Read Thangal Naga NASEPTE 7 Bible Online

NASEPTE 7 - Thangal Naga bible

NASEPTE 7

¹Tuachi`n siampi in, “Hih thute adik hina hiam?” achi a.

²Tualeh Stephen in, “Sanggamte leh pate aw, Ngai un! Ipu uh Abraham Haran khua a atenma a, Mesopotamia gam a atenlai in, thupina Pasian a kiangah ahung kilak a

³‘na gam a kipat leh nachite a kipat pawtkhia inla, gam kung etsak ding lam ah hungpai in,’ achi hi.

⁴Tuachi`n amah Kaldaite gam a kipat apaikhia a Haran ah avatengta hi. Tualeh apa asih nungin Pasian in hua a pat in hih tu a natenna gam uah a pemlut sakta hi.

⁵Tualeh hihsan ah mun luah ding bangmah, akeng ngakna ding khop zong apiakei a, hinanleh ta aneihma pek in amah leh anung a asuante gou ding tanpha in achiam hi.

⁶Hinanleh Pasian in hichi bangin agen a: ‘Asuante mi gam ah ata`m ding ua, suak in akhoi ding ua, tualeh kum zali abawl genthei ding uhi.

⁷Tualeh, Pasian in suak a aom na ding nam keiman ka ngaihtuah ding a, tuazoh chiangin ahung pawt ding ua hihmun ah kana asem ding uh,’ achi hi.

⁸Tuachi`n Pasian in akiang uah teptan thukhun apia hi. Tuachi`n Abraham in Isak asuang a, tualeh ani giatni-in atep atan a, tualeh Isak in Jakob asuang a, tualeh Jakob in chikhahtu sawmlehnihte asuang hi.

⁹“Tualeh chikhahtute thangsiatna in hungdim in Joseph pen Izipt gam lam ah ajuakta ua, hinanleh Pasian akiang ah aom a,

¹⁰a gimthuaknate jousiah a pat ahunkhia jel a. Izipt gam kumpipa angsung ah deihsakna leh pilna apia a, tuachi`n amah Izipt gam leh a Inn a mi jousiah tung ah gam ukpa in abawlta hi.

¹¹Tuachi`n Izipt gam leh Kanan gam ah kial a hungtung a, gimthuakna thupitak ahung omta a, Ipu Ipate un nek ding mawng mawng amu nawn takei uhi.

¹²Hinanleh Jakob in Izipt gam ah buh aom chih ajak takin Ipu Ipate uh asawl a, huapen apai masakna uh ahi.

¹³Tualeh anihvei paina uah Joseph in a sanggamte a kitheisak ta a, tualeh Joseph sanggamte Pharoah atheisakta uhi.

¹⁴Tuachi`n Joseph in apa Jakob leh a sanggamte jousiah a samsak a, aun un sawm sagih leh nga ahi uhi.

¹⁵Tuachi`n Jakob Izipt gam ah apaisuk a, tualeh amah asita a, amah leh Ipate uh.

¹⁶Tualeh aluang uh Sekem khua a puatung ua, Abraham in Sekempa Hamor tapate kiang a sum a alei han ah avuita uhi.

¹⁷“Hinanleh Pasian in Abraham kiang a athuchiam atun hun ahungnai takin, amauh Izipt gam ah hung khang in ahung tam deuhdeuhta ua.

¹⁸Atawp in Joseph theilou kumpi dangin vai ahung hawm a.

¹⁹Aman ichi leh namte a jekhem a, Ipu leh pate tung ah akhansia a, a naungekte uh hinglou dingin a paikhiasak jel hi. [2]

²⁰Hih hun laiin Mosi a hungpiang a, amel ahoih mahmah a, apa inn ah khathum avak ua,

²¹tualeh amah inn a pat a paihkhiat un, Pharoah tanu in ala a, ama tapa dingin avakta hi.

²²Tuachi`n amah Izipt gam pilna jousiah ahilhta ua, tuachi`n thu leh silbawl ah a thupi mah mahta hi.

²³“Tualeh Mosi kum sawmli ahung hih in, achi leh nam Israelte bangin aki enkol a chih kan ahung utta a.

²⁴Tualeh alak ua mikhat diklou tak a sukgim a om amu a, apai a ava hun a, a phuba a laksak a, Izipt gam mipa a thatta hi.

²⁵Ajiak aman ama khut in Pasian in amauh hunkhia ding ahi, chih a sanggamte`n theiding asa a; hinanleh amau`n a theikei uhi.

²⁶Tualeh ajingni-in Israelmi nih kihau amu a, aman kilemsak asawm a akiang uah, ‘Ngai un, nou Israelmi tuak hilou nahi uh maw, bangding a hichibang a kihau nahi ua?’ achi a.

²⁷Hinanleh khatpa tung a sil gilou bawljawpa in Mosi asawn khia a. ‘Kuan nang ka tung ua vaihawm ding leh lamkaitu dingin ahung bawl a?’

²⁸‘Jani a Iziptmi na thah bang a hung thahsawm na maw?’ achi a.

²⁹Hih thu Mosi-in ajak takin Izipt a pat a taimangta a, Midian gam ah ateng a, huasan ah tapa nih avanei hi.

³⁰“Tualeh kum sawmli abei nungin, Sinai mualgei gamdai ah sawlbawk ah meikuang lak ah Pasian vantungmi khat akiang ah ahung kilak a.

³¹Mosi-in hih amuh takin, asil muh lamdang sa in en ding in avanaih laiin Toupa aw in akiang ah:

³²‘Kei napu napate uh Pasian ka hi, Abraham Pasian, Isak Pasian, Jakob Pasian,’ achi a. Tuatakin Mosi a kithing a, a enngam takei hi.

³³Tuachi`n Toupa`n akiang ah, ‘Na khedap sut in, nadinna munsiangthou ahi.

³⁴Izipt gam a kami omte gentheihna ka mujing a. Tualeh a thumna uh zong kajata a, amauh hunkhia ding a hung paisuk ka hi. Hungpai in, Izipt gam ah kung sawl ding,’ achi hi.

³⁵“Hih Mosi, ‘lamkaitu leh vaihawmtu dingin kuan ahung bawl a?’ chia ahuat uh sawlbawk lak a akiang a hung kilak vantungmi ki thuahpih sakin Pasian in amah lamkaitu leh hunkhiatu kikawm dingin a sawlta hi.

³⁶Aman Izipt gam lak ah, tuipi san ah, tualeh gamdai ah sillamdang leh chiamtehnate amuhsak nungin amauh a puikhiata hi.

³⁷Israel suante kiang a ‘Toupa na Pasian un keimah ahung sawl mahbang in, na sanggamte ah mikhat ahung sawlsak ding a, ama thu na ngaikhia ding uhi, chitu tua Mosi pen hih ahi.’

³⁸Sinai mual a amah tawh kihou vantungmi leh Ipu leh pate tawh gamdai a saptuamte lak a om, ikiang ua piaksawn ding a thuhing latu hihpa ahi.

³⁹“Hinanleh Ipu leh pate`n athu ajui ut kei ua; ahua ua, tualeh Izipt gam a lunggulh kik ua.

⁴⁰Aaron kiangah, ‘I makai dingin pasiante hung bawlsak in, ajiak hih Mosi Izipt gam a hung puikhiapa lah a tanchin ka theikha nawn kei uh,’ achi ua.

⁴¹Tualeh hualaiin bawngnou lim abawl ua, alim pen gan that in abia ua, tuachi`n amauh khutsuak tungah a kipak mahmah uhi.

⁴²Tuachi`n Pasian in aki heisan a, van a aksite abiak theihna ding un amauh a nusiata hi. Jawlnei laibu a: ‘Israel namte aw! gamdai ah kum sawmli sungin sa leh gan that in kei nung biangai uh maw.

⁴³Molok puanbuk leh na pasian uh Remphan aksi biak ding a na bawlte uh na zongjaw ua, amauhte milim ahi uhi. Tualeh ken nou Babilon khuakhen lam ah kung puimang ding chih gelh bangin.’

⁴⁴“Alim amuh bang a bawl ding a Mosi hilhtu in aguat bangin, Ipu leh pate un hua gamdai ah theihsakna puanbuk anei ua.

⁴⁵Tuamah ahi Ipu leh pate khaksawnte`n Pasian in Ipu leh pate, maia Jentel ahawlkhiatte gam aluah laiun Joshua lut bangin alutpih ua, David hung om tanin huasan ah aom jingta hi.

⁴⁶Tua David pen Pasian mitmuh in deihsakna amu a, Jakob Pasian dingin biak inn bawlsak a ut a.

⁴⁷Hinanleh Solomon in tua inn alam jawta hi.

⁴⁸“Hinanleh tungnung pen Pasian ahihleh khut a bawl inn peuh ah aom kei hi. Jawlnei in,

⁴⁹‘Toupa`n van ka touna ahi a, lei kakeng ngakna ahi. inn bang chibangin nung bawlsak ding uai? ka khawlna mun zong bang ahiai?

⁵⁰Ka khut in hih sil jousiah abawl hilou maw?’ achi a, chia agen bangin.

⁵¹“Mi genhak, lungtang leh bil teptanloute aw!” Khasiangthou na doudal jing uhi! “Na pu leh pate bawl bangin nabawl jing uhi!

⁵²Na pu leh pate un Jawlneite lak ah kua ahia abawl gentheih louh uh a om? Tualeh midiktak hungpai ding thu genkholhte athat ua, hua midiktak mansaktu, thattute tuin noumah ngei na hi uhi.

⁵³Dan vantungmite piaksawn munapi a juingailoute aw!” achi hi.

⁵⁴Hih thute ajaktak un alungtang uah sattan abangta ua, a hagawtkhumta uhi.

⁵⁵Hinanleh amahpen Khasiangthou a dim in vanlam a ensaal a, Pasian thupina leh Pasian jiatlam a tou Jesu amu a.

⁵⁶“En in! van kihong a, tualeh Pasian jiatlam a mihing Tapa ding zong kamu hi!” achi a.

⁵⁷Tuachi`n amauh aw ngaihtakin akikou ua, abil uh ahum ua, thakhat a pang in adelh ua,

⁵⁸tualeh khua a pat in ahawlkhia ua suang in adeng ua, tualeh a theihpihtute`n tangval khat amin Saul kengbul ah apuante uh akoih uhi.

⁵⁹Tualeh Stephen in, “Toupa Jesu kakha la in!” chia Pasian asap laiin suang in adeng loulou uhi.

⁶⁰Tuachi`n amah akhupdin a, aw ngaihtakin akikou a, “Toupa! Hih akhialhna uah moh puasak ken!” achi a. Tualeh hihthu agenzoh in a ihmuta hi.