Read Thangal Naga NASEPTE 9 Bible Online

NASEPTE 9 - Thangal Naga bible

NASEPTE 9

¹Tuachi`n Saul in Toupa nungjuite avau thu leh thah atup thu genkhia kawm kawm in siampi kiangah avapai a.

²Tualeh Damaska khua a kikhopna innte a dingin lai a ngen a, lampi a mi kuapeuh pasal hi`n numei hitaleh amuh muh kansa a Jerusalem khua a ahung paipih theihna ding in.

³Tualeh khualzin a Damaska khuagei a hungtun in, thakhat in van a kipan in vak akim ah ahung tang a.

⁴Tuachi`n leiah apuk a, “Saul, Saul! Nang bangding a hung bawlgenthei na hia?” chi`n aw aja a.

⁵Tuachi`n aman, “Toupa kua na hiam?” achi a. Tuachi`n Toupa`n, “Jesu na bawlgentheih ka hi,” chiangjumte pekjing nang a dingin ahaksa hi, achi a.

⁶Tuachi`n aman kithing kawm leh lamdang satakin, Toupa bang bawl dingin nungdeih a? achi a. Tuachi`n Toupa`n akiang ah, “Thou inla khuapi sung ah lut in, tuachi`n nabawl ding ahung nahilh ding uh,” achi hi.

⁷Tualeh amah tawh zinkhawmte gen ding beiin ading ua, aw aja ua, hinanleh kuamah amukei uhi.

⁸Tuachi`n Saul leia kipan in athou a, ahung hak a hinanleh bangmah amuthei kei a, tuachi`n akhut in akai ua, Damaska khua ah apuilut uhi.

⁹Tuachi`n khua mulou in nithum aom a, bangmah ane in adawn kei hi.

¹⁰Tualeh Damaska ah amin Anania kichi nungjui khat aom a, Toupa`n mangmu bangin akiang ah, “Anania!” achi a, tualeh aman, “Toupa hiah ka om,” achi a.

¹¹Toupa`n akiang ah, “Thou inla, lamlian tang achih uah pai inla, tualeh Juda inn a om Tarsa khua a mi amin Saul kichi kankhia in, ajiak ngaiin, athum laitak ahi, achi a,

¹²tualeh mangmu bangin mikhat amin Anania kichi lut a, amit vaksak ding a atung a akhut ngain amuta hi.”

¹³Tuachi`n Anania in, “Toupa, hihpa in Jerusalem khua a na misiangthoute tung a sil hoihlou abawl dante mi tampi kam ah kija hi.

¹⁴Tualeh hihsan ah zong na min lou jousiahte mattheihna dingin siampite kiang a kipan in thu amu hi,” achi a.

¹⁵Hinanleh Toupa`n akiang ah, “Pai maiin, ajiak amah pen Jentelte leh kumpipate leh Israelte kiang a Ka thu pualut ding a ka belseh ahi.

¹⁶Tualeh kamin jiak a bang zahta a thupi ahia athuak ding, akiang ah theisak ding ka hi,” achi hi.

¹⁷Tuachi`n Anania avapai a, inn ah alut a, atung ah khut ngaiin, “Sanggampa Saul, namit vakna ding leh Khasiangthou na dimtheihna dingin, Toupa, nung paina lampi a na kiang a kilak Jesu ngeiin a hungsawl ahi,” achi hi.

¹⁸Thakhat in lip tawh kibang banghiam khat amit a kipan akiata a, tualeh thakhat in amit ahung vakta a, tuachi`n a thou a, baptisma atangta hi;

¹⁹tuachi`n an ane a, a halhta hi. Tuachi`n Saul Damaska a nungjui omte kiang ah ni bangzah hiam atam hi.

²⁰Tualeh kikhopna innte ah Jesu pen Pasian Tapa ahihdan thu atang koupihpai ngal hi.

²¹Tuachi`n athu jate jousiahin lamdang asa mahmah ua, “Hihpa Jerusalem khua a, hih min loute bawlgenthei jelpa hilou amaw? Tualeh kansa a siampite kiang a pui tum a hihsan a hungpai hilou amaw?” achi ua.

²²Hinanleh Saul pen ahung hat semsem a, Jesu hi Krist ahi taktak hi chih hilhchian in Damaska khua a Juda omte angaihna theilouin akoih hi.

²³Tualeh ni tamtak nungin amah thah tum in Judate akihou ua,

²⁴hinanleh Saul in athiltup uh ana thei a. Tualeh amau`n amah thah tum in kulh kongkhak sun leh janin ata`ng uhi.

²⁵Tuachi`n nungjuite`n amah janin apui ua, kulhbang ah bawm in a khaikhiata uhi.

²⁶Tualeh Saul Jerusalem atun in nungjuite kithuahpih asawm a. Hinanleh amau`n nungjui ahih a gintatlouh jiak un alau mahmah uhi.

²⁷Hinanleh Barnaba in amah apui a, sawltate kiang ah ahung paipih a. Lampi a Toupa amuh a, ahoupih bang, tualeh Damaska khua a Jesu min a hangsantak a thu agendante bang a genta a.

²⁸Tuachi`n amah Jerusalem khua ah akiang uah lutjel pawtjel in aomta hi.

²⁹Toupa Jesu min in hangsan takin thu agen jel a, tualeh Grik Judate anial a, hinanleh amau`n amah thah atum uhi.

³⁰Tuachia a sanggamte`n atheih tak un Kaisaria khua ah apaipih suk ua, Tarsa khua ah asawl mangta uhi.

³¹Tuachi`n saptuamte Judea gam vel, Galili gam vel, Samaria gam vel ah adet deuhdeuh ua, muangtak in aomta uhi. Tualeh Toupa laudan siam in, Khasiangthou khamuan in aom ua, ahung tam deuhdeuhta uhi.

³²Tualeh hichi ahung hi a, Peter pen gam jousiah tuan in apai a, Lidda khua a misiangthou tengte kiang ah ahung paisuk a.

³³Tualeh huasan ah amin Aenia kichi, ajeng jiak a kum giat lupna a lumjing khat amu a.

³⁴Tualeh Peter in akiang ah, “Aenia, Jesu Krist in ahung damsak hi, thou inla napuan phah jial in,” achi a, tuachi`n amah athou pai a.

³⁵Tuachi`n Lidda leh Saron a om jousiahin amah amu ua, Toupa lam angata uhi.

³⁶Tualeh Joppa khua ah amin Tabitha kichi nungjui khat aom a. (Tabitha Grik ham in Dorka ahi) Hih numeiin sil bawlhoih leh silpiak ahau mahmah hi.

³⁷Tualeh hichi ahung hi a, hualaiin achi ana a, asita a, asilzoh un inndan tungnung ah alumsak uhi.

³⁸Tualeh Lidda khua hi Joppa khua gei ahihjiak in nungjuite`n Peter huasan ah aom chih aja ua, “Sawt hallou a akiang ua hungpai ding a va-ngen dingin akiang ah minih asawl ua.”

³⁹Tuachi`n Peter athou a amauhgel tawh akitonta a. A hungtun in amah inndan tungnung ah apaipih ua, tualeh meithai jousiah akiang a dingin Dorka akiang ua adamlai a apuan ak bawlte apuan bawlte lak pum in akap ua.

⁴⁰Hinanleh Peter in aun un apawtsak a, akhupdin a athumta a; tualeh aluanglam nga in, “Tabitha thou in!” achi a, tualeh amahnu`n amit ahung hah a, Peter amuhtak in ahung touta hi.

⁴¹Tuachi`n Peter in akhut apia a, akaithouta a, tualeh misiangthoute meithaite asam a, dam in apiata hi.

⁴²Tualeh huathu Joppa khua mi jousiahin atheisuak ua, tuachi`n mi tampi in Toupa agingta uhi.

⁴³Tualeh hichi ahung hi a, Peter pen Joppa khua ah savun bawlpa Simon inn ah ni tampi atamta hi.