Read Thangal Naga ROMMITE 1 Bible Online

ROMMITE 1 - Thangal Naga bible

ROMMITE 1

¹Paul Jesu Krist sila, sawltak hiding a sehtuam, a tangthupha gen ding a Pasian sap in.

²Hua tangthupha aman tanglai pek a, a Jawlneite tungtawn a Laisiangthou a ana chiamsa.

³Taksa dan a David suan a piang, a Tapa Jesu Krist I Toupa uh;

⁴tualeh siangthouna kha lam ah, misi lak a thohkikna in silbawltheihna tawh Pasian Tapa ahih a suklat tungtang thu.

⁵Amin jiak a namchin lak a, mi ginna lam a thumang sak dingin hehpihna leh sawltak hihna itangta uhi.

⁶Huate lak ah nou zong Jesu Krist sapte na hi uhi.

⁷Pasian ittak misiangthou hiding a sap, Rom khua a om jousiahte kiangah: Pasian i Pa uh leh i Toupa Jesu Krist a kipan hehpihna leh khamuanna na kiang uah om hen.

⁸Leitung pumpi a na tanchin uh a kithang suak jiakin na un ua tung a ka kipahna thu, amasa penin Jesu Krist jiakin ka Pasian kiangah ka gen hi.

⁹Ajiak ka thumna teng ah tawplouin namin uh kalou gige a, chih a Tapa Jesu Krist tangthupha a ka kha a a nna kasepsak jing Pasian ahung theihpihtu ahi.

¹⁰Tu beek a na kiang ua kung paitheihna ding Pasian lemsak a jinhun lemtang ka muh teitei theihna ding a ngen in.

¹¹Ajiak nadetna ding ua khalam silpiak bang hiam kung piaktheihna dingin nou kung mu ut mahmah hi.

¹²Tuapen na ginna uleh ka ginna a, nou leh kei iki khamuan tuah theihna dingin kachihna ahi.

¹³Tualeh unaute, Jentel dangte kiang a ka sepgimna gah ka muh tak mahbang a nou lak ua zong ka muhtheihna dingin na kiang uah tamvei hungpai ka tumta hi, hinanleh tu dongin dal in ka om jing chih na theihlouh uh ka deihkei hi.

¹⁴Grikte leh melmate kiangah bat kanei hi, mipil leh mipilloute kiang ah zong.

¹⁵Tuachi`n nou Rom khua a omte kiang ah zong tangthupha ka theihtawp a gen dingin ka kiman jing hi.

¹⁶Tangthupha ka jumpih kei hi, ajiak agingta jousiah a dingin hihpen hundamna ding a Pasian sil bawltheihna ahi, Judate dingin ahi masa a, tualeh Grikte dingin zong ahi.

¹⁷Ajiak ahihleh gintatna dingin ginna in Pasian diktatna suklat in aom a, “Mi diktat ginna in ahing ding,” chih gelh bang in.

¹⁸Ajiak, thutak diktatlouhna a dal mite Pasian ngaihsak louhna leh diktatlouhna jousiah tung ah Pasian thangpaihna van a pat in ahung kilangta hi.

¹⁹Pasian in atheihsak tak jiakin Pasian tanchin theihding pen amauh uah suklat in aom ta hi.

²⁰Ajiak pen leitung siamchil a pat a, sil muhtheihlouhte a tangtawn sil bawltheihna leh a Pasian jia natan chiang silsiam ah chiantakin akilang a, chiantak a muh in aom hi![1]

²¹Pasian theingal in Pasian bangin a pahtawi kei ua, kipahthu zong agen kei uh, hinanleh sil thulimlou pouh a ngaihtuah jawta ua, tualeh a lungtang maw uh ahung mialta hi.

²²Pil kisa in mimaw ahung suakta ua;

²³Sithei lou Pasian thupina pen sithei mihingte, vasate, keng li nei ganhingte leh abok a vak ganhingte lim in a suaksakta uhi.

²⁴Tuajiakin Pasian in amauh pen a sapum uh jumhuai tak a kibawl tuah ding leh a lungtang uh deihlam bang a silnin abawl uh phal in a omsanta hi.

²⁵Huate`n Pasian thutak juau tangsak in, asiamtu sangin, a silsiam bia in a nna asepsak jawta uhi, asiamtu pen tangtawn a phattak ahi, Amen.

²⁶Huathu jiakin Pasian in jumhuaipi a ahuk uh phal in alehlam a ngatsanta hi; ajiak a numeite uh nasan in zong apianpih omdan ngaina uh danlou bang a om dingin a kibawl lamdang jel uhi.

²⁷Tuachimah bangin pasalte`n zong numei zatdan ngaina tawpsanin, huk in aki enlah ua, pasal leh pasal kilawmlou takin aom ua, a gitlouh man muh ding uh pen a satung uah amu uhi.

²⁸Tualeh a lungsim ua Pasian atheih utlouh man un Pasian in sil kilawmloute bawl ding a adeihlouh lam lungsim neih phal in a omsanta hi.

²⁹Diktat louhna jousiah, kingaihna jousiah, gitlouhna jousiah, duh amna jousiah, ki muhdahna jousiah a dim in; thangsiatnate, tualthahnate, kinialnate, kikhemnate. Mi siatna ding ngaihtuah in adim ua

³⁰thugu`k gen hatte, mi gensiat hatte, Pasian huatlamte, simmoh hatte, kiliansakte, kisatheite, sil gilou pankhiatute, nu leh pa thu mangloute;

³¹theihsiamna neiloute, thuchiam botsiate, pianpih lungsiatna neiloute, ngaihdamna neiloute, zahngaihna neiloute ahi uhi.

³²Huachibang sil bawlte pen sitak ahi chih Pasian vaihawmna theingal in, amauh guak bawl zong hilou in, midang bawl zong a kipahpih uhi.