Read Thangal Naga NASEPTE 8 Bible Online

NASEPTE 8 - Thangal Naga bible

NASEPTE 8

¹Tualeh Saul in zong Stephen sih pen lem asa hi. Huahun laiin Jerusalem khua a saptuam omte nasiatakin a bawlgenthei panta ua. Tuachi`n sawltakte chihlouh ngal Judea leh Samaria gam khuachin ah a kithehjak siangta uhi.

²Tualeh Pasian ngaihsak kuate hiam in Stephen luang puain avui ua, nasatak in asu`n uhi.

³Saul in ahihleh saptuam pawlte a bawlgenthei mahmah a, innchin ah alut a, numei pasal akaikhia a, thong ah akhum hi.

⁴Tualeh aki thehjakte khuachin ah apai ua, thu a genta uhi.

⁵Tuachi`n Philip pen Samaria khuapi ah apaisuk a, akiang uah Krist thu agen hi,

⁶Tualeh a sillamdang bawlte amuh uleh ajak un mipite`n Philip thugen lungsim munkhat in a ngaihsak mahmah uhi.

⁷Dawininte, aw ngaihtak a kikou a mi tampi amatte uh sung a kipat ahung pawt ua, tualeh jeng leh kengbaite zong ahung damtak jiak un.

⁸Tua khuapi ah kipakna thupitak ahung omta hi.

⁹Hinanleh amin Simon kichi mi khat aom a. Aman ahihleh milian ka hi chi`n tu masangin hua khuapi ah mitphialdawi zang in Samariamite lamdang satakin akoihjel a,

¹⁰mi jousiahin aneupen a pat alianpen tanpha in, “Hihmi pen ‘Pasian silbawl theihna thupi ahi achih uh ahi,’ ” chi`n athu a ngaihsak jel uhi.

¹¹Tualeh mitphial dawia hun sawttak lamdang taktak ana bawltak jiakin amah angaihsak mahmah uhi.

¹²Hinanleh amau`n Pasian gam leh Jesu Krist tangthupha Philip thugen agintat tak un, anumei apasal in baptisma atangta uhi.

¹³Tuachi`n Simon amah ngeiin zong ahung gingta ta a, tualeh baptisma atan nungin Philip kiangah a omjing a, chiamtehna leh sillamdang thupi taktak kibawlte amuh in lamdang asathei mahmah hi.

¹⁴Tualeh sawltakte Jerusalem a omten Samariate`n Pasian thu a awita uh chih atheih un, akiang uah Peter leh Johan asawl ua.

¹⁵Amauh ava tunsuk un Khasiangthou atan theihna ding un a thumsak ua.

¹⁶Hua masang in ahihleh alak ua kuamah tung ah atung naikei a, Toupa Jesu min a baptisma atan maimai uh ahi nalai hi.

¹⁷Tuachi`n sawltakte`n atung uah akhut uh anga ua, Khasiangthou atangta uhi.

¹⁸Tualeh Simon in sawltakte khut ngak jiak a Khasiangthou piak ahi chih atheih takin,

¹⁹“Hichibang thuneihna hungpia un, kuatung hitaleh zong khut ka ngakna phot in Khasiangthou amuh theihna ding un,” chi`n dangka piak asawm a.

²⁰Hinanleh Peter in akiang ah, “Na dangka nang mah tawh mangkhawm heh, Pasian silpiak dangka tawh lei nasawm jiak in!

²¹Hih thua ka nasep na uah nang panna nanei kei a, tan zong na neikei hi, na lungtang Pasian mitmuh a adiklouh jiak in.

²²Tuajiakin, na khialhna kisik inla, Pasian kiangah thum in, tuachi`n na lungtang a na ngaihtuah ahung ngaihdam khamoh kei ding hi.

²³Ajiak, nang pen gu khatak leh khialhna sal a tang na hi chih kung thei hi.”

²⁴Tuachi`n Simon in adawng a, “Na silgente uh ka tung a atunlouhna dingin Pasian kiangah hung thumsak un,” achi a.

²⁵Tuachi`n amau`n Toupa thu atheihsak zoh uh leh agenzoh nung un Jerusalem khua ah apaikikta ua, Samariate khua tamtak ah tangthupha a genta uhi.

²⁶Tualeh Toupa vantungmi in Philip ahoupih a, “Thou inla simlam a kipan Gaza khua sunsuk lampi, tua gamdai ah paiin,” achi hi.

²⁷Tualeh amah athou a, apaita a. Tualeh ngaiin, Ethiopia gam a mi khat, Ethiopia kumpinu Kandake nuai a michilgeh lamkai liantak, agou jousiah kemtu Jerusalem khua ah Pasian bia dingin avapai a.

²⁸A kilehlam in a sakolleng a toukawm in Jawlnei Isaiah laibu asim a,

²⁹Tuachi`n Khasiangthou in Philip kiangah, “Tua sakolleng vanaih inla, va kithuahpih in,” achi hi.

³⁰Tuachi`n Philip akiang ah avatai a, Jawlnei Isaiah laibu asim aja a, “Nasim pen na theisiam ei?” achi a.

³¹Tualeh aman, “Kuahiam in ahung hilhchian kei leh bang kachi theihsiam dia?” achi a. Tuachiah Philip kahtou a akiang a tou dingin achial a.

³²Pasian Laisiangthou asimna mun ahihleh hih ahi: “Thahding belam bangin amah apaipih ua, tualeh belamnou amulmetpa maia a daihdide bangin. Aman zong akam akak kei hi.

³³A kingiamkhiat laiin a thudikna lakmangin a om a. Asuante tanchin kuan ahia hung gen ding, leitung a panin ahinna laksak ahih jiakin,” chih.

³⁴Tualeh michilgeh in Philip ahoupih a, akiang ah, “Hung hilh in, hih thu Jawlneiin kua thu agenna ahia? ama thu ahia, ahihkeileh midang thu?” achi a.

³⁵Tuachi`n Philip in akam akak a, tua Pasian Laisiangthou a panin akiang ah Jesu tanchin a genta hi.

³⁶Tualeh lampi a apai laiun tui omna munkhat a hungtung ua, tuatakin michilgeh in, “En in, hihsan ah tui aom. Baptisma katanna dingin bangin ahung dal a?” achi a.

³⁷Tuachi`n Philip in, “Na lungtang tengteng a na gintak leh na tangthei hi,” achi a. Tuachiah aman adawng a, “Jesu Krist hih Pasian Tapa ahi chih ka gingta hi,” achi a.

³⁸Tuachi`n sakolleng khawlsak in anih un, Philip leh michilgeh tuilak ah apaisuk khawm ua, Philip in amah a baptista hi.

³⁹Tualeh tui a pat apawtkhiat tak un, Toupa Khasiangthou in Philip a lamangta a, michilgeh in a mukik takei hi. Tualeh a lampi ah nuamtak in apaijel ta hi.

⁴⁰Hinanleh Philip Azota khua ah amukik ta ua, tualeh pai suaksuak in Kaisaria khua atun masiah khuachin ah tangthupha a genta hi.