`n ommai uheh! Hih asiltup uleh asilbawl uh mihing a kipan ahihleh ahung mang ding hi,

³⁹hinanleh Pasian bawl ahihleh, amauh na hihmang thei kei ding uhi. Atuachih keileh Pasian dou nahi kha laizang ding uhi!” achi hi.

⁴⁰Tualeh agenpen lem asa ua, tuachi`n sawltakte asam ua, azep ua, azep zoh un Jesu min a thu gennawn mawng mawng lou dingin thu apia ua, akhahta uhi.

⁴¹Tuachi`n amauh vaihawmte lak a pat a pawtkhia ua, hua min jiak a jumna thuaktak a guat ahihjiak un akipak mahmah uhi.

⁴²Tualeh nitengin tempul leh innchin ah Jesu Krist ahi chia thuhilh leh tangkou atawpkei uhi.